Әһлибејт (ә) Хәбәр Аҝентлији- Тәгсирләндирилән шәхсләр, јаланчы шаһидләрин јалан данышмагларына етираз етди.
Апрелин 10-да Бакы Ағыр Ҹинајәтләр Мәһкәмәсиндә Нардаран һадисәләриндән сонра һәбс едилән илаһијјатчы Зүлфүгар Микајылов, Елман Ағајев, Фаиг Аллаһвердијев, Меһман Гулијев, Меһман Мәммәдов, Елдар Бүнјатов, Елхан Һәсәнов, Мүбариз Ибраһимов, Әли Һүсејнов, Рамил Сејфуллајев, Рузи Исмајылов вә Ҹабир Әлијевин ҹинајәт иши үзрә мәһкәмә просеси давам едиб.
Мејдан ТВ-нин мәлуматына ҝөрә, һаким Зејнал Ағајевин сәдрлик етдији иҹласа тәгсирләндирилән шәхсләрдән бәзиләринин вәкилләри ҝеҹ ҝәлибләр. Һаким Зејнал Ағајев бунунла бағлы вәкилләрә ирадыны билдириб. Гејд едиб ки, вәкилләрин интизамсылығы барәсиндә Вәкилләр Коллеҝијасына мүраҹиәт едиләҹәк. Иҹласда Әли Һүсејновун вәкили Зибејдә Садыгова вәсатәтлә чыхыш едиб. Билдириб ки, мүвәккили бир сыра хәстәликдән әзијјәт чәкир. З.Садыгова Әли Һүсејновун барәсиндә сечилмиш һәбс-гәтимкан тәдбиринин ев дустаглығы илә әвәз едилмәси барәдә вәсатәт вериб. Дөвләт иттиһамчысы исә вәсатәти әсассыз һедаб едиб. Прокурор гејд едиб ки, мүалиҹә мүәссисәсиндә мәһкумлара һәр бир шәраит јарадылыб. Мәһкәмә вәсатәти тәмин етмәјиб.
"Виҹданын гаршысында ҹаваб верәҹәксән"
Просесдә шаһид гисминдә ифадә верән Емин Сәфәров суаллары ҹавабландырыб. О, суалларын чохуна "хатырламырам" ҹавабыны вериб. Буну онунла әсасландырыб ки, әмәлијјатын үзәриндән ики ил кечдији үчүн бәзи мәсәләләр јадындан чыхыб. Зүлфүгар Микајылов исә шаһидә дејиб ки, о, виҹданы гаршысында ҹаваб вермәли олаҹаг: "Ҹаван оғлансан, буну сәнә јарашдырмырам. Биз бурадан чыхаҹағыг, анҹаг сән виҹданын гаршысында ҹаваб верәҹәксән. Әмәлијјата рәһбәрлији сән етмирдин. Башга бир әмәлијјатчы рәһбәрлик едирди. Мәни евимин гаршысында јох, машынын јанында тутублар. Онун дедикләрини һамысы јаландыр. Шаһиди башга јердән ҝәтирилди. Гоншулардан шаһид ола биләрди. Сиз өзүнүзлә ҝәтирдијиниз шаһидләрин бәрәсинә Баш Мүтәшәккил Ҹинајәткарлыгла Мүбаризә Идарәсиндә беш манат верәндә мән ҝөрдүм. Тапанчаны өзләри мәним үзәримә гојуб, ҝөтүрдүләр. Евдә јүз манатым вар иди, ону да ҝөтүрдүләр. Әмәлијјат заманы јолдашым вә балаҹа гызым да евдә иди. Онлар ағлајырдылар".
"Евдән Талеһ Бағырзадәнин китабы чыхды"
Иҹласда Баш Мүтәшәккил Ҹинајәткарлыгла Мүбаризә Идарәсинин әмәкдашы Һәтәм Әлијев дә ифадә вериб. О да охшар ифадә вериб. Билдириб ки, Х.Микајылову сахлајыблар вә онун евинә бахыш кечирибләр. Бахыш заманы силаһ вә Т.Бағырзадәнин китабчалары тапылыб. Даһа сонра суаллары ҹавабландыран Һ. Әлијев суалларын чохуна "хатырламырам" ҹавабыны вериб. Иҹласда мәлум олуб ки, З. Микајыловун евинә бахыш протоколунда Һ. Әлијевин ад вә сојады олса да, имзасы јохдур. Вәкил Рамиз Мәммәдов бунун сәбәбини сорушуб. Шаһид буну техники сәһв адландырыб. Вәкилләр ондан тапылан тапанчаны һара гојдугларыны сорушуб. Һ.Әлијев тапанчаны зәрфә гојдугларыны дејиб. Вәкилләр исә ондан тапанчанын зәрфә јерләшиб-јерләшмәмәсини сорушублар. Шаһид вәкилләрә "атмаҹа атмајын" ҹавабыны вериб.
"Јалан данышыр"
Иҹласда даһа бир полис әмәкдашы Елшән Ҹамалов да ифадә вериб. Онун сөзләринә ҝөрә, З.Микајылов өзү етираф едиб ки, евиндә силаһ вар. Бу исә З.Микајыловун наразылығына сәбәб олуб: "Јалан данышыр, һеч олмаса "етираф етди" ифадәсин ишләтмәсин". Иҹласда мәлум олуб ки, шаһид Елдар Бүнјадыовун да сахланылмасы әмәлијјатында иштирак едиб. Е.Бүнјадов дејиб ки, шаһид ону сахлајандан сонра һәдәләјиб. Она "әҝәр истәдикләримизи јазмасан сәни инҹидәҹәјик" дејиб: "Мәнә көһнә тапанча гојмушдунуз". Шаһид исә она "јенисини алардын, ону гојардыг" - ҹавабыны вериб. Е.Бүнјадов дејиб ки, Конститусијаны онун дајысы Ҹәфәр Мөвсүмов јазыб. О билдириб ки, бу ҹүр һәрәкәтләр етмәк дүзҝүн дејил: "Мәним ҹибимдә һеч алма кәсмәјә бычаг да олмајыб" . Просес апрелин 17-дә давам едәҹәк.
