Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Хариҹи Ишләр Назирлији Москвада “Русија Федерасијасы вә Азәрбајҹан Республикасы арасында мүттәфиглик гаршылыглы фәалијјәти һаггында Бәјаннамә”нин мәтнини ачыглајыб.
Бу барәдә Хариҹи Ишләр Назирлији мәлумат јајыб.
Бәјаннамәдә дејилир:
Русија Федерасијасынын Президенти Владимир Путин вә Азәрбајҹан Республикасынын Президенти Илһам Әлијев,
Русија-Азәрбајҹан мүнасибәтләринин вәзијјәти вә инкишаф перспективләрини һәртәрәфли нәзәрдән кечирәрәк,
Русија вә Азәрбајҹан вә ики өлкәнин халглары арасында достлуг вә меһрибан гоншулуг тарихи әнәнәләринә, дәрин мәдәни вә һуманитар әлагәләрә архаланараг,
Русија Федерасијасы вә Азәрбајҹан Республикасы арасында достлуг, әмәкдашлыг вә гаршылыглы тәһлүкәсизлик һаггында 3 ијул 1997-ҹи ил тарихли Мүгавиләјә, Русија Федерасијасы вә Азәрбајҹан Республикасы арасында достлуг вә стратежи тәрәфдашлыг һаггында 3 ијул 2008-ҹи ил тарихли Бәјаннамәјә вә Русија Федерасијасынын Президенти В.В.Путин вә Азәрбајҹан Республикасынын Президенти И.Һ.Әлијевин 1 сентјабр 2018-ҹи ил тарихли Бирҝә Бәјанатына әсасланараг,
икитәрәфли мүнасибәтләри Русија Федерасијасынын вә Азәрбајҹан Республикасынын халгларынын марагларына там шәкилдә ҹаваб верәҹәк, реҝионал вә бејнәлхалг тәһлүкәсизлијин вә сабитлијин тәмин едилмәсинә вә мөһкәмләндирилмәсинә төһфә верәҹәк кејфијјәтҹә јени, мүттәфиглик сәвијјәсинә галдырмаға чалышараг,
ики өлкәнин сијаси, игтисади, мүдафиә, мәдәни, һуманитар, тәһсил, сосиал саһәләрдә, еләҹә дә сәһијјә, ҝәнҹләр арасында әмәкдашлыг вә идман саһәсиндә јахынлашмасынын ваҹиблијини дәрк едәрәк,
ики өлкәнин гаршылыглы һөрмәт вә етимад принсипләринә әсасланан һәртәрәфли вә бәрабәрһүгуглу әмәкдашлығынын ҝенишләндирилмәсинә дөнмәз садигликләрини ифадә едәрәк,
Русија Федерасијасынын вә Азәрбајҹан Республикасынын үзв олдуглары бејнәлхалг вә реҝионал тәшкилатларда гаршылыглы мараг доғуран мәсәләләр үзрә гаршылыглы фәалијјәтин инкишаф етдирилмәси нијјәтиндән чыхыш едәрәк,
Тәрәфләрин Мүстәгил Дөвләтләр Бирлији (МДБ) мәканында интеграсија просесләринин инкишаф етдирилмәсиндә мараглы олдугларыны вә мүвафиг сәјләрдә Русија Федерасијасынын әсас ролуну нәзәрә алараг,
Бирләшмиш Милләтләр Тәшкилатынын (БМТ) Низамнамәсинин, Һелсинки Јекун Актынын вә Авропада Тәһлүкәсизлик вә Әмәкдашлыг Тәшкилатынын (АТӘТ) консенсусла гәбул едилән диҝәр сәнәдләринин мәгсәд вә принсипләринә, бејнәлхалг һүгугун үмумтанынмыш принсип вә нормаларына риајәт едәрәк,
бејнәлхалг һүгуг әсасында чохгүтблү дүнјанын формалашдырылмасынын вә бејнәлхалг сүлһүн вә тәһлүкәсизлијин горунуб-сахланмасында БМТ-нин мәркәзи ролунун ваҹиблијини гејд едәрәк, ашағыдакылары бәјан едирләр:
1. Русија Федерасијасы вә Азәрбајҹан Республикасы өз мүнасибәтләрини мүттәфиглик гаршылыглы фәалијјәти, ики өлкәнин мүстәгиллијинә, дөвләт суверенлијинә, әрази бүтөвлүјүнә вә дөвләт сәрһәдләринин тохунулмазлығына гаршылыглы һөрмәт, еләҹә дә бир-биринин дахили ишләринә гарышмамаг, һүгуг бәрабәрлији вә гаршылыглы фајда, мүбаһисәләрин динҹ јолла һәлли вә ҝүҹ тәтбиг етмәмәк вә ја ҝүҹлә һәдәләмәмәк принсипләринә садиглик әсасында гурурлар.
