АБНА24 Хәбәр Верир, буну Русијанын Хариҹи Ишләр назири Серҝеј Лавров Москва Дөвләт Бејнәлхалг Мүнасибәтләр Институтунда чыхышы заманы билдириб. Русија Хариҹи Ишләр назири тәләбәләрә азәрбајҹанлы вә ермәни һәмкарлары Ҹејһун Бајрамов вә Зөһраб Мнатсаканјанла олан данышыглары барәдә сөз ачыб. "Биздә һәр ики тәрәфин вәзијјәтин нормаллашмасында, АТӘТ-ин Минск групу һәмсәдрләринин реҝионда тәшкил етдикләри ҝөрүшләрин бәрпасында мараглы олмаларына даир тәәссүрат вар", - дејә Русија ХИН рәһбәри вурғулајыб. О, һәмчинин гејд едиб ки, АТӘТ-ин Минск групунун һәмсәдр өлкәләринә (Русија, АБШ вә Франса) тәрәфләрин өзләринин һәртәрәфли мәгбул разылашмалары тапа биләҹәји лазыми атмосфери јаратмаг сәлаһијјәти верилиб: "Биз проблемин һәлли ссенарисинин јазылмасы илә мәшғул олмуруг, биз онларын өзләринин разылашмасы үчүн шәраит јарадырыг. Сон 18 илдә илк дәфә тәрәфләр арасында белә сәнәдләр һазырланырды. Аз иш ҝөрүлмәјиб. Орада БМТ Низамнамәси, һәм дә Һелсинки Јекун Актынын принсипләрини әкс етдирән принсипләр формалашдырылыб. Орада бу низамланманын баш тутмасы үчүн разылашдырылмалы олан конкрет параметрләр дә мүәјјәнләшдирилиб". Лавров вурғулајыб ки, сон вахтлар бир нечә инсидент баш вериб ки, бу да тәбии олараг ҝәрҝинлији чох ҹидди шәкилдә артырыб вә һәмсәдрләрин атмосфер јаратмагда мүвәффәг олма сәјләринә көмәк етмәјиб. Гејд едәк ки, ијулун 12-си ҝүнорта саатларындан етибарән Ермәнистан силаһлы гүввәләринин бөлмәләри Товуз рајонунун Азәрбајҹан-Ермәнистан дөвләт сәрһәдиндә атәшкәс режимини кобуд сурәтдә позараг Азәрбајҹан СГ-нин мөвгеләрини артиллерија гурғуларындан атәшә тутублар. Азәрбајҹан Ордусунун мөвгеләринин әлә кечирилмәси мәгсәдилә Ермәнистанын һәрби һиссәләри һүҹума кечмәјә ҹәһд ҝөстәриб. Ҹаваб тәдбирләри илә онлар итки верәрәк ҝери отурдулублар. Ермәниләрин һүҹумуну дәф едәркән АР СГ-нин мүддәтдән артыг хидмәт кечән һәрби гуллугчулары сержант Садыгов Вүгар Ләтиф оғлу, баш әсҝәр Мәммәдов Елшад Дөнмәз оғлу вә әсҝәр Дашдәмиров Хәјјам Мәһәммәд оғлу шәһид олублар. Ијулун 13-нә кечән ҝеҹә сәрһәддә вәзијјәт јенидән ҝәрҝинләшиб. Ермәнистанын силаһлы гүввәләри Товуз рајонунун Ағдам кәндини 120 мм-лик миномјотлардан атәшә тутуб. Азәрбајҹан ордусу артиллерија, миномјот вә танклары һәрәкәтә ҝәтирәрәк дәгиг атәшлә Ермәнистан СГ-нин һәрби һиссәсинин әразисиндә јерләшән дајаг мәнтәгәси, артиллерија гурғулары, автомобил техникасы вә ҹанлы гүввәсини мәһв едиб. Дөјүшләр заманы Азәрбајҹан ордусунун һәрбчиси, баш лејтенант Маһмудов Рәшад Рәшид оғлу шәһид олуб. Ијулун 14-ү сәһәр Азәрбајҹан ордусунун мөвгеләри вә јашајыш мәнтәгәләри јенидән атәшә тутулуб. Һүҹумун дәф едилмәси заманы ҝенерал-мајор Полад Һәшимов вә полковник Илгар Мирзәјев, мајорлар Намиг Әһмәдов вә Анар Новрузов, ҝизирләр Илгар Зејналлы вә Јашар Бабајев, мүддәтдән артыг хидмәт кечән Елчин Мустафазадә шәһид олублар. Ијулун 16-да Ермәнистан СГ Азәрбајҹан мөвгеләринә јенидән һүҹум етмәјә ҹәһд ҝөстәриб. Товуз рајонунун Дондар Гушчу, Ағдам вә Ваһидли кәндләри иричаплы силаһлардан вә миномјотлардан атәшә тутулуб. Дөјүшләр заманы һәрбчимиз, мүддәтдән артыг һәрби хидмәт кечән әсҝәр Исмајылов Назим Әфган оғлу шәһид олуб.
342/
