Әһлибејт (ә) Хәбәр Аҝентлији-Март ајынын 22-си шәһид Сејмур Бахышовун һәјат јолдашы Ајнурә ханым ҝүнорта саатларында телефонума тәлашла зәнҝ вуруб деди ки, өтән илин апрел дөјүшләиндә шәһид олмуш әри, МАХЕ Сејмур Бахышовун хатирә лөвһәсини јашадыглары 4-ҹу микрорајон, 24 сајлы бинанын үзәринә вурмаг истәјәркән, Сумгајыт шәһәр иҹра һакимијјәтиндән 4 машын долу киши онларын башынын үстүнү кәсдирәрәк, тәҹили сурәтдә иши дајандырмағы, хатирә лөвһәсинин һәмин бинадан вурулмасынын гануназидд һәрәкәт олдуғуну дејибләр. Вә бу дөрд машындакы 10 нәфәрдән артыг киши, гадынларын үзәринә гарға-гузҝун кими һүҹум чәкибләр. Тәләб едибләр ки, бинанын гаршысында апардыглары иши тәҹили дајандырсаынлар. Вә дејибләр ки, бу лөвһә бинаны учура биләр, техники гајадалара ујғун ҝәлмир, бинаын бир тәрәфинин әјилмәсинә ҝәтириб чыхараҹаг...
Гадын онлардан сорушур ки, бәс биналарын алт вә үст гатларында бу гәдәр артырмалар, лајиһәләри позуб мағаза, салон, ҝәлирли објектләр тикәнләр шәһәрин ҝөзәллијини, биналарын ҝөрүнтүсүнү позмурму... О тикинтиләр биналары тәһлүкәјә салмырми?! Кимдир ки, о ҝәлинин дедијини ешидән. Бурада Иван Крыловун "Гурд вә гузу” тәмсилини хатырладым. Тәбии ки, телефонда ағлаја-ағлаја бу һадисәни мәнә данышан дул галан ҝәлинин һансы һаллар кечирдијини тәсәввүр етмәк чәтин дејил. Мән ӘРИ Вәтән уғрунда дөјүшдә һәлак олуб, Азәрбајҹана "Галибијјәт” адлы мисилсиз шәрәф ҝәтирән дул ҝәлиндән сорушдум ки, нијә бу һагда вахтында Сумгајыт шәһәр иҹра һакимијјәтинә мүраҹиәт етмәјибләр. Ҝәлин деди ки, иҹра һакимијјәтинә бу суалла мүраҹиәт етсәләр дә, гапыда ҝөзләсәләр дә онлары гәбул едән олмајыб. Инди исә өз һесабларына бинанын јан диварыны аглај дашларла сувајараг, үзәринә бир хатирә лөвһәси вуранда гәзәбә ҝәлибләр. Журналистләри көмәјә чағырырды, әлимдә Апрел дөјүшләри һаггында китаб чап просесиндә олдуғундан, бу мүһүм иши јарымчыг гојуб Сумгајыта ҝедә билмәдим. Наәлаҹ галан ҝәлин, шәһид аиләләринин проблеми илә бағлы, ҝөрүшләрин бириндә она телефон нөмрәси вермиш, шәхсә зәнҝ вурур. Һәмин шәхс ҝәлини динләјән кими, Сумгајытын аидијјаты органларына ја хәбәрдарлыгмы едир, ја ҝөстәришми верир, нә олурса, бајаг шир-нәр кими үч гадынын үстүнә төкүлүшән иҹра һүмајәндәләри гузуја дөнүрләр... Вә бир анын ичәрисиндә "мәләксималы, хејирхаһ” бәндәләрә дөнүб, Бахышовлар аиләсинин гуллуғунда һазыр олдугларыны дејирләр. Һадисәнин сону јахшылыгла битир. Јалныз јухарыдан олан ҝөстәришдән сонра, әмрә һазыр "шири-нәрләр” ҝери чәкиләрәк, вәтәнимизә ГАЛИБИЈЈӘТ шәрәфи ҝәтирән, өлүмүндән сонра 17 ҝүн табутуну ҝөзләдијимиз Сејмур Бахышовун бу мәһәлләдә доғулуб, бу евдә јашамасыны билдирән лөвһәни бинаја вурурлар. Јахшы ки, сону белә гуртарды. Ән азы, бу бинаын гаршысындан кечән инсанлар охујаҹаглар, унутмајаҹаглар, сорушаҹаглар, о ҝүнүмүзүн Гәһрәманлыг хатирәсини јашадан бир лөвһә һәмишә диггәт мәркәзиндә олаҹаг.