2. Русија Федерасијасы вә Азәрбајҹан Республикасы өз милли марагларынын мүдафиәсинә јөнәлмиш мүстәгил хариҹи сијасәт јүрүдүрләр.
3. Русија Федерасијасы вә Азәрбајҹан Республикасы һәм глобал, һәм дә реҝионал мигјасда сүлһүн мөһкәмләндирилмәси, сабитлијин вә тәһлүкәсизлијин артырылмасы мәгсәдилә гаршылыглы фәалијјәт ҝөстәрирләр. Тәрәфләр мүнагишәләрин гаршысынын алынмасы вә низамланмасында вә реҝионал вә глобал тәһлүкәсизлик вә сабитлик проблемләринин һәллиндә БМТ-нин вә БМТ-нин Тәһлүкәсизлик Шурасынын мәркәзи ролунун даһа да ҝүҹләндирилмәсинә, АТӘТ-ин консенсусла гәбул едилмиш сәнәдләриндә тәсбит едилмиш мәгсәд вә принсипләрин реаллашдырылмасына хүсуси өнәм верирләр.
4. Русија Федерасијасы вә Азәрбајҹан Республикасы актуал бејнәлхалг проблемләр үзрә ејни вә ја јахын мөвгеләр тутмагла о ҹүмләдән икитәрәфли сәвијјәдә дә дахил олмагла конструктив әмәкдашлығы дәринләшдирирләр, еләҹә дә гаршылыглы мараг кәсб едән мәсәләләр үзрә БМТ, АТӘТ, МДБ, диҝәр бејнәлхалг тәшкилат вә форумлар чәрчивәсиндә гаршылыглы фәалијјәт ҝөстәрирләр.
5. Тәрәфләр Гафгаз вә Хәзәр реҝионларында сабитлик вә тәһлүкәсизлијин тәмин едилмәси мәгсәдилә хариҹи сијасәт фәалијјәти саһәсиндә гаршылыглы фәалијјәт ҝөстәрирләр.
6. Русија Федерасијасы вә Азәрбајҹан Республикасы Тәрәфләрдән биринин фикринҹә сүлһә тәһлүкә јарада билән, сүлһү позан вә ја Тәрәфләрдән биринин тәһлүкәсизлик марагларына тәсир едән вәзијјәт јарандығы, еләҹә дә бу ҹүр вәзијјәтин јаранмасы тәһдиди олдуғу тәгдирдә онун низамланмасы мәгсәдилә тәхирәсалынмаз мәсләһәтләшмәләрин апарылмасына һазырлыгларыны ифадә едирләр.
7. Русија Федерасијасы вә Азәрбајҹан Республикасы Тәрәфләрдән биринин фикринҹә ики дөвләтин стратежи тәрәфдашлығына вә мүттәфиглик мүнасибәтләринә хәләл ҝәтирән һәр һансы һәрәкәтләрдән чәкинирләр. Бу мәгсәдлә онлар ики өлкәнин хариҹи ишләр назирликләри хәтти илә даими фәалијјәт ҝөстәрән мәсләһәтләшмәләр механизмини јарадырлар.
