АБНА24 Хәбәр Верир , Илһам Әлијев мартын 31-дә Полшанын хариҹи ишләр назири, АТӘТ-ин фәалијјәтдә олан сәдри Збигнев Рау илә ҝөрүш заманы Президент Шарл Мишелин тәшкилатчылығы илә Ермәнистанын баш назири илә планлашдырылан ҝөрүшү барәдә дејиб: “Үмид едирәм ки, бу ҝөрүш мәһсулдар олаҹаг. Чүнки артыг бир нечә ҝөрүш олуб вә биз Азәрбајҹанла Ермәнистан арасында сүлһә доғру ирәлиләмәлијик, мүмкүн олдуғу гәдәр гыса мүддәтдә сүлһ сазишини имзаламалыјыг. Азәрбајҹан бизим бахышымыза ујғун олараг бу разылашманын әсас принсипләрини тәгдим едиб”.
Президент Илһам Әлијев мүнагишәнин артыг өз һәллини тапдығыны вурғулајыб: “Азәрбајҹан буну өзү етди вә инди дә Азәрбајҹанла Ермәнистан арасында мүнасибәтләри низамламаг вахтыдыр. Бизә Ермәнистан рәсмиләри тәрәфиндән мүәјјән месажлар дахил олур. Бу јахынларда мәнә верилән мәлумата ҝөрә, бу месажлардан бири дә ондан ибарәтдир ки, онлар бизим тәклифимизи мәгбул һесаб едирләр. Бу, чох јахшы хәбәрдир вә мән үмид едирәм ки, Брүсселдәки ҝөрүшдә бу мәсәләјә даһа чох ајдынлыг ҝәтириләҹәк”, - Азәрбајҹан Республикасы президенти дејиб.
Азәрбајҹанын хариҹи ишләр назири Ҹејһун Бајрамов да АТӘТ сәдри, Полшанын хариҹи ишләр назири Рау Збиҝниевлә мәтбуат конфрансында дејиб ки, Ермәнистанла нормаллашма просесинә даир бир ај әввәл јени тәклиф ирәли сүрүлүб, 5 база принсипи тәгдим едилиб: “Мәсәләјә ҹидди јанашма олдуғу тәгдирдә биз һазырыг, реал аддымларын атылмасынын заманыдыр. Биз үмид едирик ки, бунун нәтиҹәси јахын заманда ҝөрүнәҹәк”, - Ҹејһун Бајрамов дејиб.
342/
1 aprel 2022 - 08:38
Xəbər kodu: 1243625
Азәрбајҹан Республикасы президенти мүнагишәнин артыг өз һәллини тапдығыны вә Ермәнистанла мүнасибәтләрин низама салынмасынын вахтынын ҝәлиб чатдығыны вурғулајыб.
