АБНА24 Хәбәр Верир, Владимир Шаповалов Русијанын "Позитсија програмына мүсаһибәсиндә билдириб ки, Гарабағ мүнагишәси битмәјиб, о дајандырылыб. Инди ики реаллыг инкишаф едир: Дағлыг Гарабағын тарихи вә Ермәнистан-Азәрбајҹан сәрһәдинин тарихи. Азәрбајҹан һесаб едир ки, Гарабағ мәсәләси бағланыб. Амма Ермәнистанда вә Русијада белә дүшүнмүрләр...
Политологун сөзләринә ҝөрә, Русија сүлһмәрамлыларынын дырнагарасы Дағлыг Гарабағ Республикасы әразисиндә олмасы фактынын өзү ҝөстәрир ки, бу, Азәрбајҹанын там суверен әразиси дејил. Сүлһмәрамлыларын олмасы бурада һәрби-сијаси просесин натамамлығындан хәбәр верир.
Русијалы политолог сонра дејиб: “2020-ҹи илдә Гарабағда баш верәнләр чохлары, о ҹүмләдән Русија үчүн шок олду. Русијалы експертләр мүнагишәнин бу мәрһәләсинин белә радикал сонланаҹағыны прогнозлашдыра билмәздиләр. Ајдын иди ки, Азәрбајҹан һәрби-сијаси бахымдан ҝүҹләнир, буну Ермәнистан һаггында демәк олмазды. Амма буна бахмајараг ҝеосијаси вәзијјәтин белә тез дәјишмәси мәним үчүн дә шок олду”
Хатырладаг ки, һазырда Азәрбајҹанын Русија сүлһмәрамлыларынын нәзарәтиндә олан әразиләри Гондарма Дағлыг Гарабағ Республикасы адланан гурумун бајрағы алтында идарә олунур. Русија сүлһмәрамлылары да өз фәалијјәтләрини һәмин гурумла координасија едирләр.
Азәрбајҹанлылар һесаб едирләр ки, Биринҹи Гарабағ мүһарибәси заманы Ермәнистан онларын рајонларыны мәһз Русијанын дәстәји илә ишғал едиб. Буна әсасланан бәзи азәрбајҹанлылар дүшүнүрләр ки, Русијанын сүлһмәрамлыларынын Дағлыг Гарабағ бөлҝәсинә јерләшдирилмәси бурадакы ермәниләрин сепаратчы сәјләрини давам етдирмәсинә имкан верир.
Үчтәрәфли бәјаната ҝөрә, Русија сүлһмәрамлыларынын әсас вәзифәләриндән бири бөлҝәдә һәр һансы ганунсуз силаһлы гүввәнин мөвҹудлуғунун гаршысыны алмагдыр. Лакин бу вахта гәдәр Русија тәрәфиндән бу хүсусда мүвафиг аддым атылмајыб вә сепаратчылар вахташыры Азәрбајҹан һәрбчиләринә гаршы тәхрибат төрәдирләр.
Буна бахмајараг, рәсми Бакы индијә гәдәр онларын Дағлыг Гарабағдакы фәалијјәтинә ҹидди ирад билдирмәјиб.
342/
12 dekabr 2021 - 11:36
Xəbər kodu: 1207822
Русијалы политолог Азәрбајҹанын ганыны гаралдан ачыглама вериб, Гарабағ мүнагишәсинин битмәдијини дејиб.
