Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, өлкәдә сијаси мәһбус мөвзусунда мүәјјән мүсбәт дәјишикликләр јер алмагдадыр. Бунунла бағлы ДЕВАММ (Дини Етигад вә Виҹдан Азадлыгларынын Мүдафиә Мәркәзи) мүраҹиәт гәбул етмишдир.
ДЕВАММ сәдри Һаҹы Илгар Ибраһимоғлунун јајдығы сәнәддә билдирлир: “Сон ҝүнләр Азәрбајҹанда сијаси мәһбус мөвзусунда мүсбәт дәјишикликләр јер алмагдадыр. Белә ки, сијаси-иҹтимаи фәалијјәтинә вә фикирләринә ҝөрә азадлыгдан мәһрум едилән бир чох фәаллар азадлыға чыхмышдыр вә үмидварыг ки, бу просес давам едәҹәкдир. ДЕВАММ олараг, бу јанашманы тәгдир едир вә умид ифадә едирик ки, сөзүҝедән просес бир тенденсија һалы әлдә едәҹәк вә Азәрбајҹанда сијаси бахышлара, тәнгидләрә, фәргли јанашмалара, фәал сијаси фәалијјәтә ҝөрә тәгиб олунма һаллары билмәррә арадан галхаҹагдыр. Үмид едирик ки, ганунин алилији бирмәналы олараг бәргәрар едиләҹәк вә һүгуги дөвләт принсипләринә гејд-шәртсиз әмәл олунаҹагдыр.
Ејни заманда ДЕВАММ гејд едир ки, Илгар Мәммәдов, Хәдиҹә Исмајыл вә башга сијаси мәһбусларын азадлыға чыхмасыны да сәбирсизликлә ҝөзләјир.
Ејни заманда ДЕВАММ бәјан едир ки, дини етигадла бағлы Мөвсүм Сәмәдов, Абҝүл Сүлејманов, Сејид Фәрамәрз Аббасов, Елшән Мустафаоғлу, Ҹејһун Ҹәфәров вә башгалары һәлә дә һәбсдә галмагдадырлар.
Мәркәз сөзүҝедән шәхсләрин тәҹили азад олунмасы үчүн бир даһа чағырыш едир. ДЕВАММ һесаб едир ки, дүнјаҝөрүшүндән асылы олмајараг, сијаси вә виҹдан мәһбусларынын бир гисминин азадлыгдан мәһрум едилмәсинин давам етмәси гәтијјән гәбуледилмәздир.
Бунунла јанашы, ДЕВАММ вәтәндаш ҹәмијјәти фәалларынын диггәтини бир зәрури мәсәләјә ҹәлб етмәк истәјир. Белә ки, сијаси вә виҹдан мәһбусларынын һүгугларыны мүдафиә мәсәләсиндә, һәтта вәзијјәтләринин ишыгландырылмасы, тәгсирлилијинә мүнасибәт кими мөвзуларда бәзи шәхсләр вә гурумлар тәрәфиндән мүәјјән дискриминасија тәзаһүрләри сезилмәкдәдир. Сөһбәт ондан ҝедир ки, дини етигадла бағлы олан сијаси мәһбусларла әлагәли мүәјјән “еһтијатланма” ҝөрүнмәкдәдир. Диҝәр сијаси мәһбусларла бағлы бирмәналы мөвге сәрҝиләјән иҹтимаи-сијаси фәаллар, дини етигадла бағлы һәбс едиләнләрлә әлагәдар бир сыра һалларда тәрәддүдлү вә һәтта ҝөзләмә мөвгеји тәзаһүр етдирирләр.
ДЕВАММ сөзүҝедән һалы гејри-мәгбул һесаб етдијини бәјан едир вә иҹтимаи-сијаси фәаллара, вәтәндаш ҹәмијјәтинин бүтүн гурумларына, медиа мәнсубларына вәзијјәтин көклү дәјишмәси илә бағлы мүраҹиәт едир. ДЕВАММ һесаб едир ки, бу ҹүр “еһтијатланма” вә “тәрәддүдл”ләрдән бирдәфәлик имтинанын вахты чохдан ҝәлиб чатмышдыр. Вә дини етигадла бағлы сијаси вә виҹдан мәһбусларына да објектив нәзәрлә бахмаг, бөлүҹүлүкдән вә өзҝәчиликдән гуртулмаг мәгамы артыг чохдан јетишмишдир.
ДЕВАММ вурғу едир ки, бу ҹүр “еһтијатланма” вә “тәрәддүд”ләр – глобал исламофобик сүрәҹин әкс-сәдасыдыр вә истәр мәмурларын, истәрсә дә вәтәндаш ҹәмијјәтинин бәзи мәнсублары бу ксенофобик сүрәҹин тәсири алтына дүшмүшләр.
ДЕВАММ ону да гејд етмәји өзүнә борҹ билир ки, истәр сијаси партијаларын, истәр медианын, истәрсә дә вәтәндаш ҹәмијјәтинин диҝәр бөлмәләринин кифајәт гәдәр бөјүк һиссәси бүтүн сијаси мәһбуслара мүнасибәтдә ејни јанашма сәрҝиләјирләр. Тәәссүф ки, мүәјјән бир һиссә һәлә дә икили јанашма сәрҝиләјәрәк, үмуми фона мәнфи тәсир етмәјә мүвәффәг олур.
Бунлары нәзәрә алараг, ДЕВАММ һакимијјәт мәнсубларына галан сијаси мәһбусларын, о ҹүмләдән дини етигадла бағлы һәбс едиләнләрин тезликлә азадлыға чыхмасы үчүн чағырыш едир, вәтәндаш ҹәмијјәти тәмсилчиләринә исә тохунулан мөвзуларла бағлы мөвгеләриндә көклү дәјишиклик етмәләри үчүн мүраҹиәт едир”.
Диггәт: Хәбәрдән истифадә етдикдә мәнбәјә истинад лазымдыр
