''Нардаран иши'': Сөјүлмәкдәнсә, он ил јатмағы үстүн тутурам

Әһлибејт (ә) Хәбәр Аҝентлијинин мејдан тв -јә истинадән вердији хәбәрә ҝөрә - Октјабрын 6-да Бакы Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын сәдр мүавини Елчин Гасымов вә даһа 11 нәфәр - Наһид Гәһрәманов, Аға-Әли Јәһјајев, Сејфәддин Ширванов, Фәрһад Мурадов, Рамил Әлијев, Елҝүн Ахундов, Вүсал Алыш, Иса Ибраһимов, Сејмур Асланов, Әли Шаһбазов вә Әмирли Әлијевин мәһкәмә просеси кечирилиб.

Баш Мүтәшәккил Ҹинајәткарлыгла Мүбаризә Идарәсинин әмәкдашы Камил Мәммәдов дејиб ки, Әли Шаһбазовла Әмирәли Әлијевин евиндә кечирилән ахтарышда иштирак едиб. Онлардан силаһ вә Талеһ Бағырзадәнин мүраҹиәт китабчасы олдуғу иддиа едилән китабчанын тапылдығыны дејән шаһид һәр шеји олдуғу кими данышдығыны билдириб.

Әмирәли Әлијев исә билдириб ки, онда силаһ вә китабча олмајыб:

"Һәмин вахт Нардаранда әмәлијјат кечирилмишди, һәр јердә полис вар иди. Силаһ олсајды, апарыб һәјәтдәки гујуја атардым. Мән о китабы һеч вахт ҝөрмәмишәм. Мәним өвладларымы һәбс етмишдиләр. Дедим: "Онлары бурахын, мәни һәбс един, бир силаһ иттиһамы верәрсиниз". Онлар да разылашдылар. Мәнә он ил дә версәләр, јалан даныша билмәрәм".

Иҹласда ифадә верән БМҸМИ-нин диҝәр әмәкдашы Рамил Сәлимов исә Иса Ибраһимовла Рамил Әлијевин евиндә ахтарышда иштирак етдијини, онлардан силаһ тапылдығыны дејиб. Иса Ибраһимов исә дејиб ки, ону аиләси илә һәдәләјибләр:

"Мәнә дедиләр: “Сәни бурахсаг, атаны һәбс едәҹәјик”. Мән дә буна разы олмадым. Дедиләр: "Јаз ки, гәбирсанлыгдан силаһ тапмысан". Мән дә дедикләрини етдим”.

О, евиндә силаһ олмадығыны, силаһы полисләрин гојдуғуну дејиб.

Рамил Әлијев исә дејиб ки, ону сахлајанда полисләрлә шәрт кәсиб:

"Дедим ки, ҝедәк евә бахын, амма киши кими ахтарын. Онлар да истеһза илә дедиләр ки, елә едәҹәјик. Протоколу да евдә јох, полис шөбәсиндә јаздылар. Мәнә дедиләр јаз ки, зибилликдән силаһ тапмысан. Мән дә разылашдым. Сөјүлмәкдәнсә, он ил јатмағы үстүн тутурам. Мән бурадан азад олмаг үчүн данышмырам. Садәҹә һәгигәт нәдир ону дејирәм. Бизим бурадан дүшмәјимиз кимдәнсә асылы дејил. Аллаһ белә мәсләһәт билиб. Аллаһ да бизи бурадан чыхараҹаг. Сизи Аллаһа тапшырмышам ".

Иҹласда Аға-әли Јәһјајевин евиндә ахтарыш заманы һал шаһиди кими иштирак едән Рәшад Вердијев дә ифадә вериб. О да евиндән силаһ чыхдығыны дејиб.

А.Јәһјајев исә дејиб ки, онлары Талеһ Бағырзадәјә ҝөрә һәбс едибләр:

"Бизи террорчу кими гәләмә верирләр. Лакин ҹәмијјәтдә биздән зијансыз адам јохдур. Аллаһымыз бизи горујур".

Тәгсирләндирилән Наһид Гәһрәманов исә дејиб ки, онларын һеч киминлә дүшмәнчилији јохдур:

"Бизим нә шаһидлә, нә һакимлә дүшмәнчилијимиз вар. Бизим дүшмәнчилијимиз мәктәбдә һиҹабы гадаған едәнләдир. Авропада һејванларын да һүгуглары горунур. Азәрбајҹанда ҝүнаһсыз инсанлара белә ағыр иттиһам верилир. Азәрбајҹанда мәһкәмә јохдур. Биз билирик јухарыдан нә десәләр, ону едәҹәксиниз. Нә гәдәр ҹәза верәҹәјинизи дә билирик. Бизим вәкилимиз Аллаһдыр".