Авропа Иттифагы Хариҹи Ишләр Назирләри Шурасы базар ертәси ҝүнү инсан һүгуглары бәһанәси илә Иранын Әхлаг Полиси вә Һүгуг Мүһафизә Органлары да дахил олмагла 11 Иран вәтәндашы вә 4 гурумуна санксија тәтбиг едиб.
"ИРНА"нын мәлуматына ҝөрә, Насир Кәнани Авропа Иттифагы Хариҹи Ишләр Назирләри Шурасынын Иранын бәзи рәсми шәхсләринә вә гурумларына гаршы биртәрәфли санксијалар тәтбиг етмәк гәрарыны кәскин шәкилдә писләјиб вә буну бејнәлхалг һүгугун позулмасы вә Иранын дахили ишләринә мүдахиләнин бариз нүмунәси кими гијмәтләндириб.
Кәнани әлавә едиб: "Белә јанлыш вә гејри-конструктив гәрарын конкрет сијаси мотивләр, һәмчинин Иран халгынын әлејһдарлары вә онлара бағлы олан танынмыш медианын әсассыз, тәһриф олунмуш мәлуматларына вә ујдурма иддиаларына әсасланмасы дәрин тәәссүф һисси доғурур".
О, Авропа Иттифагы Назирләр Шурасынын санксија гәрарыны гәрәзли јанашманын давам етдирилмәсинин вә сијаси мәгсәдләрә чатмаг үчүн инсан һүгугларындан инструментал истифадәнин ҝөстәриҹиси кими гијмәтләндириб вә белә бир гәрары көкүндән рәдд едилмиш, сәмәрәсиз вә етибарсыз адландырыб.
Насир Кәнани гејд едиб ки, Иран халгы артыг Авропа Иттифагыны АБШ-ын Ирана гаршы гејри-гануни санксијалары вә максимум тәзјиг кампанијасы илә бағлы һәрәкәтсизлији вә ону мүшајиәт етдији үчүн инсан һагларынын бөјүк позуҹусу кими гијмәтләндириб.
Бундан әввәл Иранын хариҹи ишләр назири Һүсејн Әмир Абдуллаһиан, АИ-нин Хариҹи Сијасәт Башчысы Жосеп Боррелл илә телефон данышығында дејиб: "Иран Ислам Республикасы ҝүҹлү халг дәстәјинә вә сәмәрәли демократијаја маликдир. Бура мәхмәр вә ја рәнҝли чеврилишләр өлкәси дејил. Иран реҝионда сабитлик вә тәһлүкәсизлијин лөвбәридир".
Иранын хариҹи ишләр назири өлкәсинин Авропа Иттифагы илә әмәкдашлыг үчүн даһа бөјүк чәрчивә нәзәрдә тутдуғуну билдирәрәк, авропалылара Ирандакы сон иғтишашлара реалист јанашмағы төвсијә едиб.
342/
