Әһлибејт (ә) Хәбәр Аҝентлији: Һаҹы Талеһ Бағырзадә ачыглама вериб.
Еј әзиз вә мөһтәрәм халгым!
Бу залым режим бизләри сизләрдән ајырараг, зинданлара мәһкум етсә дә, дүшүнҹәләримизин, сөзләримизин, сизә олан сәмими севҝи вә мәһәббәтимизин гаршысыны һеч вахт ала билмәјәҹәк. Бу режим анламыр ки, бизим шәрәф вә иззәтлә апардығымыз АЗАДЛЫГ мүбаризәси бизим үчүн азадлығын өзүндән белә шириндир. Она әмин олун ки, гаранлыг ишығы мәһв едә билмәдији кими, бу јарамаз режим дә бир ҝүн бизим шәрәфли дирәнишимиз, мүбаризәмиз гаршысында мүтләг битәҹәк!
Еј дәјәрли баҹы вә гардашларым!
Биз һәр биримиз фәрд олараг, фәргли дүшүнә, фәргли бахыш вә әгидәләрә саһиб ола биләрик. Лакин бу фәрглилик бизим бир халг олараг, бирҝә мүбаризә апармағымыза мане олмамалыдыр. Биз бир јердә, бирҝә мүбаризә апармалыјыг. Мәмләкәтимиз, Вәтәнимиз үчүн; мәзлум, кимсәсиз инсанларымызын ҝөз јашларыны силмәк үчүн; сәһәр иш далынҹа евиндән чыхыб, ахшам үмидсиз вәзијјәтдә, пулсуз-парасыз аиләсинин гаршысына чыхмаға утанараг, интиһар етмәк истәјән инсанларымызы хилас етмәк үчүн; һәтта шәһидләримизин ган пулуну да вермәкдән имтина едән режимә һәддини билдирмәк үчүн; ҝүнаһсыз адамлары шәрләјиб һәбсханалара долдуран режимә “дур” демәк үчүн; өвладларымызын хошбәхт ҝәләҹәји үчүн; һакимијјәтин банклар васитәсилә кредит әсарәтинә салдығы ҹәмијјәтимизин азадлығы үчүн; саһибкарларымызы, иш адамларымызы мүфлис едән монополистләрин ҹәзаландырылмасы үчүн; “Ислам һәмрәјлији или” елан едән режимин дин пәрдәсини јыртмаг үчүн; илләрдир сечки сахтакарлығы илә халгын ирадәсини һечә сајан режимә “јох” демәк үчүн; таланчылығы, коррупсијаны, ҹинајәткарлығы дөвләт сијасәтинә чевирән режимин вахтынын чатдығыны она билдирмәк үчүн; бир милләт олараг, өз варлығымызы гәсбкар режимә һисс етдирмәк үчүн јумруг тәк бир олуб, бирҝә мүбаризә апармалыјыг.
Сонда, бизә инанан, бизимлә бирҝә мүбаризә апармаг истәјән баҹы вә гардашларымызы демократик дүшәрҝәнин, Милли Шуранын 8 апрел 2017-ҹи илдә кечирәҹәји иҹазәли митингдә иштирак етмәјә чағырырам.
Танры сизләри горусун!
Һөрмәтлә, Сизин Тале Бағырзадә
