Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, БМТ-нин баш катиби Антониу Гутерреш Чехијанын “Сезнам Зправј” нәшринә шәрһиндә билдириб: “Украјнадакы мүнагишә инкишаф етмәкдә олан өлкәләрә гаршы “сәссиз һүҹумдур” вә 1,7 милјард инсаны јохсуллуг тәһлүкәси илә үз-үзә гојур.”
"Украјнадакы һәрби мүнагишә кәнд тәсәррүфаты мәһсулларынын вә енержи ресурсларынын глобал ихраҹына мане олур, јашајыш минимумунун кәскин артмасына ҝәтириб чыхарыр ки, бу да садә вәтәндашлар үчүн ән мәнфи нәтиҹәләрә чеврилир", - баш катиб гејд едиб.
Гутеррешин фикринҹә, һазыркы шәраитдә варлы дөвләтләр касыб өлкәләрә малијјә јардымы ҝөстәрмәлидирләр ки, бу да бөһрандан чыхмаг просесиндә Јер күрәсинин сакинләри арасында вәсаитләрин әдаләтли бөлүшдүрүлмәсини тәмин едәҹәк.
Белә ки, дүнјада буғда вә арпа истеһсалынын 30%-и Русија илә Украјнанын пајына дүшүр. Бу дөвләтләрин дүнја базарына чыхардыглары кәнд тәсәррүфаты мәһсуллары планетин ән јохсул сакинләринин әсас гида мәнбәјидир. Африканын игтисади ҹәһәтдән зәиф инкишаф етмиш 45 өлкәсинин идхал етдији буғданын үчдә бириндән чоху Русија вә Украјна тарлаларында јетишир
Диггәт: Хәбәрдән Истифадә Етдикдә Мәнбәјә Истинад Лазымдыр!
