АБНА24 Хәбәр Верир, Русија Хариҹи Ишләр Назирлијинин (ХИН) Түркијә вә Ермәнистан хүсуси нүмајәндәләринин Москва ҝөрүшү илә бағлы јајдығы бәјанатда билдирилир ки, ики өлкәнин хүсуси нүмајәндәләри конструктив, сијасиләшдирилмәмиш шәкилдә диалог апармаға һазыр олдугларыны нүмајиш етдирибләр.
Бундан башга, Русија ХИН башчысынын мүавини Андреј Руденконун Ермәнистанын вә Түркијәнин хүсуси нүмајәндәләри Рубен Рубинјан вә Сәрдар Кылычла ајры-ајрылыгда ҝөрүшләр кечирдији дә бәјанатда вурғуланыб.
Гејд олунур ки, тәрәфләр конструктив, сијасиләшмәмиш шәкилдә диалог апармаға, ачыг вә "кичик аддым"ларла асандан чәтинә доғру, практик нәтиҹәјә һесабланмыш аддымлар атмаға һазыр олдугларыны бәјан едибләр. Реҝионда сабитлик вә игтисади тәрәгги мараглары, ики өлкә халгларынын рифаһы наминә ишләјәҹәк тәмас нөгтәси ахтарышларыны давам етдирмәк барәдә разылыға ҝәлиниб.
Анкара вә Ирәван өтән илин декабрында әлагәләрин нормаллашмасы просесини башладыблар. Бунун үчүн һәр ики өлкәдән хүсуси нүмајәндәләр – Сердар Кылыч вә Рубен Рубенјан тәјин олунуб.
Ермәнистан илә Түркијә арасындакы мүнасибәтләр 1993-ҹү илдән бәри бәзи өн шәртләрлә бағлы јох сәвијјәсиндәдир. Лакин Түркијә Президент Администрасијасынын сөзчүсү Ибраһим Калын журналистләрә ачыгламасында билдириб ки, артыг Ермәнистан илә әлагәләрин нормаллашмамасы үчүн сәбәб јохдур.
Тәһлилләрә ҝөрә, Гарабағ уғрунда 44 ҝүнлүк мүһарибәдән сонра Түркијә Ермәнистанын ҹәнуб бөлҝәси васитәсилә Азәрбајҹанла бирбаша гуру әлагәләри гурмагда, Ермәнистан исә Гара Дәнизә чыхыш әлдә етмәкдә мараглыдырлар. Лакин коммуникасијаларын ачылмасыны вә реҝионда нормаллашма просесини Кремл өз нәзарәтиндә сахламаға чалышыр. Бу истигамәтдә Азәрбајҹанла Ермәнистан арасында ихтилафларын һәллиндә әсас ролу өз үзәринә ҝөтүрән Русија инди дә Ермәнистанын Түркијә илә әлагәләри нормаллашдырмасы просесинә ев саһиблији едир вә бунунла өз марагларыны тәмин етмиш олур.
342/
16 yanvar 2022 - 13:23
Xəbər kodu: 1219439
Русија ХИН Түркијә вә Ермәнистан хүсуси нүмајәндәләринин ҝөрүшү илә бағлы бәјанат јајыб.
