Әһлибејт (ә) Хәбәр Аҝентлији-“Бу ҝүн (мартын 13-дә) дан ағарандан Биләсувардан Ирана кечмәјә јенә тыхаҹ варды. Дәриндән мүшаһидә едәндә, белә нәтиҹәјә ҝәлирсән ки, бу тыхаҹлары јарадан елә ҝөмрүкчүләрдир. Өзү дә мәгсәд инсанлары инҹитмәкдир. Јохса һеч нәдән бу гәдәр инсаны мәнтәгәјә топлајыб сонра да тысбаға јеришијлә сәнәдләрини јохламағын, јерсиз сорғу-суала тутмағын башга нә ады вар ки…”. “Ҹәми ики нәфәр хидмәт ҝөстәрирди”
Биләсувар сәрһәд кечид мәнтәгәси. 13 март 2017 Бакы сакини Мәзаһир Рүстәмов мартын 13-дә сәһәр саатларында Биләсувар сәрһәд-кечид мәнтәгәсиндә јаранан проблемдән данышыр: “Тез-тез Ирана дәрман алмаға ҝедирәм. Һәр дәфә дә ејни әзаб-әзијјәти чәкирәм. Сизә фотолар ҝөндәрирәм. Бах о фотолары мән сәһәр саат 10-да чәкмишәм. Анҹаг адамлар сәһәр саат 7-нин јарысындан ора топлашмышдылар. Саат 9-да мәнтәгә ачылды, инсан ахыны мәнтәгәјә јахынлашмаға башлады. Саат 10 иди, нөвбә ҝөзләјән јүзләрлә инсана ҹәми ики нәфәр хидмәт ҝөстәрирди – паспортларыны јохлајырды. Өзү дә сәнәдләри елә тысбаға сүрәтијлә јохлајырлар ки, адамларын үрәји үзүлүр. Ишчи гытлығыдыр ки? Гәсдән бу вәзијјәти јарадырлар. Бири ағзыны ачыб сөз дејәндә дә елә кобудлајырлар ки, адамын једди гатындан кечир”.
“Иран сәрһәдиндә нөвбә јохдур”
Мәзаһир Рүстәмов дејир, сәһәр саат 7-дән ҝүнортајаҹан нөвбәдә дајананлар саат 1-2 радәләриндә сәрһәди кечәндә, санки үзәрләриндән бир јүк ҝөтүрүлүр: “Иран сәрһәдиндә исә нөвбә јохдур. Инсанлар чох раһат сәнәдләрини тәгдим едиб кечиб ҝедирләр”.
Биләсувар сәрһәд кечид мәнтәгәси. 13 март 2017 2 ил әввәл Азәрбајҹан вә Иран һөкумәти арасында Биләсувар вә Астара сәрһәд кечид мәнтәгәләринин 24 саат фәалијјәт ҝөстәрмәсинә даир разылыг имзаланыб. Анҹаг разылашма јалныз јүкдашымалара аиддир. Вахташыры Ирана ҝедән Мәзаһир Рүстәмовун арзусу будур ки, ејни раһатлыг пијадалара да шамил олунсун.
