Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, өтән һәфтәнин сонларындан башлајараг, өлкә ҝүндәминин әсас мүзакирә мөвзуларындан бири “Мүсәлман Бирлији Һәрәкаты” вә гурумун сәдри Һаҹы Тале Бағырзадәдир. Һаҹы Таленин Јасамал Полис Идарәсиндә дөјүлдүјү барәдә сосиал шәбәкәләрдә пајлашдығы статусла башлајан просес онун мүавини Елчин Гасымовун һәбси илә артан хәтлә ҝетди.
Е.Гасымовун азадлыға бурахылмасы тәләби илә чохлу сајда диндарын Сабунчу Рајон Полис Идарәсинин Бакыханов гәсәбәсиндә јерләшән инзибати бинасынын гаршысына топлашмасы вә нәтиҹәдә полисләрлә јаранан гаршыдурма јашанан һадисәләрин пик нөгтәси олду. Бундан сонра телеканалларда, мәтбуат вә сосиал шәбәкәләрдә Һаҹы Тале вә тәшкилаты илә бағлы ҹидди иттиһамлара старт верилди. Әсас иттиһамлардан бири “Мүсәлман Бирлији Һәрәкаты” сәдринин бу илин августунда Иранын дини хадими Ајәтуллаһ Һәмәдани Азәрбајҹана сәфәрә ҝәләркән онун әлини өпмәси ҝөстәрилди.
Сон ҝүнләрдә сосиал шәбәкәләрдә јајылан бир видео исә сөзүн һәгиги мәнасында баш верән просесләрә өз дамғасыны вурду. Видеода өзләрини Һаҹы Таленин тәрәфдарлары кими тәгдим едән намәлум шәхсләр билдирирләр ки, о, һәбс олунарса, өлкәдә ган су јеринә ахаҹаг.
Бүтүн бунларла бағлы Һаҹы Таленин мөвгејини өјрәндик.
“Мүсәлман Бирлији Һәрәкаты”нын сәдри сон ҝүнләрдә онлара гаршы башладылан кампанијанын апардыглары уғурлу сијасәтдән гајнагландығы гәнаәтиндәдир: “Биз конститусија чәрчивәсиндә фәалијјәт ҝөстәририк. Һакимијјәт истәјир ки, аддымларымызы тәһриф етсин. Бунун сәбәби дә халгын ичәрисиндә ”Мүсәлман Бирлији Һәрәкаты"на олан севҝинин ҝүнү-ҝүндән артмасыдыр. Сосиал базамыз артмагдадыр. Инсанлар бизә инанырлар. Бундан һакимијјәт нүмајәндәләри чох нараһатдыр. Бизи ҹәмијјәтә башга ҹүр тәгдим етмәк истәјирләр. Апарылан тәблиғатлар бумеранг характерлидир. Нә едирләрсә, өзләринә гајыдыр. Бир мүддәт өнҹә сизин гәзетдә мүсаһибәм дәрҹ олунмушду. Вәһһабиләрин архасында олигархларын дајандығыны демишдим. Һәмин шәхсләрин һакимијјәт тәрәфиндән дәстәкләндијини билдирмишдим. Бу мүсаһибә өлкәдә сәс-күј јаратмышды. Мүсаһибәдән сонра МТН-дә мәлум просесләр башлады. Сүбут олунду ки, Милли Тәһлүкәсизлик Назирлији вәһһабизмә дәстәк олуб. Һөкумәт һаглы мөвгејимизи ҝөрүб, бизә гаршы гисасчылыг мөвгеји тутуб. Бизә нә гәдәр террорчу дамғасы вурмаг истәсәләр дә, һеч бир уғур әлдә едә билмәјәҹәкләр. Һакимијјәт һамынын таныдығы дин хадимини ИШИД-чијә бәнзәдир. Ҝедән просесләрлә бағлы гәтијјән руһдан дүшмәмишик. Телеканалларда дин әһлини террорист кими гәләмә верирләр. Бу, халга тәһгирдир. Азәрбајҹанымыз үчүн һәр шејимиздән кечдијимизи, торпагларымызын ишғалдан азад олунмасы үчүн ҹанымызы белә вермәјә һазыр олдуғумузу билирләр. Биз дөвләти дүзҝүн анлајырыг. Һакимијјәт вә дөвләти гарышдырмырыг. Бунлары да нараһат едән будур. Топу дүзҝүн јерә тушладығымызы јахшы анлајырлар. Дини олдуғу кими тәгдим едирик".
