АБНА24 Хәбәр Верир, Азәрбајҹан Республикасынын Иран Ислам Республикасындакы сәфири Әли Әлизадә Иран Ислам Республикасынын Ислам Шурасы Мәҹлиси сәдиринин биринҹи мүавини, Иран-Азәрбајҹан парламентләрарасы достлуг групунун рәһбәри Әли Никзад илә ҝөрүшүб.
Ҝөрүшдә Азәрбајҹан Республикасынын 44-ҝүнлүк Вәтән мүһарибәсиндә газандығы гәләбәнин илдөнүмү мүнасибәтилә тәбрикләрини чатдыран Әли Никзад Азәрбајҹанын севинҹинин вә кәдәринин Иран үчүн дә бир олдуғуну гејд едиб.
Парламентләрарасы әлагәләрин өнәмини вурғулајан Әли Никзад һәмчинин Азәрбајҹанын Милли Мәҹлиси илә әлагәләрин даһа да мөһкәмләндирилмәсиндә сәјләрин артырылмасынын зәрурилијини вурғулајыб вә икитәрәфли әмәкдашлығын ҝүҹләнмәсинә парламент нүмајәндәләринин өз төвһәсини верәҹәјини диггәтә чатдырыб.
Сәфир Әли Әлизадә дә Азәрбајҹанын Иранла әлагәләрә хүсуси өнәм вердијини, Иранын Азәрбајҹан үчүн дост вә јахын гоншу өлкә олдуғуну билдириб. Азәрбајҹан-Иран парламентләрарасы мүнасибәтләрин, достлуг групларынын сәмәрәли әмәкдашлығынын әлагәләрин даһа да инкишафына зәмин јаратдығыны вә бу истигамәтдә Азәрбајҹанын Иран Ислам Республикасындакы Сәфирлијинин үзәринә дүшән вәзифәләри вә әлагәләндирмәләри јеринә јетирмәјә һәр заман һазыр олдуғуну билдириб.
Ҝөрүшдә ики өлкә арасында мүштәрәк лајиһәләрин иҹрасы, сәфәрләрин вә ҝөрүшләрин тәшкили, еләҹә дә гаршылыглы мараг доғуран диҝәр мәсәләләр әтрафында да фикир мүбадиләси апарылыб.
342/
5 dekabr 2021 - 16:36
Xəbər kodu: 1205520
Иран Ислам Республикасы парламентинин витсе-спикери Азәрбајҹанын Теһрандакы сәфирини гәбул едиб.
