Әһли-Бејт
(әлејһимус сәлам) – Хәбәр Аҝентлији АБНА-нын вердији мәлумата әсасән, Ләғв едилмиш
Милли Тәһлүкәсизлик Назирлијинин (МТН) Һәрби әкс-Кәшфијјат Баш Идарәсинин сабиг
рәиси, ҝенерал-мајор Низами Ширинов вә гурумун тәркибиндә олан идарәләрин рәисләри
ишләмиш Елҹан Абдуллајев вә Елман Таһиров, әмәлијјат мүвәккили ишләмиш Надир Нәзировун
ҹинајәт иши үзрә мәһкәмә просеси баша чатыб.
Бакы Һәрби Мәһкәмәсиндә һаким Ҹамал Рамазановун сәдрлији илә кечирилән иҹласда һөкм охунуб.
Һөкмә әсасән, Низами Ширинов 8 ил, Елҹан Абдуллајев 6 ил, Надир Таһиров 4 ил мүддәтинә азадлыгдан мәрһум едилиб. Елман Таһиров барәсиндә олан ҹинајәтә ҹәлбетмә мүддәти кечдији үчүн онунла бағлы ҹинајәт ишинә хитам верилиб.
Һөкмдә о да гејд олунуб ки, Низами Шириновун үзәринә һәбс гојулмуш 180 мин манантлыг әмлаклары мүсадирә олунаҹаг.
Гејд едәк ки, прокурор Низами Шириновун 12 ил, Елҹан Абдуллајев вә Надир Нәзировун 11 ил азадлыгдан мәрһум едилмәсини, Елман Таһировун исә барәсиндә олан ҹинајәт ишинин мүддәтинин кечмәси илә бағлы ҹинајәт ишинә хитам верилмәсини истәмишди.
Низами Ширинов Ҹинајәт Мәҹәлләсинин 182.3.2 (ағырлашдырыҹы һалларда һәдә-горху илә тәләб етмә), 193-1.3.2 (ҹинајәт јолу илә әлдә едилмиш пул вәсаитләрини вә ја диҝәр әмлакы легаллашдырма), 311.3.4 (ағырлашдырыҹы һалларда рүшвәт алма) вә диҝәр маддәләри илә, Елҹан Абдуллајев, Елман Таһиров вә Надир Нәзиров һәмин Мәҹәлләнин 341.2.1, 341.2.3-ҹү (вәзифә сәлаһијјәтләриндән суи-истифадә вә ја вәзифә сәлаһијјәтләрини ашма) вә диҝәр маддәләри илә тәгсирләндирилән шәхс гисминдә ҹәлб олунуб.
Диггәт: Хәбәрдән Истифадә Етдикдә Мәнбәјә Истинад Лазымдыр!
