АБНА24 Хәбәр Верир, Гырғызыстан Парламенти бу өлкәнин һәрбчиләринин Газахыстанда Коллектив Тәһлүкәсизлик Мүгавиләси Тәшкилатынын (КТМТ) сүлһмәрамлы миссијасында иштиракына разылыг вериб.
Билдирилир ки, парламент бөјүк чохлугла һәрбчиләрин ҝөндәрилмәсинә разылыг вериб. Гәрарын леһинә 69 депутат сәс вериб.
Бу арада Коллектив Тәһлүкәсизлик Мүгавиләси Тәшкилатынын Газахыстанда мүвәггәти јерләшдирилмиш континҝентинә рәһбәр тәјин олунуб. Бу вәзифәјә Русија Һәрби Десант Гүввәләринин ҝенерал полковник Андреј Сердјуков тәјин олунуб.
Гејд едәк ки, даһа әввәл КТМТ-нын сүлһмәрамлы миссијасы чәрчивәсиндә Русија Газахыстана 2500, Беларус 500, Таҹикистан 200, Ермәнистан исә 70 һәрбчи ҝөндәриб.
Јанварын 5-дә Газахыстан президенти Касым-Жомарт Токајевин сәдрлији илә Тәһлүкәсизлик Шурасынын иҹласы кечирилиб. Токајев иҹласда өлкәдәки ҝәрҝин вәзијјәтлә бағлы КТМТ тәрәфдашларындан һәрби јардым истәмәјин зәрурилијини билдириб.
Јанварын 5-дә ҝеҹә саатларында Коллектив Тәһлүкәсизлик Мүгавиләси Тәшкилатынын (КТМТ) Коллектив Тәһлүкәсизлик Шурасы Газахыстан президентинин мүраҹиәти илә әлагәдар коллектив сүлһмәрамлы гүввәләрин һәмин өлкәјә ҝөндәрилмәси барәдә гәрар гәбул едиб. Бу барәдә Шуранын сәдри, Ермәнистанын баш назири Никол Пашинјан дејиб ки, президент Токајевин мүраҹиәти илә әлагәдар, Газахыстан Республикасынын милли тәһлүкәсизлијинә вә суверенлијинә, о ҹүмләдән, кәнар мүдахилә нәтиҹәсиндә јаранмыш тәһлүкәни нәзәрә алараг, КТМТ Коллектив Тәһлүкәсизлик Шурасы, Коллектив Тәһлүкәсизлик Мүгавиләсинин 4-ҹү маддәсинә әсасән, КТМТ-нин коллектив сүлһмәрамлы гүввәләринин Газахыстан Республикасына ҝөндәрилмәси гәрара алыныб.
КТМТ континҝентинин тәркибинә Русија, Беларус, Ермәнистан, Таҹикистан вә Гырғызыстан силаһлы гүввәләринин бирләшмәләри дахилдир.
342/
7 yanvar 2022 - 09:14
Xəbər kodu: 1216439
Гырғызыстанын баш назиринин мүавини билдириб ки, Республика Газахыстана 150 һәрбчи вә 19 әдәд техника ҝөндәрмәк нијјәтиндәдир.