Илаһијјатчы милли гәһрәман Мүбариз Ибраһимовун атасынын онларын әлејһинә етдији чыхыша бу ҹүр реаксија верди: “Тәсәввүр един ки, шәһид Мүбаризин атасындан бунлар истифадә етдиләр. Шәһидимизлә бағлы мөвгејимиз бәлли иди. Икинҹи дәфә һәбсдән чыхандан сонра Мүбаризин гәбри үзәриндә чыхыш едәркән тәклиф етдим ки, гардаш Түркијә әһалиси өз әсҝәрләринә Меһметчик ады вердији кими, биз дә әсҝәрләримизә Мүбариз ады верәк. Билирәм ки, Мүбаризин атасыны мәҹбури формада данышдырыблар. Ону гынамырам. Истәмирәм ки, шәһид атасы барәдә нәсә десинләр. Садәҹә, дејәрдим ки, бүтүн бунлар јолверилмәздир”.
Һаҹы Тале Ајәтуллаһ Һәмәданинин әлини өпмәси илә бағлы үзләшдији иттиһамлара да тохунду: “Бу мәсәләјә мүнасибәт билдирмишик. Ајәтуллаһ Һәмәдани Ислам алимидир. Дүнјада дин алимләринин әлләриндән өпүрләр. Бурада һеч бир проблем јохдур. О, бизим һәмјерлимиздир. Һәр шејдән өнҹә азәрбајҹанлыдыр. Биздә инсанлар вар ки, Авропада өз һәјат јолдашларынын әлләрини өпдүрүрләр. Хәзәр.ТВ-нин ҝөстәрдији кадры гејд едәрәм ки, Фәтуллаһ Ҝүләнин дә әлиндән өпүлүр. Диҝәр әл өпмәләри дә гејд етмәк олар. Билмирләр ки, халг арасында бизә гаршы неҹә нифрәт һисси ојатсынлар. Гардаш Түркијәдә ағсаггалын әлиндән өпүрләр. МҺП сәдринин әлиндән дәфәләрлә өпүбләр. Бу, алчалмагдыса, о заман түрк халгы алчалыб? Бизи гынајанлар гәрәзли шәхсләрдир. Бунлар һакимијјәтин ишверәнләридир”.
Һаҹы Тале билдирди ки, Ајәтуллаһ Һәмәданини Азәрбајҹана дәвәт едән Аллаһшүкүр Пашазадә олуб: “О да бу барәдә ачыглама вермәлидир. Телеканаллар һакимијјәтин сифаришини јеринә јетирибләр. Халгдан үзр истәмәлидирләр. Дөвләтчилијимизә гаршы зәрбә вурублар. Бунлар һансы хисләтә саһибдирләр ки, белә аддым атыблар”.
Дини гурумун рәһбәри јајылан мәлум видеодакы тәһдидләрлә бағлы бунлары деди: “Ачығы дејим ки, һәмин видеону ҝөрмәмишәм. Мөвгејимиз сосиал шәбәкәләрдә вә мәтбуатда вар. Әтрафымызда олан инсанлара чағырыш етмишик ки, зоракылыға әл атмајын, һүгугдан кәнара чыхмајын. Мүбаризәмиз сивил гајдада ҝедир. Чағырышлары өз адымыздан едирик. Әҝәр кимләрсә чағырыш едирләрсә, бу, тәхрибатдыр”.
Тале Бағырзадә һәбс олунма тәһлүкәләриндән сөз ачды: “Бизи телевизијада террорист кими ҝөстәрдиләр. Мәһкәмә гәрары олмадан һәр һансы бир шәхси иттиһам етмәк һүгуга зиддир. Ики дәфә һәбс олунмушам. Үчүнҹү һәбсә дә һазырам. Һагг јолундајыг. Бу јолда олдуғумуза ҝөрә һәбсхана, өлүм бизим үчүн шәрәфдир. Халгымызын милли-мәнәви дәјәрләринә ҝөрә һәр шејә һазырыг. Бунун үчүн өлмәјә, зиндана ҝирмәјә, һәр ҹүр ишҝәнҹәләрә мәруз галмаға дәјәр”.
Диггәт: Хәбәрдән истифадә етдикдә мәнбәјә истинад лазымдыр