8. Азәрбајҹан тәрәфи 2020-ҹи илин нојабр ајында реҝионда атәшин вә бүтүн һәрби әмәлијјатларын там дајандырылмасында Русија Федерасијасынын васитәчилик ролуну јүксәк гијмәтләндирир.
9. Русија Федерасијасы вә Азәрбајҹан Республикасы реҝионда сабитлик вә тәһлүкәсизлијинин мөһкәмләндирилмәси, бүтүн игтисади вә нәглијјат әлагәләринин бәрпасы вә Азәрбајҹан Республикасы илә Ермәнистан Республикасы арасында мүнасибәтләрин нормаллашдырылмасы үчүн әсас кими чыхыш етмиш Азәрбајҹан Республикасынын Президенти, Ермәнистан Республикасынын Баш назири вә Русија Федерасијасынын Президентинин 9/10 нојабр 2020-ҹи ил тарихли, 11 јанвар 2021-ҹи ил тарихли вә 26 нојабр 2021-ҹи ил тарихли бәјанатларынын мүддәаларынын һәјата кечирилмәси үзрә сәјләрә бундан сонра да һәр ҹүр дәстәк верәҹәкләр.
10. Тәрәфләр јухарыда гејд олунан бәјанатларын мүддәаларындан ирәли ҝәлән мәсәләләрин һәллиндә гаршылыглы фәалијјәт ҝөстәрәҹәк вә реҝион дөвләтләри арасында узунмүддәтли сүлһүн јарадылмасы үзрә реҝионал вә бејнәлхалг сәвијјәләрдә сых әмәкдашлыг едәҹәкләр.
11. Русија Федерасијасы вә Азәрбајҹан Республикасы өз әразиләриндә тәшкилатларын вә шәхсләрин диҝәр Тәрәфин дөвләт суверенлијинә, мүстәгиллијинә вә әрази бүтөвлүјүнә гаршы јөнәлмиш фәалијјәтинин гаршысыны гәтијјәтли сурәтдә алырлар.
12. Тәрәфләр милли мараглара ҹаваб верән вә үчүнҹү өлкәләрә гаршы јөнәлмәјән икитәрәфли һәрби-сијаси әмәкдашлығы инкишаф етдирирләр.
13. Тәрәфләр Русија Федерасијасынын вә Азәрбајҹан Республикасынын силаһлы гүввәләри арасында әмәлијјат вә дөјүш һазырлығы үзрә бирҝә тәдбирләрин кечирилмәси дә дахил олмагла гаршылыглы әмәкдашлығы дәринләшдирәҹәк, еләҹә дә икитәрәфли һәрби әмәкдашлығын диҝәр истигамәтләрини инкишаф етдирәҹәкләр.
14. Тәрәфләр һәрби-техники әмәкдашлығын јүксәк сәвијјәсини нәзәрә алмагла мүасир силаһ вә һәрби техника илә тәҹһиз олунма мәсәләләри, еләҹә дә бу саһәдә гаршылыглы мараг доғуран диҝәр истигамәтләр үзрә гаршылыглы фәалијјәт ҝөстәрирләр.
15. Тәрәфләр силаһлар вә һәрби техника үчүн техники хидмәт, тәмир, мүасирләшдирмә үзрә хидмәт мәркәзләринин јарадылмасы, еләҹә дә һәрби тәјинатлы мәһсулларын мүхтәлиф нөвләринин бирҝә истеһсалынын тәшкили үзрә сәјләрини фәаллашдырырлар.
16. Тәһлүкәсизлијин тәмин едилмәси, сүлһүн вә сабитлијин горунуб-сахланмасы мәгсәдилә Русија Федерасијасы вә Азәрбајҹан Республикасы бир-биринә БМТ Низамнамәси, ајры-ајры бејнәлхалг мүгавиләләр әсасында вә Тәрәфләрдән һәр биринин бејнәлхалг-һүгуги өһдәликләрини нәзәрә алмагла һәрби јардым ҝөстәрилмәси имканыны нәзәрдән кечирә биләрләр.
