АБНА24 : ИРИБ-ин Москва бүросу мәлумат вериб.
Мәлумата әсасән, Ҹәнуби Гафгазын үч өлкәси јәни Ермәнистан, Ҝүрҹүстан вә Азәрбајҹан Республикасы вә онларын үч гоншу өлкәси олан Иран, Русија вә Түркијәдән ибарәт "3+3" форматында кечирилән бу мүһүм реҝионал ҝөрүшдә, Гарабағ бөһранынын һәлли вә давамлы сүлһә наил олмағын јоллары арашдырылыб.
Иҹласда, Иран Ислам Республикасы адындан Иранын хариҹи ишләр назиринин Аврасија мәсәләләри үзрә мүавини Әлиреза Һәгигијан вә Иранын Москвадакы сәфирлијинин бир груп дипломаты иштирак едиб.
Ҝөрүшүн әввәлиндә Иран нүмајәндәси өлкәсинин бу данышыгларын әсас тәшәббүскары олдуғуну диггәтә чатдырараг, дејиб: "Иран һесаб едир ки, реҝиондакы проблемләр, чағырышлар вә фикир ајрылыглары реҝион өлкәләринин өзләри тәрәфиндән һәлл едилмәлидир".
Ҹәнаб Һәгигијан, һәмчинин ИРИБ-ә вердији мүсаһибәдә данышыгларын бу раундуну дәјәрләндириб вә дејиб: "Хошбәхтликдән Иран Ислам Республикасы бу данышыгларын илк раундунда фәал иштирак етди вә стратежи Ҹәнуби Гафгаз реҝиону илә бағлы һәссаслыгларыны вә принсипиал фикирләрини бәјан етди".
О, иҹласда иштирак едән өлкәләрин давамлы сүлһ вә сабитлијин бәргәрар олунмасы, һәмчинин игтисади инкишаф вә рифаһ мәгсәди илә өз фикирләрини ирәли сүрдүкләрини бәјан едәрәк, дејиб: "Иран реҝионал ҝәрҝинлијин һәлли үчүн реҝионал әмәкдашлығы дәстәкләмәклә јанашы, тиҹарәт, һабелә дәмир јолу, автомобил вә дәниз нәглијјаты үчүн шәраитин јарадылмасы мәгсәдилә өлкәләрин интеграсијасынын ваҹиблијини вурғулајыб".
Иранын хариҹи ишләр назиринин көмәкчиси, өлкәсинин реҝионун ҝеосијасәтиндә һәр һансы бир дәјишиклијин әлејһинә олдуғуну билдирәрәк, әлавә едиб: "Биз билдирдик ки, өлкәләрин әрази бүтөвлүјүнә һөрмәт едилмәлидир"
342/
12 dekabr 2021 - 11:38
Xəbər kodu: 1207824
Гарабағ бөһранынын давамлы һәлли үчүн Ермәнистан вә Азәрбајҹан Республикасы вә онларын гоншуларындан ибарәт 6 өлкәнин реҝионал әмәкдашлыға даир илк иҹласы бу ҝүн Москвада Иранын иштиракы илә кечирилиб.
