Азәрбајҹан Республикасынын башчысы Илһам Әлијев Түркијә Президенти Рәҹәб Тајјиб Әрдоғанын бу шәһәрин һава лиманынын ачылышы үчүн Зәнҝилана бу јахынларда олан сәфәриндән сонра бүтүн азәрбајҹанлыларын президенти олмаға даир ҝүҹлү бир иллүзијаја гапылыб.
Илһам Әлијев дејиб: "Биз Түрк Дөвләтләри Тәшкилатында Азәрбајҹанын һүдудларындан кәнарда јашајан азәрбајҹанлыларын тәһлүкәсизлији, һүгуглары вә милли кимлијини мүзакирә етмәлијик".
Азәртаҹ-ын мәлуматына ҝөрә, Илһам Әлијев Түрк Дөвләтләри Тәшкилатынын баш катиби Бағдат Амрејевлә ҝөрүшү заманы, ону Азәрбајҹанын "Достлуг" ордени илә тәлтиф едәрәк, дејиб: "Азәрбајҹанын һүдудларындан кәнарда јашајан азәрбајҹанлыларын сајы Азәрбајҹанда јашајанлардан хејли чохдур, бир нечә дәфә чохдур. Буна ҝөрә дә, әлбәттә, онларын тәһлүкәсизлији, һүгуглары, саламатлығы бизим үчүн чох бөјүк әһәмијјәт кәсб едир. Биз талејин һөкмү илә дөвләтимиздән ајры дүшмүш азәрбајҹанлылара, һәмчинин бизим гардаш түрк дөвләтләринин диҝәр халгларынын дөвләт сәрһәдләринин һүдудларындан кәнарда јашајан чохсајлы нүмајәндәләринә көмәк етмәк, онларын инкишафы, онларын Азәрбајҹан дилини, Азәрбајҹан әнәнәләрини, Азәрбајҹан мәдәнијјәтини горујуб сахламалары, азәрбајҹанчылыг принсипләринә садиг олмалары вә өз тарихи Вәтәни илә әлагәләри һеч вахт кәсмәмәләри үчүн әлимиздән ҝәләни едәҹәјик. Һәмчинин, мән буну да билирәм ки, Түрк дөвләтләринин бүтүн рәһбәрләри бу вә ја диҝәр өлкәләрдә онларын гардашларынын һүгугларынын неҹә тәмин едилмәсинә бөјүк әһәмијјәт верирләр.
Буна ҝөрә дә дүшүнүрәм ки, гаршыдакы илләрдә биз Түрк Дөвләтләри Тәшкилаты чәрчивәсиндә бу мөвзуну - талејин һөкмү илә Түрк Дөвләтләри Тәшкилатынын үзвләри олан өлкәләрин һүдудларындан кәнарда јашајан гардашларымызын һүгуглары, тәһлүкәсизлији, милли идентиклији мәсәләләрини чох ҹидди мүзакирә етмәлијик.
Биз бу мөвзулары сизинлә бу вә ја диҝәр дәрәҹәдә мүзакирә етмишик вә мән һәмишә сизин тимсалынызда өз түрк көкләринә дәриндән бағлы олан бир инсан ҝөрмүшәм. Мән буну сәмими дејирәм. Мәним үчүн бу, чох мүһүм амилдир, она ҝөрә ки, биз һамымыз өз көкләримизи јадда сахламалы вә өлкәләримизи јахынлашдырмаға чалышмалыјыг.
Түрк дүнјасы дүнја мигјасында чох бөјүк потенсиала, ҹоғрафијаја, нәглијјат јолларына, енержи ресурсларына, инсан потенсиалына, интеллектуал потенсиала малик олан бөјүк аиләдир, бөјүк сәрвәтдир. Буна ҝөрә бирлик бизим ҝүҹүмүздүр".
342/