17. Тәрәфләр үчүнҹү дөвләтләр васитәсилә һәјата кечириләнләр дә дахил олмагла бир-биринә гаршы јөнәлмиш һәр һансы һәрәкәтләрдән чәкинирләр.
18. Русија Федерасијасы вә Азәрбајҹан Республикасы бејнәлхалг террорчулуг, екстремизм вә сепаратчылыг тәһдидләринә, трансмилли мүтәшәккил ҹинајәткарлыға, силаһларын, наркотик васитәләрин вә онларын прекурсорларынын ганунсуз дөвријјәсинә, инсан алвери вә информасија-коммуникасија технолоҝијалары саһәсиндә ҹинајәтләрә, еләҹә дә диҝәр јени тәһлүкәсизлик чағырышларына гаршы мүбаризәдә вә онларын нејтраллашдырылмасында сәјләрини бирләшдирирләр. Бу контекстдә Тәрәфләр мәлумат мүбадилә едир вә гејд едилән һүгугазидд фәалијјәтләрин малијјәләшдирилмәси мәнбәләринин мүәјјән едилмәси вә гаршысынын алынмасында сых гаршылыглы фәалијјәт ҝөстәрирләр.
19. Русија Федерасијасы вә Азәрбајҹан Республикасы 12 август 2018-ҹи ил тарихли Хәзәр дәнизинин һүгуги статусу һаггында Конвенсијаны разылашдырылмыш етимад тәдбирләринин, меһрибан гоншулуг вә гаршылыглы анлашма мүһитинин ирәли апарылмасы да дахил олмагла Хәзәр реҝионунда тәһлүкәсизлијин вә сабитлијин горунуб-сахланмасы вә мөһкәмләндирилмәси, бүтүн Хәзәрјаны дөвләтләрин марагларына һөрмәт едилмәси үчүн етибарлы һүгуги әсас кими нәзәрдән кечирирләр.
20. Тәрәфләр Хәзәр реҝионунда әмәкдашлығын инкишафы, Хәзәр дәнизиндә саһилјаны дөвләтләрин суверенлијинин, суверен вә мүстәсна һүгугларынын реализәси, еләҹә дә онларын јурисдиксијаларынын һәјата кечирилмәси үчүн Хәзәр дәнизинин һүгуги статусу һаггында Конвенсијада нәзәрдә тутулмуш бүтүн фәалијјәт принсипләринин ваҹиблијини тәсдиг едирләр.
21. Русија Федерасијасы вә Азәрбајҹан Республикасы бејнәлхалг өһдәликләринә вә милли ганунвериҹиликләринә ујғун олараг бир Тәрәфин физики вә һүгуги шәхсләринин гануни һагг вә марагларынын диҝәр Тәрәфин әразисиндә тәмин едилмәси үзрә сәмәрәли тәдбирләр һәјата кечирирләр.
22. Тәрәфләр ики өлкәнин тиҹарәт-игтисади әлагәләринин давамлы артымынын тәмин едилмәси үчүн ваҹиб әһәмијјәти олан Русија Федерасијасы вә Азәрбајҹан Республикасы арасында игтисади әмәкдашлыг үзрә Һөкумәтләрарасы Комиссијанын ишинә һәртәрәфли јардым етмәјә давам едәҹәкләр.
