Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран ислам Республикасынын Азәрбајҹандакы Сәфирлијинин Нардаран һадисәләри әтрафында едилән тәблиғат һүҹумлары илә әлагәдар бәјанат јајымлајыб.
Гејд: Иранын Нардаран һадисәләри илә әлагәдар јеҝанә ачыгламасы бу бәјанатдыр вә бундан әввәл Иранын Азәрбајҹандакы Сәфири вә ја Сәфирлијин әмәкдашлары бунунла әлагәдар һеч бир ачыглама вермәмишдир.
Тәәссүфләр олсун ки, бир-нечә нәфәрин өлүмү вә јараланмасы илә нәтиҹәләнән Нардаран һадисәләринин ардындан бәзи рәсми вә гејри-рәсми медиалар вә һәтта милләт вәкилләри бирбаша вә долајысы илә Иран Ислам Республикасыны иттиһам вә бу өлкәнин сүтунларына, хүсусилә дини мүгәддәсләринә һүҹум етмәјә башладылар. Иран Ислам Республикасынын Сәфирлији һадисәләрин илк ҝүнүндән башлајараг сәбир вә дөзүм нүмајиш етдирәрәк буна мүнасибәт билдирмәмәјә чалышды, лакин артыг өлкәмизин ләјагәти вә гүруру һүҹума мәруз галдығы үчүн иҹтимаи фикри ајдынлатмаг мәгсәдилә ашағыдакылары диггәтинизә чатдырыр:
1.Иран Ислам Республикасынын бүтүн өлкәләрә, хүсусилә гоншулара вә өзәлликлә дә Азәрбајҹан Республикасына гаршы хариҹи сијасәти даим меһрибан гоншулуг, конструктив әмәкдашлыг вә дахили ишләрә гарышмама принсипләринә әсасланыб вә бу сијасәти әмәлдә дә иҹра едиб. Иран Ислам Республикасынын бејнәлхалг тәшкилатларда Азәрбајҹан Республикасынын әрази бүтөвлүјүнү һәртәрәфли дәстәкләмәси вә икитәрәфли сијаси, игтисади вә мәдәни әлагәләрин ҝүнбәҝүн ҝенишләнмәси өлкәләримизин, хүсусилә ики өлкәнин мөһтәрәм президентләринин әлагәләрин мөһкәмләндирилмәси вә ҝенишләндирилмәси үчүн ирадәләринин ҝөстәриҹисидир. Шүбһәсиз Иран Ислам Республикасы илә Азәрбајҹан Республикасынын реҝионда јахынлашмасы вә икитәрәфли әмәкдашлыгларын инкишафы, өзәлликлә ики өлкәнин халглары арасында јахынлыг ики өлкәнин башыуҹалылығыны вә һөрмәтини истәмәјәнләр үчүн ҹидди тәһлүкәдир вә бу гүввәләр мүхтәлиф вахтларда ики өлкә мүнасибәтләриндә учурум јаратмаг үчүн ҹари һадисәләрдән истифадә едирләр. Ајдындыр ки, сон һүҹумлар да Иран Ислам Республикасыны гараламаг вә ики өлкә мүнасибәтләринә зәрәр вурмаг мәгсәдилә едилир.
2.Иран Ислам Республикасы һеч вахт Азәрбајҹан Республикасынын дахили ишләринә гарышмаг мәгсәди ҝүдмәјиб вә Нардаран һадисәләринин баш вермәсиндә дә һеч бир ролу олмајыб. Иран даим дост өлкәләрдә сабитлијин вә әмин-аманлығын бәргәрар олунмасыны истәјиб вә принсипиал бир сијасәт олараг проблемләрин вә ихтилафларын зоракы јолларла һәллинә гаршы олмушдур. Тәбиидир ки, Иранын Азәрбајҹанын дахили ишләринә гарышмасы барәдә Азәрбајҹан Республикасынын рәсми органлары тәрәфиндән һәр һансы бир сүбут вә дәлил тәгдим олундуғу тәгдирдә мәсәлә мүтләг арашдырылаҹаг вә биз әминик ки, бу барәдә һеч бир сәнәд вә дәлил јохдур.
