Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Авропа Бирлији илә Фәлсәтин торпагларыны ишғал етмиш сионист исраил режими арасында мүнасибәтләр сон заманлар кәскинләшиб. Буна сәбәб АБ-нын ишғалчы режим илә бағлы гәбул етдији гәрардыр. Авропа Бирлији Иордан Чајынын Гәрб саһилиндә вә Исраилин зәбт етдији диҝәр әразиләрдә истеһсал етдији мәһсулларын алышына гадаға тәтбиг етдикдән сонра, етираз олараг ишғалчы исраил режими Авропа Иттифагы илә дипломатик әлагәләри дајандырыб.
Ганунсуз исраил режимин баш назири Бенјамин Нетанјаһу билдириб ки, Авропа Бирлијинин рәсмиләри вә онларын нүмајәндәләри илә әлагәләрин кәсилмәси мүнагишәјә даир просеси јенидән гијмәтләндириләнәдәк гүввәдә галаҹаг.
Сионист режимин дүнја бирлији илә мүнасибәтләринин писләшдији вә Тел-Авивин јаранмыш ситуасијаны һәлл етмәкдә аҹиз олдуғу ҝөрүнүр. Амма просесләрин бу формада давам етмәси Азәрбајҹан һакимијјәти үчүн дә јахшы һеч нә вәд етмир. Чүнки Русијадан сонра Азәрбајҹан һакимијјәтинин архаландығы хариҹи өлкәләрдән бири мәһз сионист исраил режимидир. Һакимијјәт мәһз “исраил лоббиси” илә сых әмәкдашлыг һесабына Азәрбајҹандакы сечки сахтакарлығыны өрт-басдыр етмәјә чалышыб.
АБ-нын бу гәрарынын әдаләтли јанашма олдуғуну дејән Милли Шуранын Координасија Мәркәзинин үзвү Ҝүлтәкин Һаҹыбәјли билдирди ки, нәһајәт ки, илләрдән сонра Фәләстин мәсәләсинә әдаләтли јанашма сәрҝиләнди. Исраилин фәләстинлиләрә гаршы доғурдан да бөјүк мүсүбәтләр јашатдығыны сөјләјән Ҝ.Һаҹыбәјли гејд етди ки, бәзән фәләстинлиләр дә мүбаризәләриндә јолверилмәз васитәләрә әл атыр. Амма Ҝ.Һаҹыбәјлинин сөзләринә ҝөрә, бүтүн бунлар ишғал фактына ҝөрә Исраилин дөвләт мәсулијјәтини арадан галдырмырды: «Әслиндә фәләстинлиләрин агрессијасы ондан ирәли ҝәлирди ки, онлар Исраилин ишғал факты илә барышмаг истәмирдиләр. Аналожи дурум Гарабағда да мөвҹуддур. Ермәнистан Азәрбајҹан торпагларыны ишғал едиб. Белә олан һалда фәләстинлиләрин узун мүддәт јашадыгларыны анламаг олур. Авропа Бирлијинин бу гәрары узун илләрдән сонра Исраил-Фәләстин мәсәләсинә әдаләтли бахылмасынын сүбутудур. Артыг БМТ сәвијјәсиндә Фәләстин дөвләти вә онун әразиләринә һөрмәт ифадә едилиб. Бир чох өлкәләр Фәләстинлә һәмрәјли ифадә едибләр. Ишғалчы кимлијиндән асылы олараг дајандырылмалыдыр. Үмид едирик ки, Авропа Бирлији Гарабағла да бағлы охшар мөвгедән чыхыш едәҹәк».
Исраилин бејнәлхалг аләмдә рејтинг итирмәсинин Азәрбајҹанын дурумуна неҹә тәсир едәҹәјинә ҝәлинҹә исә, Ҝ.Һаҹыбәјли вурғулады ки, Русијадан сонра Исраил Азәрбајҹанын дајағыдыр: «Русија һазыркы игтидарын һакимијјәтә ҝәлмәсиндә мүстәсна рол ојнајыб. Бу ҝүнә кими дә һакимијјәтин давамлылығыны тәмин едән әсас гүввәдир. Амма Русијанын дуруму ҝөз габағындадыр. Русија ҹидди шәкилдә чарсылыб. Русијадан сонра Азәрбајҹан һакимијјәтинә ән ҹидди дәстәк верән өлкә Исраилдир. Исраил инсан һаглары вә демократија илә бағлы проблемләри үзүндән бирбаша Гәрбә, АБШ-а чыха билмәјән Азәрбајҹан һакимијјәтинин бу даирәләрлә долајысы тәмасыны тәмин едән өлкә иди. Амма һазырда анлајырыг ки, Исраилин өзүнүн бу даирәләрлә проблеми вар. Артыг һакимијјәтин ҝүвәндији јәһуди лоббиси дә нәинки Азәрбајҹанын, Исраилин өз проблемләрини һәлл етмәк игтидарында дејил».
Диггәт: Хәбәрдән истифадә етдикдә мәнбәјә истинад лазымдыр
