Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Пенитенсиар Хидмәтин 14 сајлы Ҹәзачәкмә Мүәссисәсиндә сахланылан М.Һүсејнов бу ҝүн ҹәза мүддәтинин битмәси илә әлагәдар азадлыға бурахылыб.
О, анасы Фирәнҝиз Һүсејнованын вә 14 ил әввәл мартын 2-дә өлдүрүлән журналист Елмар Һүсејновун гәбрини зијарәт едиб.
Хатырладаг ки, М.Һүсејнов 2017-ҹи илин мартын 3-дән һәбсдәдир. О, Сураханы Рајон Мәһкәмәсинин гәрары илә 2 ил мүддәтинә азадлыгдан мәһрум едилиб. Гәрар Нәсими рајон Полис Идарәсинин рәиси Муса Мусајевин хүсуси иттиһам гајдасында етдији шикајәт әсасында чыхарылыб. Блоггер Ҹинајәт Мәҹәлләсинин 147.2-ҹи (бөһтан, ағыр вә ја хүсусилә ағыр ҹинајәтдә иттиһам етмәклә бөһтан атма) маддәси илә иттиһам олунуб.
Өтән ил декабрын декабрын 26-да исә Пенитенсиар Хидмәт ачыглама јајараг билдириб ки, 14 сајлы ҹәзачәкмә мүәссисәсиндә план үзрә апарылан нөвбәти үмуми ахтарыш-бахыш тәдбирләри заманы мәһкум Һүсејнов Меһман Рафиг оғлу мүәссисәнин Режим-нәзарәт шөбәсинин бөјүк инспектору, әдлијјә лејтенанты Абдалов Әли Әләддин оғлунун гануни тәләбләринә табе олмајараг она гаршы зор тәтбиг едиб, физики мүгавимәт ҝөстәрәрәк сонунҹуја бәдән хәсарәти јетириб, хидмәти отагда олан әшјалары дағыдараг сындырыб. Бу фактла бағлы Бакы шәһәри Гарадағ Рајон Прокурорлуғунда Ҹинајәт Мәҹәлләсинин 315.2-ҹи маддәси (һакимијјәт нүмајәндәсинә хидмәти вәзифәләрини јеринә јетирәркән һәјат вә сағламлыг үчүн тәһлүкәли олан зор тәтбиг етмәклә мүгавимәт ҝөстәрмә) илә ҹинајәт иши башланмышды.
Бир груп һүгуг мүдафиәчиси, еләҹә дә Пенитенсиар Хидмәтин 14 сајлы ҹәзачәкмә мүәссисәсиндә ҹәза чәкән Меһман Һүсејнов онун барәсиндә апарылан истинтагын објективлијинин тәмин едилмәси үчүн дөвләт башчысына мүраҹиәт едиб.
Президент Илһам Әлијев һәмин мүраҹиәтләри нәзәрә алыб вә ҹинајәт иши үзрә арашдырманын објектив апарылмасы, әдаләтли вә һуманист гәрар гәбул олунмасы үчүн ганунла нәзәрдә тутулмуш бүтүн зәрури тәдбирләрин ҝөрүлмәсини Баш прокурора төвсијә едиб.
Президентин төвсијәләринә ујғун олараг Баш прокурор тәрәфиндән истинтаг органына М.Һүсејновун барәсиндә һазырда истинтаг олунан ҹинајәт иши үзрә мүвафиг тапшырыглар верилиб.
Истинтаг органы тәрәфиндән М.Һүсејновун ҝәнҹ олдуғу, ҹәза чәкдији мүддәтдә интизам мәсулијјәтинә ҹәлб едилмәдији, ислаһ олунма јолуна гәдәм гојдуғу, аиләсиндә гајғыја еһтијаҹы олан јашлы вә тәк јашајан атасынын олдуғу, төрәтдији ҹинајәтин аз ағыр ҹинајәтләр категоријасына аид олмагла, һазырда онун әмәлинин вә шәхсијјәтинин ҹәмијјәт үчүн тәһлүкәли олмадығы нәзәрә алынараг, М.Һүсејнов барәсиндәки ҹинајәт ишинин иҹраатына хитам верилиб.
Диггәт: Хәбәрдән истифадә етдикдә мәнбәјә истинад лазымдыр
