Әһлибејт (ә) Хәбәр Аҝентлији-Апрелин 10-да Ләнкәран рајонундакы Полис Шөбәсинин мүвәггәти сахлама камерасында интиһар һадисәсинин баш вердији дејилир.
“Репорт” јазыр ки, сојғунчулуг мәгсәдилә евә басгын едәрәк ев саһибинә өлүмлә нәтиҹәләнән хәсарәт јетирмәкдә шүбһәли билинәрәк сахланылан Холмили кәнд сакини, 40 јашлы Фаил Һүсејнов полис капитаны Фуад Нуруллајевә мәхсус хидмәти тапанчадан ачылан атәшдән өлүб.
Дахили Ишләр Назирлијинин мәтбуат хидмәтиндән Лент.аз-а һадисәнин ҝеҹә саат 03 радәләриндә баш вердији дејилиб:
“Фаил Һүсејнов полис әмәкдашындан су истәјиб. Шүбһәли шәхсә су верәркән Ф.Һүсејнов гәфил һүҹум едәрәк полисин силаһыны ҝөтүрүб вә өзүнә атәш ачараг интиһар едиб”.
Фактла бағлы Ләнкәран Рајон Прокурорлуғунда арашдырма апарылыр.
Евә басгын һадисәси мартын 18-дә, Холмили кәндиндә баш вериб. 67 јашлы кәнд сакини Сәфәров Ваһаб Халыг оғлу баш наһијәсиндән ағыр хәсарәт алараг дүнјасыны дәјишиб. О, узун илләр кәнд амбулаторијасынын мүдири вәзифәсиндә ишләјиб.
Даһа өнҹә дә Азәрбајҹанын мүхтәлиф бөлҝәләриндәки полис бөлмәләриндә өлүм һадисәләри олуб.
Мартын 27-си Ҝоранбој шәһәр сакини Рәшад Гарајев полис шөбәсиндә ифадә верәркән сәһһәти гәфил писләшиб вә ҝөстәрилән тибби јардыма бахмајараг вәфат етмишди.
2 ил өнҹә Минҝәчевир шәһәриндә 27 јашлы Бәһруз Һаҹыјевин полис бөлмәсиндә дөјүләрәк гәтлә јетирилдијини иддиа едилирди. Полис исә онун ифадә просесиндә өзүнү пәнҹәрәдән атдығыны сөјләјирди.
Елә прокурорлугдакы арашдырманын сонунда да ҝәнҹин гоһумларынын иддиаларынын тәсдигләнмәдији ачыгланды. Бәһруз Һаҹыјевин атасы оғлунун өлүмүнүн ҝерчәк сәбәбләринин өрт-басдыр едилдијини дејирди.
Бир мүддәт өнҹә исә Ләнкәран рајонунун Шүрүк кәнд сакини, әслән Фүзули рајонундан мәҹбури көчкүн, 46 јашлы Јагут Әлијева Рајон Полис Идарәсиндә дәһшәтли ишҝәнҹәләрә мәруз галдығыны сөјләмишди. О, бөлмәдә етмәдији ҹинајәти бојнуна гојмаг үчүн дөјүлдүјүнү дејирди. Јагут Әлијева даһа сонра полис идарәсиндә намусуна тохунаҹагларындан еһтијат едәрәк, өзүнү 3 мәртәбәдән атмышды
