Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, 2021-ҹи ил әрзиндә Азәрбајҹанын ихраҹы 22,2 милјард АБШ доллары, гејри-нефт сектору үзрә исә 2,7 милјард АБШ доллары олуб.
Бу барәдә Игтисади Ислаһатларын Тәһлили вә Коммуникасија Мәркәзинин “Ихраҹ Иҹмалы”нын јанвар сајында мәлумат верилиб.
Гејри-нефт сектору үзрә 2020-ҹи ил илә мүгајисәдә ихраҹ 870 милјон АБШ доллары вә ја 47,2 фаиз артыб.
2021-ҹи илдә мејвә-тәрәвәз мәһсуллары өтән илин ејни дөврү илә мүгајисәдә 22,9 милјон АБШ доллары артараг 630,4 милјон АБШ доллары тәшкил едиб. Мүвафиг дөврдә памбыг иплији ихраҹы 3,1 дәфә, кимја сәнајеси мәһсулларынын ихраҹы 2,9 дәфә, гара металлар вә онлардан һазырланан мәмулатларын ихраҹы ики дәфә, алүминиум вә ондан һазырланан мәмулатларын ихраҹы 66,2 фаиз, памбыг лифи ихраҹы 58,3 фаиз, шәкәр ихраҹы исә 19,3 фаиз артыб.
2021-ҹи илин јанвар-декабр ајлары әрзиндә ихраҹ едилән гејри-нефт секторуна аид малларын сијаһысында памбыг маһлыҹы (208 милјон АБШ доллары) биринҹи олуб. Бу сијаһыда гызыл (202,5 милјон АБШ доллары) икинҹи, помидор (томат) (160,2 милјон АБШ доллары) исә үчүнҹү јердә гәрарлашыб.
Мүвафиг дөврдә Русија Федерасијасына 877,8 милјон АБШ доллары, Түркијәјә 675,9 милјон АБШ доллары, Исвечрә Конфедерасијасына 224,1 милјон АБШ доллары, Ҝүрҹүстана 157,5 милјон АБШ доллары вә Америка Бирләшмиш Штатларына исә 74,9 милјон АБШ доллары дәјәриндә гејри-нефт секторуна аид мал ихраҹ олунуб.
Декабр ајы үзрә ихраҹ 2,4 милјард АБШ доллары тәшкил едиб. Гејри-нефт сектору үзрә ихраҹда артым 73,9 фаиз тәшкил етмәклә 353,6 милјон АБШ доллары олуб. 2021-ҹи илин декабр ајы әрзиндә јејинти мәһсуллары үзрә ихраҹ өтән илин мүвафиг ајы илә мүгајисәдә 38,7 фаиз артараг 101,5 милјон АБШ доллары, гејри-јејинти мәһсуллары үзрә исә 93,7 фаиз артараг 252,1 милјон АБШ доллары тәшкил едиб.
2021-ҹи илин декабр ајында гејри-нефт секторуна аид ән чох мал ихраҹ едилән өлкәләрин сијаһысында Русија Федерасијасы (114 милјон АБШ доллары) биринҹилијә јүксәлиб. Бу сијаһыда Түркијә икинҹи (89,8 милјон АБШ доллары), Исвечрә исә үчүнҹү (19,5 милјон АБШ доллары) олуб.
2021-ҹи илин декабр ајында ихраҹ едилән гејри-нефт секторуна аид малларын сијаһысында хурма (34,4 милјон АБШ доллары) биринҹи, полимерләшмә нәтиҹәсиндә әмәлә ҝәлән илкин формалы диҝәр маддәләр (26,9 милјон АБШ доллары) икинҹи, карбамид (25,1 милјон АБШ доллары) исә үчүнҹү олуб.
Диггәт: Хәбәрдән Истифадә Етдикдә Мәнбәјә Истинад Лазымдыр!
