Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Нардаран мәһбусу Аббас Һүсејнин сәһһәтиндә проблем јараныб. Бу барәдә онун анасы Vetenugrunda.az-а данышыб.
Сијаси мәһбусун анасы Рәһимә Һүсејнова билдириб ки, һазырда 8 сајлы ҹәзачәкмә мүәссисәсиндә сахланан оғлунун ајағы шишиб, гзыдырмасы дүшмүр: "Аббасын ајағы әмәлијјат олундугдан сонра шиш әмәлә ҝәлиб. Бир нечә дәфә шишдән су чәкибләр, амма фајдасы олмајыб. Шиш јенә дә бөјүјүр, Аббасын гыздырмасы дүшмүр. Аббасын башында да шиш әмәлә ҝәлиб. Һамысы ишҝәнҹә заманы алдығы зәрбәләрдән јараныб".
Р.Һүсејнованын вердији хәбәрә ҝөрә, оғлуна истинтаг заманы вә зинданда чох ағыр ишҝәнҹәләр верилиб. Бу ишҝәнҹәләр исә Аббасын бүтүн сағламлығыны сырадан чыхарыб: "Аббаса Гобустан һәбсханасында һәбсхананын рәиси Афтандил Ағајев чох ағыр ишҝәнҹә вермишди. О гәдәр дөјдүрмүшдү ки, нечә ҝүн һушсуз галмышды. Афтандил Ағајев шәхсән өзү дөјмүшдү Аббасы. Сонра ону Күрдәханы тәҹридханасына көчүрдүләр. Күрдәханыда Аббаса мүнасибәт нормал иди. Аббасын ајағы шишиб гаралдығына ҝөрә ону Пенитенсиар Хидмәтин Мүалиҹә Мүәссисәсинә апардылар. Ордан да 8 сајлы ҹәзачәкмә мүәссисәсинә көчүрдүләр. Инди дә Аббас орда сахланылыр. Инди лазымдыр ки, ајағы мүалиҹә олунсун. Анҹаг онун сахландығы мүәссисәдә бу саһә үзрә һәким јохдур, Мүалиҹә Мүәссисәсинә дә көчүрмүрләр. Һәким дејир ки, тәҹили Мүалиҹә Мүәссисәсинә дә көчүрүлмәлидир".
ЈАДДАШ
Аббас Һүсејнов 2015-ҹи ил нојабрын 26-да Нардаранда алты нәфәрин өлүмү илә нәтиҹәләнмиш полис әмәлијјаты нәтиҹәсиндә һәбс олунуб. Мүсәлман Билрији Һәрәкатынын сәдри, илаһијјатчы Тале Бағырзадә вә Нардаран һадисәләринә ҝөрә һәбс олунмуш даһа 16 нәфәрлә бирликдә Бакы Ағыр Ҹинајәтләр Мәһкәмәсиндә мүһакимә олунан Аббас Һүсејнов 20 ил азадлыгдан мәһрум едилиб. Амма Аббас иттиһамлары гәбул етмир. Әмәлијјатда икиси полис олмагла, өлдүрүлән алты нәфәрин һамысынын әмәлијјаты кечирән полисләрин өзләри тәрәфиндән гәтлә јетирилдијини, өзләринин исә евдә намаз гыларкән һүҹума мәзру галдыгларыны, онларын һеч бириндә силаһ олмадығы вә иттиһамларын гурама олдуғуну билдирир.
Гејд едәк ки, Аббас Һүсејн 2017-ҹи илдә һәбсханада баш верән ганунсузлуглара етираз етдијинә ҝөрә сахландығы Гобустан гапалы һәбсханасында чармыха чәкилиб. Гобустан һәбсханасынын рәһбәрлији ону јајын гызмар ҝүнәши алтында голларыны вә ајагларыны дәмирә бағлајараг ишҝәнҹә вериб. О, бу барәдә вәкили Јалчын Иманова мәлумат вериб. Јалчын Иманов бу дәһшәтли ишҝәнҹә фактыны мәтбуата чыхарыб иҹтимаиләшдирдији үчүн ону Вәкилләр Коллеҝијасындан узаглашдырмагла вәкиллик фәалијјәтинә сон гојдулар. Лакин Аббасын зиндандакы ишҝәнҹәләри һәлә дә давам етдирилир.
Диггәт: Хәбәрдән истифадә етдикдә мәнбәјә истинад лазымдыр
