Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Азәрбајҹан Республикасы Хариҹи Ишләр Назирлијинин Мәтбуат Хидмәти идарәси Азәрбајҹанын 1994-ҹү ил 4 мај тарихиндә НАТО-нун Сүлһ наминә Тәрәфдашлыг програмына гошулмасынын 25 иллијинә даир мәлумат јајыб.
Мәлуматда 25 ил бундан өнҹә бу ҝүн Азәрбајҹан Республикасынын Шимали Атлантика Мүгавиләси Тәшкилатынын (НАТО) Сүлһ наминә Тәрәфдашлыг програмына гошулдуғу дејилир:
“1994-ҹү илин 4 мај тарихиндә Үмуммилли лидер Һејдәр Әлијев НАТО-нун мәнзил-гәрарҝаһыны зијарәт етди вә Сүлһ наминә Тәрәфдашлыг (СНТ) Чәрчивә сәнәдини имзалады. Һәмин вахтдан етибарән Азәрбајҹан Алјанс илә мөһкәм вә гаршылыглы фајдалы тәрәфдашлыг гуруб.
НАТО илә әмәкдашлыг Азәрбајҹанын хариҹи вә тәһлүкәсизлик сијасәтинин ваҹиб истигамәтләриндән биридир. Азәрбајҹан НАТО илә тәрәфдашлығыны бүтүн Авро-Атлантик мәканында тәһлүкәсизлик, сабитлик вә тәрәггијә төһфә вермәк васитәси кими ҝөрүр.
СНТ програмы шүбһәсиз ки, Алјансын ән уғурлу програмларындан биридир вә Азәрбајҹан Авро-Атлантик тәһлүкәсизлијин мөһкәмләндирилмәсиндә онун ролуну мүсбәт гијмәтләндирир.
НАТО илә 25 иллик әмәкдашлыг СНТ Чәрчивә Сәнәдинин вә БМТ Низамнамәсинин ортаг дәјәр вә принсипләринә, әләлхүсус дөвләтләрин сијаси мүстәгиллији, суверенлији вә әрази бүтөвлүјүнә һөрмәт едилмәси өһдәлијинә сөјкәниб.
Азәрбајҹан НАТО мүттәфиг өлкәләри тәрәфиндән тәрәфдашлығымызын башланғыҹындан бәри зирвә бәјаннамәләриндә гејд едилдији кими, Азәрбајҹан Республикасынын әрази бүтөвлүјүнә, мүстәгиллијинә вә суверенлијинә вә мүнагишәнин мәһз бу принсипләр әсасында һәллинә давамлы дәстәк нүмајиш олунмасыны алгышлајыр.
Азәрбајҹан НАТО илә гаршылыглы мараг доғуран бир чох мәсәләләр илә бағлы мүнтәзәм сијаси диалога бөјүк өнәм верир вә Алјанс илә мүхтәлиф мәсәләләр, хүсусилә дә сүлһмәрамлы әмәлијјатлар вә мүдафиә ислаһатлары үзрә практики әмәкдашлығы јүксәк дәјәрләндирир.
Азәрбајҹан вә НАТО сүлһмәрамлы әмәлијјатлар саһәсиндә мөһкәм тәрәфдашлыға маликдир. Азәрбајҹан НАТО-нун рәһбәрлик етдији вә БМТ Тәһлүкәсизлик Шурасынын мандаты әсасында фәалијјәт ҝөстәрән сүлһмәрамлы әмәлијјатлара илк төһфә верән өлкәләрдәндир. Һал-һазырда Азәрбајҹан Әфганыстанда НАТО миссијасына орду бирләшмәләри илә төһфә верир вә миссијаја дәстәк олараг өзүнүн һава мәканындан вә јерүстү коммуникасија хәттләриндән истифадәјә имкан јарадыр. Азәрбајҹан, һәмчинин әфган тәһлүкәсизлик гүввәләринин тәлиминә мүһүм малијјә дәстәјини тәмин едир.
Азәрбајҹан Авро-Атлантика әразисиндә вә онун һүдудларындан кәнарда сүлһ вә тәһлүкәсизлијин горунмасы мәгсәдилә Сүлһ наминә Тәрәфдашлыг чәрчивәсиндә әлдә етдији наилијјәтләрә әсасланараг вә онун принсипләринә вә мәгсәдләринә ујғун олараг, НАТО илә ишләмәјә давам етмәкдә гәтијјәтлидир” - дејә гејд олунуб.
Диггәт: Хәбәрдән истифадә етдикдә мәнбәјә истинад лазымдыр
