Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, һөкумәтимиз тәнгидчиләринә гаршы гаралама кампанијасыны давам етдирир. Дүнја дәјишир, глобаллашыр, мүтәрәгги әнәнәләр формалашыр, јени ихтиралар мејдана чыхыр вә с. Бизим һөкумәтимиз исә өз амплуасындадыр. Дүнја ирәли ҝетдикҹә, бунлар сүрәтлә ҝеријә аддымлајыр. Һөкумәт мәтбуаты, телеканаллар да бу ијрәнҹ кампанијанын тәркиб һиссәсинә чеврилиб вә тәмиз инсанлары ләкәләмәклә мәшғулдулар.
Узун илләрди һөкумәт әлиндә олан ресурслардан истифадә едәрәк мүхалифәт лидерләрини, мүхалиф фәаллары, тәнгидчи журналистләри, принсипиал һүгуг мүдафиәчиләрини ҝөздән салмаға, онлара гаршы гондарма иттиһамлар “истеһсал” етмәјә ҝиришиб. Мәһз бу шәр-бөһтанын нәтиҹәсиндә дә 100-ә јахын виҹданлы инсан һәбс олунуб. Һазырда бүтүн дүнја бу инсалары “виҹдан мәһбусу” кими таныјыр. Кечирилән мәһкәмә просесләри сүбут етди ки, бу инсанларын һәбси сијаси сифаришди вә ән јүксәк постда отуранларын разылығы илә баш вериб. Јәни бу адамларын ҝүнаһкар олдуғуну тәсдигләјән һеч бир сүбут, дәлил ортаја чыхмады вә ашкар ганунсузлугла мәһкәмәләр ағыр һөкмләр чыхарды.
Сон ҝүнләр исә һөкумәт командасы инанҹлы кәсимин үзәринә һүҹума кечиб. Һөкумәт мәтбуатына баханда сифаришин вә тезисләрин ејни мәнбәдән ҝәлдијини ҝөрмәк мүмкүндүр. Өлкәнин проблемләри башындан ашыр, ағыр сосиал-игтисади бөһран гапыја дирәниб. Бизим һөкумәтимиз исә инанҹлы шәхсләри гараламаға, онлары террор тәшкилатлары илә әлагәләндирмәјә, бу адамларын өлкәдә чеврилиш етдијини сүбута јетирмәјә чалышырлар. Һәгигәтән дә бу материаллара нәзәр саланда, инсанда икраһ һисси јараныр. Мәсәлә бурасындадыр ки, палаз-палаз јазыларын ичиндә һеч бир тутарлы аргумент јохдур. Мәсәлән, Тале Бағырзадәјә гаршы бүтүн иттиһамлар бундан ибарәтдир ки, Гумда тәһсил алыб вә Иранын аҝентидир.
Бу ҝүн дин хадими кими тәгдим едилән вә Гафгаз Мүсәлманлары Идарәсиндә ишләјәнләрин чоху Гумда тәһсил алыб. Мәсәләјә бу мәнтиглә јанашсаг, бу һөкумәтин башында отуранларын да әксәријјәти Русијада тәһсил алыб. Демәли, һөкумәтимиз Русијанын аҝентидир. Өлкә башчысы да Русијада тәһсил алыб. Бу ҝүн ири мәмурларын өвладлары Авропада, АБШ-да тәһсил алыр. Белә чыхыр ки, онлар да һәмин өлкәнин аҝентләриди?
Үмумијјәтлә, бу адам Иранын аҝентидирсә, дөвләт әлејһинә иш апарырдыса, нијә тамам башга иттиһамларла һәбс едилмишди? Нијә һәбсдә оланда онун аҝент олдуғу јада дүшмүрдү вә рәсми мәтбуат тәблиғаты бу истигамәтдә апармырды? Һәмин вахт Тале Бағырзадәни Зејнәб Ханларованын бағыны јандырмагда иттиһам етдиләр. Сонра бу иттиһам ифша олунду вә наркотика иттиһамы ҝүндәмә ҝәлди. Ҝөрүнүр, һөкумәт һәбсдән чыхандан сонра Тале Бағырзадәнин “ислаһ” олунаҹағыны ҝөзләјирмиш. Бунун әкси баш верәндә исә “Иран аҝенти” тәблиғаты ортаја чыхды.
Һеч кимә сирр дејил ки, бүтүн бу иттиһамларын көкүндә Тале Бағырзадәнин һакимијјәт әлејһинә кәскин тәнгиди чыхышлары дајаныр. О һеч вахт чыхышларында Азәрбајҹан дөвләти әлејһинә данышмајыб вә һәр һансы зоракылыг чағырышлары да етмәјиб. Әксинә, дәфәләрлә билдириб ки, һөкумәтин тәхрибатларына ујмајаҹаглар вә динҹ мүбаризә апараҹаглар.
Амма һөкумәт көлҝәсиндән дә горхдуғу, тәнгидчи ҹамеәнин ҝенишләнмәсиндән нараһат олдуғу үчүн гаралама кампанијасыны давам етдирир. Затән бу һакимијјәтин шәр-бөһтандан башга баҹардығы һеч нә јохдур. Бирдә ки, бу өлкәдә Иранда тәһсил алмыш диҝәр илаһијјатчылар да вар. Онлар нијә телеканалларын “улдуз”уна чеврилмир? Она ҝөрә ки, онлардан фәргли олараг Тале Бағырзадә һакимијјәтин ганунсуз әмәлләринә “салават” ҝәтирмир.
Истәнилән һалда инанҹлы кәсимә гаршы бу күтләви гаралама кампанијасы икраһ һисси доғурур вә һакимијјәтин нә гәдәр чүрүк аргументләрлә силаһландығыны ҝөстәрир.
Һәр ҝүн ешидирик ки, Азәрбајҹан вәтәндашы ИШИД сыраларында, Суријада дөјүшүр. Јахуд дәфәләрлә ҝүндәмә ҝәлиб ки, өлкәдә мүәјјән даирәләр вар вә ҝәнҹләри өз тәблиғатлары алтына салыб мәһв едирләр. Јахшы олар ки, һөкумәт бу негатив тенденсијаларын гаршысыны алсын. Өлкәни тәһдид едән мәсәләләрә ҝөз јумулур, амма өлкәнин инанҹлы вәтәндашларына гаршы чиркин иш апарылыр.
Диггәт: Хәбәрдән истифадә етдикдә мәнбәјә истинад лазымдыr
