АБНА24 Хәбәр Верир, бу барәдә Беларус Дахили Ишләр Назирлијинин мәтбуат катиби Олга Чемоданова өзүнүн “Телеҝрам” каналында ачыглама вериб. “Хүсуси тәјинатлыларла гаршыдурма заманы мејданы јармаг үчүн ҝәлән етиразчылардан бири намәлум партлајыҹы гурғуну һүгуг-мүһафизә органларынын әмәкдашларына доғру атмаға чалышыб. Бу вахт гурғу онун әлиндә партлајыб вә онун өлүмү илә нәтиҹәләниб”, - дејә мәлуматда билдирилиб. Гејд едәк ки, Беларус пајтахтында етиразлар тәхминән дөрд саатдыр давам едир. Күчәләрдә асајиш гајдаларыны сәрт шәкилдә горумаға чалышан һүгуг-мүһафизә органларына гаршы мүгавимәт оҹаглары Минскин үч рајонунда – метронун “Пушкинскаја” стансијасынын јахынлығында, Горки паркы бөлҝәсиндә вә Бангалор мејданында галыб. Тәһлүкәсизлик гүввәләри хүсуси васитәләрдән – ҝөзјашардыҹы газдан вә ишыгсачан гумбаралардан истифадә едир. Өлкәнин һүгуг-мүһафизә органлары Минскин мәркәзиндәки Победителеј проспектиндә топлашан етиразчыларын һәбсинә башлајыб. Полис машынлары издиһама јахынлашыр вә тәһлүкәсизлик гүввәләри етиразчылары дәрһал автомобилләрә сохур. Әразидә хүсуси аваданлыглардан, еләҹә дә су шырнагларындан да истифадә едилир. Республиканын Дахили Ишләр Назирлији вәзијјәтин нәзарәт алтында олдуғуну билдириб. “Сахланыланлар вар, анҹаг һәләлик онларын сајыны дејә билмәрәм. ДИН-ин әмәлијјат-нәзарәт гәрарҝаһы ишини ҝөрүр, вәзијјәт нәзарәтдәдир”, - дејә ДИН-ин мәтбуат катиби О.Чемоданова билдириб. Хатырладаг ки, Беларусда августун 9-да кечирилмиш президент сечкиләри илә әлагәдар екзитпол нәтиҹәләри ачыгландыгдан сонра пајтахт Минскин мәркәзиндә вә республиканын бир сыра диҝәр шәһәрләриндә һүгуг-мүһафизә органлары әмәкдашлары илә тоггушмаларла мүшаһидә едилән күтләви етиразлар башлајыб. Нәтиҹәдә, Дахили Ишләр Назирлијинин мәлуматына ҝөрә, 3 минә јахын инсан тутулуб, онларла полис әмәкдашы вә нүмајишчи јараланыб.
342/
