Илһам Әлијев нојабрын 25-дә Азәрбајҹан Дипломатија Университетиндә кечирилән бејнәлхалг конфрансдакы сөһбәти заманы әввәлҹә Иран азәриләри һагда ујдурма фикирләр сәсләндириб вә өзүнү онларын гәјјуму кими апармаға чалышыб.
“Биз һәјат тәрзимизин, Азәрбајҹанын дүнјәви инкишаф векторунун вә азәрбајҹанлыларын, о ҹүмләдән Иранда јашајан азәрбајҹанлыларын мүдафиәси үчүн әлимиздән ҝәләни едәҹәјик. Онлар халгымызын бир һиссәсидир”, - дејә режим башчысы вурғулајыб.
Суал јараныр: Азәрбајҹан Республикасында әһалинин бөјүк әксәријјәтинин аҹынаҹаглы вәзијјәтдә олдуғу, јохсуллуг вә ишсизлијин түғјан етдији бир вахтда Әлијевин бу ачыгламасыны ким сәмими гәбул едәр, ејни заманда халгдан сөһбәт ҝедирсә, о, мәҝәр тарихдән хәбәрсиздир ки, бүҝүнкү Иран вә Ҹәнуби Гафгазда јашајан етнослар 1828-ҹи илдә Түркмәнчај мүгавиләсинин имзаланмасына гәдәр ваһид Иранын вә ваһид халгын тәркиб һиссәләри олмушлар? Мәнтиглә Аразын о тајында јашајан бүтүн етник нүмајәндәләри, о ҹүмләдән азәрбајҹанлылар Иран халгынын бир һиссәси һесаб олунмалыдыр. Буна бахмајараг Алимәгамлы Рәһбәрин сәлаһијјәтли нүмајәндәси Әли Әкбәр Вилајәтинин дедији кими рәсми Теһран кечмиш тарихә гајытмаг истәмир вә бүтүн гоншуларынын әрази бүтөвлүјүнү дәстәкләјир, үстәлик Азәрбајҹан халгыны ҝөзүнүн ишығы билир.
Илһам Әлијев мүдахиләчи вә ријакар сөһбәтинин давамында Иранда Азәрбајҹан дилли мәктәбләрин олмамасына ирадыны билдириб вә дејиб: “Иранда тәдрисин ермәни дилиндә апарылдығы мәктәбләр вар, анҹаг Азәрбајҹан дилиндә тәдрисин олдуғу мәктәб јохдур”.
Аилә режими башчысынын бу тәзадлы фикринә мүхалифәтин Милли Шурасынын сәдри Ҹәмил Һәсәнли бу јахынларда ағыллы ҹаваб верди вә өзүнүн фејсбук мәгаләсиндә билдирди: “Адам вахташыры ҝедиб Путинә һесабат верир ки, Азәрбајҹанда рус мәктәбләринин сајы 35 фаиздир. Јәни онун рәһбәрлик етдији өлкәдә һәр үч ушагдан бири рус дилиндә охујур…Илһам Әлијев мүстәгил Азәрбајҹанын һүдудларындан кәнар 40 милјон азәрбајҹанлынын ана дилиндә тәһсил алмаг имканы олмамасындан шикајәтләнир, бәс, онун рәһбәрлик етдији мүстәгил Азәрбајҹанда ана дилинин тәдрисинин вәзијјәти неҹәдир?…40 милјон галсын бир тәрәфә, биз өз өлкәмиздә ассимлијасија олуруг, рус дилиндә мәктәбләрин сајынын 35 фаизә чатмасы бу демәкдир”, - дејә профессор Ҹәмил Һәсәнли Әлијевин ачыгламасыны рәдд етмишдир.
Онун фикринҹә, Иран азәриләринин һүгуглары, тәһлүкәсизлијинин тәмин едилмәси барәдә дә режим башчысынын дедикләри тамамилә абсурддур. Белә ки, Илһам Әлијевин идарәчилији дөврүндә өлкәнин әмәк габилијјәтли 5 милјондан бир гәдәр артыг әһалисинин 35 фаизи Азәрбајҹаны тәрк едиб, ҹәлаји-вәтән олуб…
Нә исә аталар сөзүндә дејилдији кими өзүнә умаҹ ова билмир, башгасына әриштә кәсир!
