АБШ-ын АТӘТ-дәки даими нүмајәндәси, сәфир Мајкл Карпентер Вјанада вердији бәјанатда билдириб ки, Бирләшмиш Штатлар Ермәнистан вә Азәрбајҹанла һәртәрәфли сүлһ сазиши истигамәтиндә ишләмәкдә дәриндән иштирак едир.
О хатырладыб ки, АБШ-ын милли тәһлүкәсизлик үзрә мүшавири Ҹејк Салливан сентјабрын 27-дә Ағ Евдә Азәрбајҹан президентинин мүшавири Һикмәт Һаҹыјев вә Ермәнистанын Милли Тәһлүкәсизлик Шурасынын катиби Армен Григорјанла сүлһ просесинин ирәлиләјиши үчүн ҝөрүш кечириб. “Октјабрын 4-дә дөвләт катиби Блинкен Ермәнистанын хариҹи ишләр назири Мирзојан вә Азәрбајҹанын хариҹи ишләр назири Бајрамовла үчтәрәфли ҝөрүш кечириб, о, етимадын мөһкәмләндирилмәсинә вә данышыгларда ҝәләҹәк ирәлиләјишә тәкан вериб. Дөвләт катиби һәмчинин Ермәнистан вә Азәрбајҹанын давамлы сүлһ сазишинин әлдә едилмәси истигамәтиндә атдыглары мүсбәт аддымлара, о ҹүмләдән Азәрбајҹандан 17 һәрби әсиринин Ермәнистана гајтарылмасына ҝөрә миннәтдарлығымызы ифадә едиб”.
“Биз Ермәнистан вә Азәрбајҹаны данышыглар масасы архасында һәлл едилмәмиш мәсәләләри һәлл етмәјә тәшвиг етмәјә давам едирик. Өтән һәфтә сону сосиал медиа каналларында Азәрбајҹан силаһлы гүввәләринин силаһсыз ермәни әсирләри едам етдијини ҝөстәрән дәһшәтли видеонун јајылмасы там вә гәрәзсиз арашдырылмалыдыр. Мәһбуслара гаршы һәр һансы суи-истифадәјә ҝөрә мәсулијјәт дашыјанлар ҹаваб вермәлидирләр. 13 вә 14 сентјабрда вә јенидән сентјабрын 28-дә атәшкәс режиминин позулмасы АБШ-ы ҹидди шәкилдә нараһат едир. Бирләшмиш Штатлар Ермәнистан вә Азәрбајҹаны давамлы атәшкәс режиминә ҹидди риајәт етмәјә, силаһлы гүввәләрини ҝери чәкмәјә вә сүлһ јолу илә һәлли дәстәкләмәк үчүн сәрһәдләрин делимитасијасы үзрә данышыглары давам етдирмәјә чағырыр. Биз Азәрбајҹан гүввәләрини сентјабрын 12-нә кечән ҝеҹә һәрби әмәлијјатлар башлајана гәдәрки илкин мөвгеләринә гајытмаға даир чағырышымызы бир даһа билдиририк. Сәрһәд мүбаһисәләри зоракылыгла дејил, данышыглар јолу илә һәлл едилмәлидир”, - дејә АБШ-ын АТӘТ-дәки нүмајәндәси вурғулајыб.
Мајкл Карпентер билдириб: “Биз иткин дүшмүш шәхсләрин проблеминин һәллиндә вә галан бүтүн һәрби әсирләрин ҝери гајтарылмасында ҝәләҹәк ирәлиләјиши тәшвиг едирик”.
342/
