Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, “Мүсәлман Бирлији” Һәрәкатынын сәдри Талеһ Бағырзадәнин ишҝәнҹә нәтиҹәсиндә бурну сындырылыб. Бу барәдә илаһијјатчынын вәкили Ҹавад Ҹавадов мәлумат јајыб.
Һәлә нојабрын сонунда Талеһ Бағырзадәнин јахынлары илә мүгавилә бағлајан вәкил дејир ки, декабрын 29-да Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсинә (“бандотдел”) дәвәт едилиб.
“Орада мәним мүдафиәчи олараг, формал тәгдиматым кечирилди. Талеһ Бағырзадә илә конфинденсиал үнсијјәт сахламаг имканым олмаса да, гысаҹа данышмаг имканым олду. Ағыр ишҝәнҹәләрә мәруз галыб, бурун сүмүјү сындырылыб. Өзүнүн билдирдијинә ҝөрә, бу јолла ондан етирафедиҹи, һәтта диҝәр шәхсләрә гаршы ифадәләрин алынмасына ҹәһдләр едилиб. Буна бахмајараг, о, өзүнү тәгсирли билмиәјиб“, – дејә Ҹавад Ҹавадов гејд едиб.
Вәкилин сөзләринә ҝөрә, нојабрын 26-да һәбс олунандан бәри Баш Мүтәшәккил Ҹинајәткарлыгла Мүбаризә Идарәсиндә сахланылан Талеһ Бағырзадәнин һәлә дә аилә үзвләрилә телефонла әлагә сахламаг һүгугу тәмин олунмур. Јахынларынын онун үчүн ҝөндәрдији совгат, һәтта ади пал–палтар да гәбул едилмир.
Гејд едәк ки, Талеһ Бағырзадәнин сахланма шәраити, һүгугларынын позулмасы илә әлагәдар вәкили мәһкәмә нәзарәти гајдасында шикајәт вериб. Бу шикајәтә Нәсими Рајон Мәһкәмәсиндә јанварын 14-дә саат 15.00-да бахылаҹаг.
Вәкил билдириб ки, мәһкәмә иҹласында ишҝәнҹә һалларынын арашдырылмасы үчүн тибби експертинын кечирилмәси мәсәләсини галдыраҹаг.
Диггәт: Хәбәрдән истифадә етдикдә мәнбәјә истинад лазымдыр