Бу ҝүн хәбәр сајтларындан охудум ки, Елчин Заһироғлу ермәниләрин Азәрбајҹан базарына мал чыхардыгларынын үстүнү ачыб вә буну сүбут едәндән сонра, онун үзәринә һүҹума кечәнләр олуб, ону шәр-бөһтан атмада ҝүнаһландырыблар. Лакин Елчин Заһироғлунун әлиндәки "Маде ин АРМЕНИА” јазылан факты кимсә инҹәләмәк истәмир ки, ај дади бидад бу торпагларымызын 20 фаизини ишғалда сахлајан, 25 илдир ки, инсанларымызы, арзуларымызы мәһв едән ермәниләрин Азәрбајҹан базарына јол ачмасына ким имкан јарадыб? Бунун бир тәрәфи дә ахы бизим өлкәмизин тәһлүкәсизлијинә тәһлүкә ҝәтирир. Мән һеч инанмаг истмәирәм ки, ОВС мағазалар шәбәкәсиндә Елчин Заһироғлунун шәкил чәкдији мәгамын ҝөрүнтүсүнү ҝөтүрмәк бу гәдәр чәтин ола биләр? Јәни ОВС мағазалар шәбәкәсини идарә едәнләр, дөвләтимиздән ҝүҹлүдүрләр?! Мән инанмаг истәјирәм ки, бизим тәһлүкәсизлик, һүгуг мүһафизә органлары системиндә һәлә Вәтән гејрәти чәкән, шәһидләримизин ганыны алмаг истәјән забитләримиз вар. Вә онлар, Азәрбајҹана ермәниләрин истеһсал етдији вә ја, ермәниләрин марағына ујғун олараг Азәрбајҹан базарына үзәриндә һәрби нахышлар олан малларын кимләр тәрәфиндән ҝәтирилдијини мүтләг ашкар едәрәк, иҹтимаијјәтә хәбәр верәҹәкләр. Вәтәнин бу мүгәддәс савашаында мүҹадиләләр етдијимиз һалда, өз ҹибләрини, ермәни гоһумларыны дүшүнәрәк, Азәрбајҹана онларын тиҹари системләрини јеридәнләрин ҹәзасыны верәҹәкләр. Биз бу торпаглар уғрунда ган төкмүшүк,ҹан вермишик...
Бу һадисәдән нараһатлығымы, наһагдан дул галмыш бир шәһид ҝәлининин башына ҝәтириләнлә башламадым... Јәни буну хатырлатмаг лазымдырмы ки, о Сејмуру да, Рагуфу да, Әбсдүлмәҹиди дә... бу ҝүнә гәдәр минләрлә инсанымызы ермәниләр өлдүрүбләр. Нијә бизим бүтүн "боз ишләримиз” сатышдан ҝедир? Нә замана гәдәр сатаҹағыг... дөвләтин ичәрисиндә нә замана гәдәр садә инсанларла алгы-сатгы ојуну едәҹәксиниз? Нијә бир шәһид аиләсинә бир хатирә лөвһәси вурмаға, аиләсини доландырмаг үчүн бир балаҹа мал төвләси тикмәјә, чадырдан чыхыб 5 сот јердә ев тикиб балаларыны башына јығмаға торпаг вермирик, вәзифәли мәмурларын исә имартләринин саһәси јүзләрлә квадратметр ,һасарларынын һүндүрлүјү артыг 7-8 метрә чатыр... Анҹаг о һасарларын әтрафындан апрел дөјүшләриндә аталары, гардашлары, оғуллары һәлак оланлар да кечир... Унутмајын ки, Азәрбајҹан президенти Илһам Әлијев бизим Галибијјәт савашымызы гијмәтләндирәрәк, Апрел дөјүшләриндә һәлак олан оғулларымыза вә һәмин дөјүшләрдә иштирак едәнләрә јүксәк дәјәр верди. Лүтфән, буну унутмајын