23. Тәрәфләр давамлы инкишафа вә һәр ики дөвләтин игтисади потенсиалындан сәмәрәли истифадәјә бөјүк әһәмијјәт верәрәк игтисади ислаһатларын һәјата кечирилмәсиндә гаршылыглы фәалијјәт ҝөстәрәҹәк, ики өлкә арасында игтисади гаршылыглы фәалијјәтин дәринләшдирилмәси мәгсәдилә 1 сентјабр 2018-ҹи ил дә имзаланмыш Русија-Азәрбајҹан әмәкдашлығынын башлыҹа истигамәтләринин инкишафы үзрә Фәалијјәт Планынын реализә едилмәсинә, икитәрәфли вә чохтәрәфли бејнәлхалг мүгавиләләрдән ирәли ҝәлән өһдәликләринә ујғун олараг әмтәә вә хидмәтләрин сәрбәст һәрәкәти үчүн әлверишли шәраитин јарадылмасына, еләҹә дә реҝионал игтисади әмәкдашлығын ирәлиләдилмәсинә јардым ҝөстәрәҹәкләр.
24. Русија Федерасијасы вә Азәрбајҹан Республикасы гаршылыглы фајдалы тиҹарәт-игтисади, сәрмајә вә елми-техники әмәкдашлығы дәринләшдирмәк, истеһсал вә елми әмәкдашлығы, һәр нөв мүлкијјәт формалы тәсәррүфат субјектләри арасында бирбаша әлагәләри кејфијјәтҹә јени сәвијјәјә галдырмаг нијјәтиндәдирләр.
25. Русија Федерасијасы вә Азәрбајҹан Республикасы диҝәр Тәрәфин марагларына бирбаша вә ја долајы зәрәр вуран һәр һансы игтисади фәалијјәтләрин һәјата кечирилмәсиндән чәкинәҹәкләр.
26. Тәрәфләр милли ганунвериҹиликләри чәрчивәсиндә металлурҝија, нефт-газ вә ағыр машынгајырма, авиасија, автомобил, кимја, әҹзачылыг вә јүнҝүл сәнаје, кәнд тәсәррүфаты, јол-тикинти вә гида машынгајырмасы мүәссисәләри арасында игтисади әлагәләрин даһа да инкишаф етдирилмәсинә имкан јарадаҹаглар.
27. Русија Федерасијасы вә Азәрбајҹан Республикасы милли ганунвериҹиликләри вә кредит-пул сијасәтләри чәрчивәсиндә кредит-банк тәшкилатларынын фәалијјәтинә, малијјә институтларынын әмәкдашлығынын инкишаф етдирилмәсинә, малијјә-сәнаје груплары, истеһсал вә диҝәр тәшкилати-тәсәррүфат структурлары да дахил олмагла бирҝә мүәссисәләрин јарадылмасына јардым ҝөстәрмәјә һазырлыгларыны ифадә едирләр.
28. Тәрәфләр гаршылыглы һесаблашмаларда милли валјуталардан истифадәјә, банк картларына бирҝә хидмәт дахил олмагла өдәниш системләринин гаршылыглы ујғунлуғуна, еләҹә дә ики өлкәнин банклары арасында бирбаша мүхбир мүнасибәтләрин инкишаф етдирилмәсинә имкан јарадаҹаглар.
29. Тәрәфләр интеллектуал нәглијјат системләри технолоҝијаларындан истифадә етмәклә транзит-нәглијјат гаршылыглы фәалијјәтинин потенсиалынын ардыҹыл инкишафыны, “Шимал-Ҹәнуб” бејнәлхалг нәглијјат дәһлизинин давамлы вә таммигјаслы фәалијјәти үчүн техники вә игтисади шәраитин тәмин едилмәсини һәдәфә алмышлар.
30. Тәрәфләр онларын әразиләриндән кечән бејнәлхалг нәглијјат дәһлизләринин тәһлүкәсизлијинин вә фасиләсиз фәалијјәтинин тәмин едилмәси мәсәләләринин һәллиндә бир-биринин сәјләрини дәстәкләјәҹәк вә бир-биринә милли ганунвериҹилик вә икитәрәфли разылашмалар чәрчивәсиндә транзит дашымалары үчүн әлверишли шәраит јарадаҹаглар.
