Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, сабаһ - мајын 23- Иран Ислам Республикасы Игтисади Әмәкдашлыг Тәшкилатына (ИӘТ) ев саһиблији едәҹәк.
Игтисади Әмәкдашлыг Тәшкилатынын ҝүндәлијиндә олан мәсәләләр вә тәшкилатын фәалијјәтинин ҝүҹләндирилмәсинә даир мүзакирәләрин апарылмасы мәгсәдилә, ИӘТ-ә үзв дөвләтләрин ХИН башчылары вә мүавинләринин Теһрана сәфәри чәрчивәсиндә тәдбир кечириләҹәк.
Гејд едәк ки, Игтисади Әмәкдашлыг Тәшкилаты, (ИӘТ) - 1985-ҹи илдә Иран, Пакистан вә Түркијә тәрәфиндән јарадылыб. Гурум үзв өлкәләрин Хариҹи Ишләр Назирләри Шурасындан ибарәтдир. Шура тәшкилатын фәалијјәт сијасәтини, Реҝионал Планлашдырма Шурасыны, Мүавинләр Шурасыны мүәјјән едир. Мәнзил-гәрарҝаһы Теһранда јерләшән Мүавинләр Шурасы ИӘТ өлкәләри сәфирләриндән ибарәтдир.
ИӘТ-ин кәнд тәсәррүфаты саһәси; сәнаје әмәкдашлығы; нәглијјат вә рабитә; инфраструктур вә иҹтимаи ишләр; елм, тәһсил вә мәдәнијјәт; енерҝетика; наркотик маддәләрин јајылмамасы мәсәләләри үзрә фәалијјәт ҝөстәрән 8 техники комитәси вар. Комитәләр илдә бир дәфә топланыр. ИӘТ Назирләр Шурасы да ән азы илдә бир дәфә јығынҹаг кечирир.
1993-ҹү илдә БМТ Баш Ассамблејасынын 48-ҹи сессијасында ИӘТ БМТ-дә, 1994-ҹү илдә исә Ислам Тәшкилаты Конфрансы нда мүшаһидәчи статусу алыб.
Гурума үзв олан өлкәләр: “Азәрбајҹан, Әфганыстан, Иран Ислам Республикасы, Газахыстан, Гырғызыстан, Пакистан Ислам Республикасы, Өзбәкистан, Таҹикистан, Түркијә, Түркмәнистан Республикасындан ибарәтдир.”
Диггәт: Хәбәрдән Истифадә Етдикдә Мәнбәјә Истинад Лазымдыр!
