Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, вәкил Јалчын Иманов бу ҝүн 12 сајлы Ҹәза Чәкмә Мүәссисәсиндә АИП лидери Мөвсүм Сәмәдовла ҝөрүшүб.
Вәкилин сөзләринә ҝөрә, 12 сајлы ҸЧМ-нин рәһбәрлији Мөвсүм Сәмәдовун јенидән “крити”јә (Гапалы Типли Һәбсхана) ҝөндәрилмәси илә бағлы мәһкәмәјә мүраҹиәт едиб. Мүраҹиәтин мәһкәмәјә дүнән ҝөндәрилдијини сөјләјән Јалчын Иманов, мәһкәмәнин мүраҹиәтә нә вахт бахаҹағынын исә бәлли олмадығыны билдирди.
“Мај ајынын 21-и Доктор Сәмәдовун јарым карс типли ҹәза мүддәти баша чатмасына бахмајараг, она билдирибләр ки, һәбсханада һәјатыныз үчүн тәһлүкә олдуғуна ҝөрә тәһлүкәсиз сахланма шәраитинә кечирилирсән. Ҝуја ки, һәбсханада Мөвсүм Сәмәдовун шәхсијјәтинә сағламлығына вә тәһлүкәсизлијинә диҝәр мәһбуслар тәрәфиндән тәһлүкә јарана биләр. Бу тәдбир јалныз мәһбусун өз әризәси илә һәјата кечирилә биләрди ки, Мөвсүм Сәмәдов да нә јазылы, нә дә ки, шифаһи формада белә бир мүраҹиәт үнванлајыб. О, өзүнә гаршы һәр һансы бир тәһлүкә һисс етмәдијини сөјләди.”
Вәкил ону да гејд етди ки, Мөвсүм Сәмәдов баш верәнләри ҸЧМ-нин рәһбәрлијинин өз фәалијјәти кими гијмәтләндирир:
“Мүәссисә рәһбәрлији илә ҝөрүш заманы мәнә билдирдиләр ки, онлар Әмәлијјат Апаратындан дахил олмуш мәлумат әсасында белә бир аддым атыблар. Ҝуја ки, Мөвсүм Сәмәдовун һәјаты үчүн тәһлүкә вар. Ганунсузлуг бундан ибарәтдир ки, һәбсхана рәһбәрлији Мөвсүм Сәмәдову хүсуси мүһафизә типли отаға кечирдији ҝүн, паралел олараг Гапалы Типли Һәбсханаја ҝөндәрмәк барәдә мәһкәмәјә мүраҹиәт едиб. Ејни заманда мүәссисә рәһбәрлији Мөвсүм Сәмәдова онун зон үчүн тәһлүкәли олдуғуну сөјләјиб. Сәбәб исә Доктор Сәмәдовун мәһбуслар арасында Илаһи вә әхлаги дәјәрләри јајмасыдыр.”
Вәкилин сөзләринә ҝөрә, Мөвсүм Сәмәдов баш верәнләри әввәлҹәдән һазырланмыш ссенаринин тәркиб һиссәси олдуғу гәнаәтиндәдир: “Мөвсүм Сәмәдов билдирди ки, 12 сајлы ҸЧМ-нә ҝәлдији ҝүндән она гаршы баш верәнләр ону јенидән Гапалы Типли Һәбсханаја ҝөндәрмәк үчүн иди. Мәнә гаршы баш верәнләрин һамысы ганунсуз, шәр вә бөһтандыр. Доктор Сәмәдов ону да хатырлатды ки, онун үчүн һәбсханаларын фәрги јохдур. Истәр гапалы олсун истәрсә дә ачыг.”
Сонда Јалчын Иманов гејд етди ки, Мөвсүм Сәмәдовун ајағында дамар ҝенишләнмәси хәстәлији вар вә гапалы һәбсхана шәраити мүвәккилинин сәһһәтинә мәнфи тәсир ҝөстәрәҹәк: “Чүнки дамар ҝенишләнмәсиндән әзијјәт чәкән инсанларын даима һәрәкәтдә олмаларына еһтијаҹ вардыр ки, Гапалы Типли Һәбсхана шәраитиндә бу мүмкүн дејил.”
Диггәт: Хәбәрдән истифадә етдикдә мәнбәјә истинад лазымдыр
