АБШ Авропаја бир нечә мин һәрбчи ҝөндәрир

АБНА24 Хәбәр Верир, бу барәдә АБШ Дөвләт Департаментинин сөзчүсү Ҹон Кирби Вашингтонда кечирдији брифингдә дејиб.

О дејиб ки, АБШ Авропаја бир нечә мин һәрбчи ҝөндәрир. Бундан әлавә Пентагон Алманијада олан мин һәрбчини дә Румынијаја ҝөндәрир.

Пентагон јахын ҝүнләрдә Авропаја - Румынија, Полша вә Алманијаја тәхминән 2 мин һәрбчи ҝөндәрәҹәк.

Ҹон Кирбинин сөзләринә ҝөрә, һазырки вәзијјәт тәләб едир ки, НАТО-нун Шәрг голунун ҹиловлајыҹы вә мүдафиә имканлары ҝүҹләндирилсин.

АБШ рәсмиси вурғулајыб ки, һәрбчиләр бөлҝәјә "бирдәфәлик" ҝөндәрилмирләр, бу, Американын реҝиондакы мүттәфигләринә дәстәк ҝөстәрмәк мәгсәдилә едилир. Сөһбәт 82-ҹи һава-десант дивизијасы, еләҹә дә 18-ҹи һава-десант корпусундан ҝедир. Онлар НАТО дејил, АБШ рәһбәрлији алтында олаҹаглар.

Бу арада АБШ Мүдафиә Назирлијиндә билдрибләр ки, лазым ҝәләрсә, Авропа һүдудларында өз гошунларыны дислокасија едәҹәкләр.

Кирби јахын вахтларда Авропаја әлавә гүввәләрин ҝөндәриләҹәјини истисна етмәјиб. Онлардан сонралар Украјнада, "тәхлијәјә јардым етмәк үчүн" истифадә едә биләрләр.

Өтән һәфтә АБШ Авропаја ҝөндәрмәк үчүн елит десант һиссәләрдән 8,5 мин һәрбчини јүксәк һазырлыг сәвијјәсинә ҝәтириб.

Гәрб илә Русија арасында психоложу мүһарибәнин гызышмасы фонунда АБШ президенти Ҹо Бајден чәршәнбә ҝүнү Франса лидери Еммануел Макрон илә телефонла данышыб вә онунла Украјна әтрафындакы вәзијјәти, һабелә Русија илә дипломатик әлагәләри вә Москваја гаршы потенсиал санксијалары мүзакирә едиб.

Һәмчинин АБШ вә НАТО-нун Русијанын тәһлүкәсизликлә бағлы тәклифләринә ҹавабы дәрҹ олунуб.

Гејд олунуб ки, АБШ вә НАТО Шәрги Авропада нүвә силаһларынын јерләшдирилмәсиндән чәкинир.

Хатырладаг ки, Украјна әтрафында вәзијјәтин ҝәрҝинләшмәси илә бағлы Русијаја аид едилән планлар рәсми Москва тәрәфиндән гәти шәкилдә рәдд едилир. Москва һеч кими тәһдид етмәдијини вә бүтүн бу кими бәјанатларын Русија сәрһәдләри јахынлығында даһа чох НАТО һәрби техникасынын јерләшдирилмәси үчүн бәһанә кими истифадә олундуғуну вурғулајыр.

342/