Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Республикасынын Иран Ислам Республикасындакы сәфири Әли Әлизадә Иран Ислам Республикасынын енерҝетика назири Әли Әкбәр Меһрабиан илә ҝөрүшүб.
Азәрбајҹанын Иран үчүн јахын дост вә гоншу өлкә олдуғуну билдирән Әли Әкбәр Меһрабиан, ики өлкә арасында сых тарихи бағларын вә дәјәрләрин олдуғуну диггәтә чатдырыб. Назир Азәрбајҹанла енерҝетика саһәсиндә әлагәләрин инкишафында мараглы олдугларыны вә бу мүстәвидә иҹра олунан лајиһәләрин тезликлә баша чатдырылмасы, јени мүштәрәк лајиһәләрин нәзәрдән кечирилмәсинин зәрурилијини вурғулајыб. Рәһбәрлик етдији назирлијин Азәрбајҹанын аидијјәти гурумлары илә әмәкдашлығынын даһа да мөһкәмләнмәсиндә сәјләрин артырылмасынын өнәмини гејд едән Әли Әкбәр Меһрабиан ики өлкә арасындакы мүнасибәтләрин инкишафы наминә сәмәрәли хидмәти фәалијјәтиндә сәфир Әли Әлизадәјә уғурлар арзулајыб.
Азәрбајҹан Республикасынын Иранла чохшахәли әлагәләринин инкишафында енерҝетика саһәсинин дә апарыҹы ролунун олдуғуну гејд едән сәфир Әли Әлизадә иҹра олунан лајиһәләрин буну бир даһа тәсдиг етдијини билдириб. Иранла сәрһәддә 132 километр Азәрбајҹан әразиләринин ермәни ишғалындан азад олунмасынын јени реаллыглар вә әмәкдашлыг үчүн бир чох имканлар јаратдығыны вурғулајан сәфир Әли Әлизадә, һәјата кечирилән өнәмли лајиһәләриндән бири олан Худафәрин/Гыз галасы лајиһәләринин бунун тәзаһүрү олдуғуну вурғулајыб.
Ҝөрүшдә, һәмчинин ики өлкә арасында һәјата кечирилән һидроговшагларын вә су електрик стансијаларынын тикинтиси үзрә ишләр, еләҹә дә електрик енержиси дәһлизи лајиһәси вә диҝәр мүштәрәк лајиһәләрин иҹрасы, сәфәрләрин вә ҝөрүшләрин тәшкили, фәалијјәт ҝөстәрән Бирҝә Техники Комиссијанын иҹласларынын кечирилмәсинин давам етдирилмәси, һәмчинин гаршылыглы мараг доғуран диҝәр мәсәләләр әтрафында фикир мүбадиләси апарылыб.
Диггәт: Хәбәрдән Истифадә Етдикдә Мәнбәјә Истинад Лазымдыр!
