Ермәнистан ХИН-ин мәлуматында дејилир ки, тәрәфләр Ермәнистан-Азәрбајҹан мүнасибәтләринин низамланмасы, һабелә Гарабағ мүнагишәси мәсәләләрини әтрафлы шәкилдә мүзакирә едибләр.
"Мирзојан Русија тәрәфин Дағлыг Гарабағ мүнагишәсинин узунмүддәтли вә һәртәрәфли низамланмасына јөнәлмиш сәјләринин, о ҹүмләдән АТӘТ-ин Минск Групунун һәмсәдри гисминдә сәјләринин әһәмијјәтини вурғулајыб.
Русија сүлһмәрамлы континҝентинин Дағлыг Гарабағда атәшкәс режиминин мөһкәмләндирилмәсиндә вә мүнагишә зонасында тәхрибатларын гаршысынын алынмасында, Дағлыг Гарабағын ермәни әһалисинин тәһлүкәсизлијинин вә һәјат фәалијјәти шәраитинин тәмин едилмәсиндә бөјүк ролу гејд едилиб.
44 ҝүнлүк мүһарибә нәтиҹәсиндә јаранмыш һуманитар проблемләрә тохунан Арарат Мирзојан ермәни һәрби әсирләрин вә диҝәр сахланылан шәхсләрин тезликлә гајтарылмасы, һабелә Азәрбајҹанын нәзарәти алтына кечән әразиләрдә ермәни мәдәни-тарихи ирсинин горунуб сахланмасы зәрурәтини вурғулајыб", дејә мәлуматда билдирилир.
Өз нөвбәсиндә, РФ ХИН өз пресс-релизиндә билдириб ки, реҝионал мәсәләләр ҝөрүшдә диггәт мәркәзиндә олуб. "Русија, Ермәнистан вә Азәрбајҹан лидерләринин 9 нојабр 2020-ҹи ил, 11 јанвар вә 26 нојабр 2021-ҹи ил тарихли разылашмаларынын һәртәрәфли јеринә јетирилмәсинә даир өһдәлик тәсдиг едилиб.
Бүтүн игтисади вә нәглијјат коммуникасијаларынын ачылмасы контекстиндә ҝәләҹәк аддымлар, Ермәнистан-Азәрбајҹан сәрһәдинин делимитасијасы вә демаркасијасы үзрә ишләр, һабелә Ермәнистан вә Азәрбајҹан арасында сүлһ сазишинин параметрләринин мүәјјән едилмәси илә бағлы ишләр мүзакирә олунуб".
Ҝөрүшүн әввәлиндә Серҝеј Лавров белә дејиб: "Дағлыг Гарабағла бағлы вәзијјәтин низамланмасы үзрә Русија, Ермәнистан вә Азәрбајҹан арасында үчтәрәфли разылашмаларын неҹә јеринә јетирилдији һаггында мәлумат вермәк үчүн бејнәлхалг вә реҝионал мәсәләләрә диггәт јетирәҹәјик".
342/
