АБНА24 Хәбәр Верир , Тәбризин Шәһид Фәкури адына Һава Базасынын мәтбуат хидмәти бир бәјанат јајараг бир әдәд һәрби тәјјарәнин Тәбриз шәһәри үзәриндә гәзаја уғрадығыны билдириб.
Иранын Шәрги Азәрбајҹан вилајәтинин фөвгәладә һалларын идарә едилмәси үзрә баш мүдири Мәһәммәдбагир Һүнәрбаф һәдисә илә бағлы журналистләрә ачыгламасында дејиб: Гәзадан дәрһал сонра вилајәтин иҹра һакимијјәтинин бүтүн бөһран идарәетмә аҝентләри, јанғынсөндүрмә бригадасы, фөвгәладә һаллар хидмәтләри вә диҝәр јардым груплары һадисә јериндә олуб вә һазырда јанғынын сөндүрүлмәси әмәлијјатлары давам етдирилир.
Һүнәрбаф әлавә едиб: Тәбриз шәһәри дахилиндә Ф-5 гырыҹысынын гәзаја уғрамасы нәтиҹәсиндә ики пилотдан башга бир вәтәндаш да шәһид олуб.
Шәрги Азәрбајҹан вилајәтинин фөвгәладә һалларын идарә едилмәси үзрә баш мүдири гырыҹынын пилотунун өз фәдакарлығы вә ҹәсарәти илә шәһәр дахилиндә иримигјаслы гәзанын гаршысыны алдығыны билдирәрәк әлавә едиб ки, гәза јери шәһәрин әтрафында әһалинин ән сых јашадығы мәканлардан бири олуб, амма пилот хүсуси мәһарәти вә шүҹаәт илә гырыҹыны елә истигамәтләндириб ки, тәјјарәнин јашајыш массивләринә дүшмәсин.
Бунунла бағлы Тәбризин Гырмызы Ајпара Ҹәмијјәтинин директору Һәмид Мүннәҹим билдириб ки, гырыҹы мәктәб диварына чырпылыб, амма мәктәб бағлы олдуғундан мәктәбдә һеч бир мүәллим һејәти вә ја шаҝирд олмајыб
342/
22 fevral 2022 - 04:44
Xəbər kodu: 1232141
Иранын Шәрги Азәрбајҹан вилајәтинин фөвгәладә һалларын идарә едилмәси үзрә баш мүдири Тәбриздә гырыҹы тәјјарәнин гәзаја уғрамасы нәтиҹәсиндә 3 нәфәрин шәһид олдуғундан хәбәр вериб
