Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Украјна әтрафында јаранмыш вәзијјәтин бөһран вәзијјәтдән чыхарылмасы үчүн апарылан НАТО-Русија данышыглары (Ҹеневрәдә, Брүсселдә) сүлһүн әлдә олунмасы үчүн чеврәләри даралдыр вә һәрби гаршыдурма еһтималыны ҝүҹләндирир.
Јәни, бөһранын һүдудлары ҝенишләнир, НАТО вә Русија тәрәфиндән тәгдим едилән бәјанатларын руһундан “барыт гохусунун” ҝәлмәси белә демәјә әсас верир.
Тәбии ки, әввәлдән бу данышыглардан ҹидди нәтиҹә ҝөзләнилмирди, һәр һалда ескаласијаны дајандыраҹаг идејаларын тәрәфләрдә гысамүддәтли олса “һәрбисиз даһа ҝөзәлдир” фикри формалашдыраҹағына инам вар иди.
Анҹаг дүнјанын ики һәрби-сијаси гүтбү – Русија вә НАТО- тәһлүкәсизлик үчүн разылыға ҝәлмәк әвәзинә Авропаны вә Украјнаны даһа тәһлүкәли батаглыға сүрүкләмәк вариантыны сечдиләр.
Русијанын мәгсәдини бир ҹүмлә илә ифадә едәк: Украјна вә Ҝүрҹүстан НАТО-ја үзв олмамалыдыр.
НАТО-нун да ҹавабыны бир ҹүмлә илә гејд едәк: Үзвлүк гапысы һеч бир өлкәнин үзүнә бағлы дејил.
Даш гајаја раст ҝәлиб, бу чарпышмадан доған гырынтылар исә башга өлкәләрин үзәринә сычрајыр. Ҝәләҹәкдә Русијанын да, НАТО-нун да өзүнүн һәрби ҝүҹүнү артыраҹағы шәксиздир.
Тәрәфләр бир-биринин ҝүҹүнү дүзҝүн дәјәрләндирмәк үчүн һибрид мүһарибә васитәси олан киберһүҹумлар һәјата кечирирләр, кәшфијјат мәлуматлары вә пејк ҝөрүнтүләрини диггәтлә анализ едирләр.
Һәр ики тәрәфдә исә әһәмијјәтли бошлуглар мөвҹуддур, буну Русија хариҹи ишләр назиринин мүавини Александр Грушко мүзакирәләрә даир данышаркән һәмин бошлугларын мөвҹудлуғуну етираф едиб.
Демәк ки, НАТО данышыгларда Русијаны санксијаларла горхуда билмәјәндә, әлиндә олан бүтүн имканлары сәфәрбәр едәрәк Русијанын “Ахиллес дабаны”ны тапаҹағыны дејиб.
Она ҝөрәдир ки, Грушко дипломатик гәзәб үслубунда билдириб ки, НАТО Русијанын мүдафиә системиндәки зәиф нөгтәләри ахтарса, Русија да аналожи һәрәкәтә кечәҹәк.
Онсуз да һәр ики тәрәф бу илләр әрзиндә бир-биринин көврәк тәмәлләр үзәриндә гурулан һәрби һәдәфләрини мүәјјән етмәјә чалышыблар, онларын һәр икисиндә бу зәиф нөгтәләрә даир мәлуматлар вар.
Лакин ҝөрүнүр ки, сон заманлар дислокасија јерләринин дәјишмәси, ракет системләринин јеринин башга јерләрә көчүрүлмәси јени һәссас бошлуглар јарадыр, бу бошлугларын долдурулмасы үчүн исә заман лазымдыр.
Бу о демәкдир ки, “Х” анында һәмин бошлуглары јалныз ора атылан мәрмиләр долдура биләр.
НАТО-нун ҹанлы гүввәси, нүвә потенсиалы вә диҝәр силаһ арсеналы мүстәвисиндә һәрби ҝүҹү техники бахымдан Русијаны үстәләсә дә, Русија Авропа истигамәтинә јөн алан ҹәбһәдә бөјүк һәрби-стратежи үстүнлүјә маликдир.
Үстәҝәл, Русијада аналогу олмајан силаһлар мөвҹуддур – характериситикасына ҝөрә рәгибләрини үстәләјәҹәк атом суалты ҝәмиләриндән тутмуш, дүнјада ән узаг мәнзилли баллистик ракетләрә гәдәр.
Тәрәфләрин һәрби ҝүҹү бир-бирини горхутма актыдыр, амма бу горхуја гаршы һәлледиҹи вәрдишләр формалашдырылыб дејә, о гәдәр дә кечәрли дејил.
Украјнаны әһатәјә алан ҝәрҝинлик реҝион үчүн һеч дә хош олмајан прогнозлар сәсләндирмәк үчүн әсаслар верир.
Данышыглардан чыхарылан нәтиҹә будур ки, ҝәрҝинлик давам едәҹәк вә Авропа үчүн јени тәһлүкәләр ҝәтирәҹәк.
Агшин Кәримов
Диггәт: Хәбәрдән Истифадә Етдикдә Мәнбәјә Истинад Лазымдыр!
