Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Һәзрәт Ајәтуллаһулузма Хаменеи базар ҝүнү ахшам Түркмәнистан президенти Гурбангулу Берды Мәһәммәдов илә ҝөрүшдә Иран илә Түркмәнистанын јахын вә достҹасына әлагәләринә, реҝиондакы милитаризмлә мүбаризә вә икитәрәфли һәмкарлыгларын инкишафы үчүн мөвҹуд олан бөјүк имканлара ишарә едәрәк, вурғулајыблар: Террор ҹәрәјанлары илә мүбаризә, онларын нүфузларынын зәрәрсизләшдирилмәсинин јолу, дүзҝүн ислами фәалијјәтләрдә халга имкан вермәк вә мөтәдил вә агиланә ислами фикри һәрәкәтләрин ҝүҹләндирилмәсидир.
Ислам Ингилабынын Бөјүк Рәһбәринин информасија порталынын мәлуматына ҝөрә, Һәзрәт Ајәтуллаһулузма Хаменеи бу ҝөрүшдә Иран вә Түркмәнистан халгларыны ики гоһума бәнзәр гоншулар адландырыблар вә һәмкарлыгларын инкишафы истигамәтиндәки бөјүк имканлардан истифадә ваҹиблијини вурғулајараг, әлавә едибләр: Әлдә олунмуш разылыгларын иҹрасы истигамәтиндә ҹиддиликлә тәсирли вә реал аддымлар атылмалыдыр.
Ингилаб Рәһбәри ислами өлкәләрин вә гоншуларын тәһлүкәсизлији, рифаһы вә инкишафыны Иран Ислам Республикасынын хејринә адландырыб вә дејибләр: Иран-Түркмәнистан сәрһәдләри сүлһ вә динҹлик сәрһәдләридир вә тәрәфләрин фикри архајынлығына сәбәб олур вә Фарс Көрфәзинә вә азад сулара чыхмаг үчүн Иран јолундан истифадә Түркмәнистан үчүн дәјәрли бир фүрсәтдир.
О һәзрәт реҝионун чох ҝәрҝин дурумунда Иран илә Түркмәнистанын тәһлүкәсизлијинә ишарә едәрәк, бу вәзијјәтин давам етмәси үчүн һәмкарлыгларын артырылмасыны зәрури билиб вә белә гејд едибләр: Исламын ады илә ҹинајәтләр төрәдән тәкфирчи груплар вә ИШИД-ин кобуд терроризми вә вәһшиликләри илә гаршылашмада халга дүзҝүн ислами фәалијјәт имканы верилмәлидир вә ән јахшы јол, бу ҹәрәјанларын нүфузунун зәрәрсизләшдирилмәси, мөтәдил вә агиланә фикри һәрәкәтләрин ҝүҹләндирилмәсидир.
Ислам Ингилабынын Бөјүк Рәһбәри билдирибләр ки, Ислам башгалары үчүн хејирхаһлыг, мәһәббәт вә гардашлыг динидир вә террор ҹәрәјанларынын бу ҹинајәтләринин Исламла һеч бир әлагәси јохдур.
Иранын биринҹи витсе-президенти Ҹаһанҝиринин дә иштирак етдији бу ҝөрүшдә Түркмәнистан президенти Теһран сәфәриндән мәмнунлуг ифадә едәрәк, Ислам Ингилабынын Бөјүк Рәһбәри илә ҝөрүшү ифтихар мәнбәји адландырыб вә белә әлавә едиб: Иран вә Түркмәнистан даим јахшы вә тарихи әлагәләрә малик вә бир-бириләринин гәми вә шадлығына шәрик олублар вә сизин Иран вә Түркмәнистанын нәинки ики гоншу, һәм дә ики гоһум олмасына даир сөзләриниз Түркмәнистанын дөвләти вә халгынын тәшвигинә вә архајынлығына сәбәб олур.
О, Ингилаб Рәһбәринин өнҹәки сәфәрләрдәки төвсијәләрини хатырладараг, дејиб: Сизин сөзләриниз даһи рәһбәр вә мүтәфәккир бир инсан кими бизм үчүн бөјүк дәјәрә маликдир вә сизин төвсијәләринизә әмәл етмәк чох јахшы нәтиҹәләр верәҹәк.
Гурбангулу Берды Мәһәммәдов әлагәләрин хүсусән газ, нәглијјат вә јол салма саһәсиндә инкишафы үчүн бөјүк имканларын олмасына тохунараг, дејиб ки, ики өлкәнин бирҝә игтисади вә абадлыг лајиһәләринин һәјата кечирилмәси бүтүн реҝионун хејринәдир.
О, ипәк јолунун тарихи кечмишинә вә өнәминә тохунараг, дејиб ки, бәзи өлкәләр Иран вә Түркмәнистан васитәсилә дәнизә чыхмаг истәјирләр.
О, һабелә реҝионун сијаси дурумуну гејри-гәнаәтбәхш адландырыб вә ИШИД-ин ҹинајәтләринә тохунараг, дејиб ки, ИШИД вә онун тајларынын Исламдан хәбәрләри јохдур вә тәәссүфлә, бәзи дөвләтләр тәрәфиндән һимајә олунурлар.
Диггәт: Хәбәрдән истифадә етдикдә мәнбәјә истинад лазымдыр
