АБНА24 Хәбәр Верир, Ливан Һизбуллаһынын команданы Имад Муғнијәнин Суријада террор едилмәсиндән 12 ил сонра, бу террор әмәлијјатында истифадә едилән партлајыҹы гурғуну һазырлајан шәхсин кимлији ифша едилиб. Әл-Мәјадин информасија каналы Исраил режиминин мәхфи информасијаларыны ифша етмәклә мәшғул олан "Тикун Олам" блогуна истинадла Имад Муғнијәнин террор едилмәсиндә истифадә едилән бомбанын Исраилин ҹасуслуг тәшкилаты Моссадын кечмиш рәис мүавини Ноам Ерез тәрәфиндән һазырландығыны билдириб. Тикун Олам Имад Муғнијәнин террор әмәлијјатынын АБШ-ын Мәркәзи Кәшфијјат Идарәси (ҸИА) илә Моссад тәрәфиндән бирҝә шәкилдә һәјата кечирилдијини дә гејд едиб. Тикун Олам даһа сонра Јуси Милменин әсәри олан "Мисилсиз Ҹасуслар" китабына истинадла билдирир ки, Моссад шәһид Имад Муғнијәнин јерини өјрәнмәк вә даһа сонра ону изләмәк үчүн бағланты јарадыб. АБШ исә партлајышын динҹ әһалијә зәрәр вермәмәси вә мәктәблиләрин ҝедиш-ҝәлиш саатына тәсадүф етмәмәси шәрти илә террор акты илә разылашыб. Бунун ардынҹа Моссад партлајыҹылар үзрә мүтәхәссисләриндән биринә әтрафдакы инсанлара зәрәр вермәјәҹәк вә садәҹә мүәјјән едилмиш һәдәфи вура биләҹәк бир бомба һазырламасына даир тапшырыг верир. "Мисилсиз Ҹасуслар" китабында бомбаны һазырлајан мүтәхәссисин ады там формада гејд олунса да, Исраилин һәрби сензура комитәси адын китабдан чыхарылмасы вә шәрти олараг "Н" адындан истифадәнин едилмәсинә иҹазә верир. Тикон Олам бу шәхсин Ноам Ерездән башгасы олмадығыны јазыр. Ноам Ерез о заман Моссад шефи олан Тамир Пардонун мүавини иди. "Тикон Олам" блогунун мәркәзи офиси Бирләшмиш Штатларда, Сиателдә јерләшир. Бу блог заман-заман Исраилин мәхфи мәлуматларыны ифша етмәклә мәшғулдур. Диҝәр тәрәфдән белә бир өнәмли информасијанын Исраилин һәрби вә тәһлүкәсизлик органларындан кәнара сызмасы ҹидди суаллара јол ачыб. Имад Муғнијә 2008-ҹи илин февралында Суријанын пајтахты Дәмәшгдә террор едилиб.
342/
