Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, АТӘТ-ин Минск Групунун һәмсәдрләри Ендрју Шофер (АБШ), Стефан Висконти (Франса) вә Игор Попов (Русија) Азәрбајҹан вә Ермәнистан лидерләринин ҝөзләнилән ҝөрүшүнә даир бәјанат јајыб.
Бәјанатын мәтни АТӘТ-ин сајтында дәрҹ олунуб.
Бәјанатда билдирилиб ки, һәмсәдрләр Азәрбајҹан президенти Илһам Әлијев вә Ермәнистан баш назири Никол Пашинјанын јахын заманда ҝөрүшмәк гәрарыны алгышлајыр.
Гејд едилиб ки, бу ҝөрүшә һазырлыгларла әлагәдар һәмсәдрләр һәр ики өлкәнин хариҹи ишләр назирлији илә сых әмәкдашлыг едир. Бу ҝөрүш ики өлкә лидерләри арасындакы илк тәмас олаҹаг.
Һәмсәдрләр сон вахтлар ҹәбһә хәттиндәки сабитлији јүксәк гијмәтләндириб, һәмчинин, әһалинин сүлһә һазырланмасы илә бағлы реҝионда апарылан аддымлары алгышлајыр вә тәрәфләри бу ҹүр сәјләри артырмаға чағырыб. Ејни заманда, һәмсәдрләр реҝионда ҝәрҝинлијин азалдылмасынын әһәмијјәтини вурғулајыблар.
Һәмсәдрләр бәјанатда тәрәфләри мөвҹуд вәзијјәтдә дәјишиклик јарада биләҹәк ачыгламалардан вә һәрәкәтләрдән, ҝәләҹәк данышыглар үчүн шәртләр ирәли сүрмәкдән вә диҝәр тәрәфин разылығы олмадан формата дәјишикликләр тәләб етмәкдән вә актив һәрби дөјүшләри бәрпа етмәк чағырышындан јајынмаға сәсләјиб.
Бәјанатда Дағлыг Гарабағ мүнагишәсинин әдаләтли вә давамлы һәллинин Һелсинки Јекун Актынын мүддәаларына әсасланмасынын ваҹиблији вурғуланыб.
Бунунла јанашы, сәнәддә һәмсәдрләрин Азәрбајҹан вә Ермәнистан лидерләри вә хариҹи ишләр назирләри илә истәнилән вахт ҝөрүшмәјә һазыр олдуглары диггәтә чатдырылыб.
Һәмчинин, һәмсәдрләр мандатларына ујғун олараг мүнагишәнин динҹ јолла һәлл олунмасы үчүн тәрәфләрә көмәк етмәк мәрамына там садиг олдугларыны диггәтә чатдырыблар.
Самир Исајев
Диггәт: Хәбәрдән истифадә етдикдә мәнбәјә истинад лазымдыр