31. Русија Федерасијасы вә Азәрбајҹан Республикасы бәрабәрһүгуглу вә гаршылыглы фајдалы әсасда бејнәлхалг енержи әмәкдашлығынын стимуллашдырылмасы вә глобал енержи тәһлүкәсизлијинин мөһкәмләндирилмәси мәгсәдилә сых гаршылыглы фәалијјәт һәјата кечирәрәк јанаҹаг-енерҝетика саһәсиндә, о ҹүмләдән сәмәрәли инфраструктур лајиһәләринин ҹәлб едилмәси дә дахил олмагла нефт-газ јатагларынын кәшфијјаты вә емалы, енержи ресурсларынын нәгли саһәсиндә, еләҹә дә алтернатив вә бәрпа олунан енержи мәнбәләри вә енержи сәмәрәлилији саһәсиндә әмәкдашлығы дәринләшдирмәк нијјәтиндәдирләр.
32. Тәрәфләр атом енержисиндән динҹ мәгсәдләрлә истифадә саһәсиндә гаршылыглы фајдалы әмәкдашлығын инкишаф етдирилмәси имканларыны нәзәрдән кечирәҹәкләр.
33. Русија Федерасијасы вә Азәрбајҹан Республикасы информасија-коммуникасија технолоҝијалары саһәсиндә бирҝә лајиһәләрин инкишафыны, јүксәк кејфијјәтли сәс трафикинин мүбадиләси үчүн сәмәрәли шәраитин јарадылмасы да дахил олмагла Русија вә Азәрбајҹанын телекоммуникасија операторлары арасында бирбаша әлагә каналларынын тәшкилини тәшвиг едәҹәкләр.
34. Тәрәфләр бејнәлхалг информасија тәһлүкәсизлији, күтләви коммуникасија васитәләри, публик вә иҹтимаи дипломатија илә әлагәдар мәсәләләрин ҝениш даирәси үзрә ики өлкәнин мүвафиг структурлары вә тәшкилатлары арасында саһәви мәсләһәтләшмәләрин кечирилмәси васитәсилә дә дахил олмагла әмәкдашлығын гурулмасына јардым едәҹәкләр.
35. Тәрәфләр аграр-сәнаје комплекси саһәсиндә, о ҹүмләдән кәнд тәсәррүфаты мәһсуллары илә тәҹһиз етмә, кәнд тәсәррүфаты мәһсулларынын истеһсалынын, емалынын вә сахланмасынын апарыҹы технолоҝијаларындан истифадә мәсәләләри, еләҹә дә фитосанитар нормалара әмәл етмә үзрә әлагәләрин инкишафына вә тәҹрүбә мүбадиләсинә јардым едәҹәкләр.
36. Русија Федерасијасы вә Азәрбајҹан Республикасы мүхтәлиф бејнәлхалг игтисади, малијјә вә диҝәр тәшкилат вә институтлар чәрчивәсиндә бир-биринә онларда иштиракда вә ја бир Тәрәфин марағы олдуғу тәгдирдә онун диҝәр Тәрәфин үзвү олдуғу бејнәлхалг тәшкилатлара үзв олмасында дәстәк вермәклә гаршылыглы фәалијјәт ҝөстәрирләр.
37. Тәрәфләр сәһијјә саһәсиндә, инфексион хәстәликләрә гаршы мүбаризә дә дахил олмагла әһалинин санитар-епидемиоложи рифаһынын тәмин едилмәси саһәсиндә бирҝә лајиһәләрин һәјата кечирилмәсиндә әмәкдашлығы инкишаф етдирәҹәкләр, һәмчинин биоложи тәһлүкәсизлик саһәсиндә әмәкдашлығын гурулмасы имканларыны өјрәнәҹәкләр.
38. Русија Федерасијасы вә Азәрбајҹан Республикасы парламентләрарасы әмәкдашлығы мөһкәмләндирмәк нијјәтиндәдирләр.
39. Тәрәфләр сәмәрәли гаршылыглы фәалијјәт, тиҹарәт, тәсәррүфат, мәдәни вә һуманитар әлагәләрин мөһкәмләндирилмәси үчүн әлверишли шәраит јаратмаг мәгсәдилә Русија Федерасијасынын реҝионлары вә Азәрбајҹан Республикасы арасында әмәкдашлығын инкишафына јардым едәҹәкләр.
