Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Иран Ислам Республикасы, Русија Федерасијасы вә Азәрбајҹан Республикасы президентләринин Теһран иҹласы дүнән ҝеҹә мүштәрәк бәјанатла сона чатыб.
ИРНА-нын вердији мәлумата ҝөрә, бәјанат имзаланмагдан өнҹә ИИР президенти Азәрбајҹан вә Русијалы һәмкарлары илә бирҝә мәтбуат конфрансында етдији чыхышында Бакыда үч өлкә башчыларынын илк иҹласынын гаршыја гојдуғу мәгсәдләрин реаллашмасындан хәбәр вериб вә дејиб: Иран Ислам Республикасы, Азәрбајҹан вә Русија Федерасијасы бејнәлхалг шимал-ҹәнуб коридору васитәси илә Авропа вә Асија гитәләрини бири-биринә говушдурмаг нијјәтиндәдирләр.
2016-ҹи ил август ајында кечирилән Бакы иҹласында үч өлкә башчылары ҝениш реҝионал мәсәләләрдән әлавә шимал-ҹәнуб нәглијјат коридору, енержи сектору, нефт вә газ әмәкдашлыглары еләҹә дә игтисади әмәкдашлыгларын инкишафы үчүн ҝедишатын механизми барәдә разылыға ҝәлдиләр.
Руһани Теһран иҹласынын игтисади гәрарларына да тохунуб вә дејиб: Үч өлкә даһа әлверишли банк әлагәләрини вә ики јахуд үчтәрәфли тиҹарәтдә милли валјуталарындан истифадәни планлашдырырлар.
Иран Ислам Республикасы президенти һәр бир үчтәрәфли иҹласын Теһран, Москва вә Бакы арасында әлавә әмәкдашлыглар үчүн јени аддым олдуғуну билдирәрәк ҝәлән ил Москвада кечириләҹәк иҹласда үчтәрәфли әлагәләрин ҝенишләндирилмәси истигамәтиндә бөјүк аддымлар атылаҹағына үмидвар олдуғуну дејиб.
ИИР, Русија вә Азәрбајҹан президентләринин икинҹи үчтәрәфли иҹласы дүнән Теһранда кечирилди.
Үчүнҹү үчтәрәфли ҝөрүш исә ҝәлән милад илиндә Москвада кечириләҹәк.
Диггәт: Хәбәрдән истифадә етдикдә мәнбәјә истинад лазымдыр