3.Азәрбајҹан Республикасынын бәзи медиа органлары Һәзрәт Ајәтуллаһ Нури Һәмәданинин Азәрбајҹан халгы илә ҝөрүшүндә бир-нечә нәфәрин онун әлини өпмәси сәһнәләрини нүмајиш етдирмәклә һәмин шәхсләрин Иранла әлагәли олдуғуну ҝөстәрмәјә чалышырлар. Гејд етмәк лазымдыр ки, дин алимләринә һөрмәт вә еһтирам нүмајиш етдирмәк Ислам дини јарананандан бәри адәт олмушдур вә һәтта Азәрбајҹан халгы да мүхтәлиф заманларда Ајәтуллаһ Ләнкәрани, Ајәтуллаһ Ордубади, Ајәтуллаһ Бадкубеји, Ајәтуллаһ Ҝәнҹәви, Ајәтуллаһ Губаји вә саир бөјүк дин алимләри вә мүҹтәһидләри илә ҝөрүшдүкдә онлара гаршы еһтирам ҝөстәрәрәк әлләрини өпмүшләр. Ајәтуллаһ Нури Һәмәданинин Азәрбајҹан Республикасына сәфәри заманы да бу өлкәнин јүзләрлә ләјагәтли вә иманлы шәхси она гаршы һөрмәт ҝөстәрмишләр вә әҝәр онун сәфәр мүддәти даһа чох олсајды бу рәгәм минләрлә нәфәрә чатарды. Бу ҹүр һөрмәт вә еһтирам нүмајиш етдирмәк һеч бир вәҹһлә онларын башга бир өлкәјә бағлы олмасы кими һесаб едилә билмәз. Ајәтуллаһ Нури Һәмәдани Бакыда әһали илә ҝөрүшәркән чыхыш етмиш вә чыхышында билдирмишдир ки, “шиәнин ганы ҹошмалыдыр, сизин ганыныз исә Гарабағын азад олунмасы уғрунда ҹошмалыдыр.” Белә бир сөзү дејән шәхсә Азәрбајҹан халгы еһтирам ҝөстәрмәмәлидирми? Теһран-Бакы мүнасибәтләринә хәләл ҝәтирмәк мәгсәдилә дини мүгәддәсләрә һөрмәтсизлик едәнләр тәнгид олунмамалыдырлармы?
Тәәссүф ки, бәзи медиа органлары вә хүсуси шәхсләр, өзәлликлә вәһаби муздурлары Нардаран һадисәләриндән суи-истифадә етмәклә шиәлији тәкфирчиликдә вә ифратчылыгда иттиһам етмәјә вә өзләринин тәкфирчи вә террорчу фәалијјәтләриндә ҹинајәт ортағы јаратмаға чалышырлар. Бу елә бир һалда баш верир ки, тарихи фактлара әсасән әсл Ислам, хүсусилә дә шиәлик һеч вахт тәкфирчилик дүшүнҹәсинә малик олмамыш вә бу дин даим мәнтигли, мөтәдил вә фитри бир дин олараг танынмышдыр. Тәкфирчи груплары јетишдириб онлары Суријаја ҝөндәрәнләрин өзләри шиәлији тәкфирчи мәзһәб адландырмагла бүтүн дүнја шиәләрини, хүсусилә дә әзиз Азәрбајҹан халгыны тәһгир едирләр. Дин хадимләри, хүсусилә дә шиә алимләри бу кими тәблиғатлара гаршы еһтијатлы олмалы вә шиәлији тәкфирчиликлә ејниләшдирәнләрә гаршы ајдын вә гәти мөвге сәрҝиләмәлидирләр.
Иран Ислам Республикасынын Азәрбајҹан Республикасындакы Сәфирлији өлкәләримиз вә халгларымыз арасында достлуг вә гардашлыг мүнасибәтләринин мөһкәмләндирилмәсинин ваҹиблијини бир даһа вурғулајараг, Аллаһдан Нардаран һадисәси нәтиҹәсиндә дүнјасыны дәјишәнләрә рәһмәт вә бағышланма диләјир, онларын аиләләринин гәминә шәрик олдуғуну билдирир вә үмид едир ки, бүтүн дост өлкәләрдә јаранан ихтилафлар динҹ шәкилдә, ағсаггалларын тәҹрүбәләриндән вә мәсләһәтләриндән бәһрәләнәрәк өз һәллини тапсын вә биз дә дост вә гардаш өлкәләрдә сабитлик вә әмин-аманлығын бәргәрар олмасына шаһид олаг.
Диггәт: Хәбәрдән истифадә етдикдә мәнбәјә истинад лазымдыр
