Әһлибејт (ә) Хәбәр Аҝентлијинин вердији мәлумата ҝөрә-просесдән сонра вәкил Елчин Садыгов билдириб ки, мүдафиә тәрәфи олараг 7 вәсатәт галдырсалар да, һеч бири тәмин едилмәјиб. О гејд едиб ки, М.Һүсејнов мәруз галдығы ишҝәнҹәләр һагда әтрафлы данышмаг истәсә дә, һаким она мане олмаға чалышыб. Буна бахмајараг, Меһман Һүсејнов бу һагда данышыб. Мәһкәмәнин тәләсик гәрар чыхарараг шикајәти тәмин етмәдијини дејән вәкил, апеллјасија шикајәти верәҹәкләрини ачыглајыб: “Һаким гәрарын јалныз нәтиҹә һиссәсини елан етди, һәтта шикајәтимизи нијә тәмин етмәдијини дә әсасландырмады".
Вәкили Фуад Ағајев исә вурғулајыр ки, мәһкәмәнин тәләскәнлијинин сәбәби онун барәсиндәки һөкмдән верилмиш апеллјасија шикајәти илә бағлыдыр. “Меһман Һүсејновун бөһтана ҝөрә ики ил азадлыгдан мәһрум едилмәсинә даир гәрарда прокурорлуғун гәрарына истинад олунуб. Прокурорлуг Меһманын ишҝәнҹәјә мәруз галмадығы нәтиҹәсинә ҝәлиб вә мәһкәмә дә һөкмүнү бунунла әсасландырыб. Мартын 29-да Бакы Апеллјасија Мәһкәмәсиндә һәмин һөкмдән верилмиш шикајәт үзрә илкин бахыш иҹласы кечириләҹәк. Апеллјасија шикајәтинә маһијјәти үзрә бахылана гәдәр ишҝәнҹә илә бағлы мәһкәмә гәрарынын да гүввәјә минмәсинә чалышырлар” - дејә вәкил билдирир.
Фуад Ағајев билдирир ки, просесин ҝедишиндә һаким Ајтән Әлијеваја етираз версәләр дә, һаким етираз бахылмамыш сахланыб. “Һалбуки һакимә верилән етираза мәһкәмәнин сәдри бахыб гәрар вермәлидир. Она ҝөрә дә һакимин бу етиразы бахылмамыш сахламасы ганунсуз иди”.
Вәкил Шәһла Һүмбәтова дејир ки, баш верәнләр мәһкәмә ҝөрүнтүсү јаратмагдан башга бир шеј дејилди: “Мән ишә бу ҝүн гошулмушдум, ишлә таныш олмаг үчүн вахт лазым иди. Мәнә 132 сәһифәлик ишлә таныш олмаг, сурәтләрини чыхармаг үчүн ҹәми јарым саат вахт верилди. Бу мүддәтдә һеч 132 сәһифәни охумаг мүмкүн дејил, нәинки мүдафиә гурмаг. Биз әлавә шаһидләрин диндирилмәси, Нәсими Рајон Полис Идарәсиндә олан видеокамераларын јаддашындакы ҝөрүнтүләрә бахыш кечирилмәси, Меһман Һүсејновун тибби комиссијадан кечирилмәси вә с. вәсатәтләр вермишдик. Һеч бири тәмин олунмады.
Вәкилләр Сәбаил Рајон Мәһкәмәсинин гәрарыны алан кими апеллјасија шикајәти верәҹәкләрини билдирибләр. Меһман Һүсејнов јанварын 9-у ахшам саатларында Нәсими Рајон Полис Идарәсинин әмәкдашлары тәрәфиндән сахланыб. О, Инзибати Хәталар Мәҹәлләсинин 535.1-ҹи (полисин гануни әмринә табе олмамаг) маддәси илә тәгсирли билинәрәк, Нәсими рајон мәһкәмәсинин гәрары илә 200 манат ҹәримә олунуб вә сәрбәст бурахылыб.
М.Һүсејнов мәһкәмәдән азад едилдикдән сонра журналистләрә ачыгламасында билдириб ки, о пешә фәалијјәтинә ҝөрә тәзјигә мәруз галыр вә сахланыларкән полисләр она ишҝәнҹә верибләр. О, ишҝәнҹә фактынын арашдырылмасы вә ҹинајәт иши башланмасы үчүн прокурорлуға мүраҹиәт етсә дә, прокурорлуг ҹинајәт ишинини башланмасынын рәдд едилмәси барәдә гәрар гәбул едиб. ДИН дә онун бу ачыгламасыны тәкзиб едиб вә блоҝҝерин бөһтан атдығы барәдә ачыглама јајыб. Ачыгламада һәмчинин билдирилирди ки, Меһман Һүсејновун полиси ағыр ҹинајәтдә иттиһам етмәклә бөһтан атмасы әмәлинә һүгуги гијмәт верилмәси үчүн Дахили Ишләр Назирлији тәрәфиндән республика Баш Прокурорлуғу гаршысында вәсатәт галдырылыб. Бундан сонра исә Нәсими рајон полис идарәсинин рәиси Муса Мусајев хүсуси иттиһам гајдасында мәһкәмәјә мүраҹиәт едиб. Полис рәиси Меһман Һүсејновун ҸМ-нин 147.2-ҹи (ағыр вә ја хүсусилә ағыр ҹинајәтдә иттиһам етмәклә бөһтан атма) маддәсилә мәсулијјәтә ҹәлб олунуб, ҹәзаландырылмасыны истәјиб. Бу шикајәтә әсасән, Меһман Һүсејнов мартын 3-дә Сураханы Рајон Мәһкәмәсинин һөкмү илә 2 ил мүддәтинә азадлыгдан мәһрум едилиб. Диггәт!Хәбәрдән истифадә етдикдә мәнбәјә истинад лазымдыр.