40. Тәрәфләр, милли ганунвериҹиликләринә ујғун олараг ики өлкәнин халгларынын мәнәви вә мәдәни јахынлығынын сахланмасына һәртәрәфли јардым етмәк, Тәрәфләрин әразиләриндә јашајан милли азлыгларын тарихи, мәдәни вә дини ирсинин, еләҹә дә етник, дил вә мәдәни өзүнәмәхсуслугларынын горунмасы, сахланмасы вә инкишафыны тәмин етмәк, онларын нүмајәндәләринин иҹтимаи-сијаси, мәдәни вә сосиал-игтисади һәјатда фәал иштиракына шәраит јаратмаг нијјәтиндәдирләр. Бунунла әлагәдар олараг, Тәрәфләр милли ганунвериҹилик чәрчивәсиндә Русија Федерасијасынын вә Азәрбајҹан Республикасынын игтисади, мәдәни вә һуманитар әлагәләрин ҝенишләнмәсинә төһфә верәҹәк диаспор тәшкилатларынын фәалијјәтләринин тәшвиги үчүн аддымлар атаҹаглар.
41. Русија Федерасијасы вә Азәрбајҹан Республикасы мәдәнијјәт вә инҹәсәнәт, тәһсил, елм, туризм вә идман саһәләриндә гаршылыглы әлагәләри дәринләшдирмәјә, иҹтимаи вә ҝәнҹләр тәшкилатлары, тәдрис тәшкилатлары вә тәһсил мүәссисәләри, инновасија мәркәзләри, күтләви информасија васитәләри арасында һәм икитәрәфли, һәм дә чохтәрәфли форматларда әлагәләрин гурулмасына јардым етмәјә давам едәҹәкләр.
42. Тәрәфләрдән һәр бири өз әразисиндә диҝәр Тәрәфин һуманитар, елми-техники, мәдәни вә информасија әлагәләринин инкишафына јөнәлмиш, о ҹүмләдән дә икитәрәфли сазишләр әсасында вә милли ганунвериҹилик чәрчивәсиндә информасија-мәдәнијјәт мәркәзләри васитәсилә фәалијјәтини дәстәкләјәҹәкдир.
43. Тәрәфләр консерт-гастрол фәалијјәти, китабхана вә музеј иши, кинематографија вә мәдәнијјәт үзрә тәһсил саһәсиндә әмәкдашлығын дәринләшдирилмәсини, еләҹә дә иримигјаслы мәдәни маарифләндирмә тәдбирләринин кечирилмәсини тәшвиг едәҹәкләр.
P.S: Бәзи аналтикләрин билдирдијинә ҝөрә, Илһам әлијев һакимијјәти илә Русија арасында мүттәфиглик гаршылыглы фәалијјәти һаггында бағланан бу 43 бәндлик Бәјаннамәнин 9-ҹу бәндинә әсасән Русија Гошунларыны Гарабаға ҝәтиздирән Илһам бу гошунларын 5 ил дејил, узун мүддәтли Гарабағда галаҹағыны тәмин едир. Вә Бәјаннамәнин 10-ҹу бәндинә әсасән исә, Русија Гошунларынын даим Азәрбајҹан әразиләриндә олаҹағыны бир даһа ачыглајыр. Бәјаннамәнин 25-ҹи бәндинә әсасән исә, Илһам, Түркијә башда олмагла Гәрб өлкәләринә енержи ихраҹыны Русијанын марагларын ујғун шәкилдә баш верәҹәјини сөз верир вә бунунла да Азәрбајҹан Республикасы енержи базарында өзүнү рәсми шәкилдә Русија Федерасијасындан аслы етдијини гануниләшдириб.
Диггәт: Хәбәрдән Истифадә Етдикдә Мәнбәјә Истинад Лазымдыр!
