Әһлибејт (ә) Хәбәр Аҝентлијинин вердији мәлумата ҝөрә-Нардаран һадисәләринә ҝөрә һәбс олунан Аға-Әли Јәһјајев истинтаг органынын әлиндә олан автомобилинин гајтарылмасыны истәјир. Дедијинә ҝөрә, хәстә өвладынын мүалиҹәсинә пул ҝәрәкдијиндән, аиләси машыны сатыб тибби хидмәт хәрҹләрини өдәјәҹәк.
“Ана-баҹымызла, аиләмизлә мүбаризә апарырлар”
Аға-Әли Јәһјајев һазырда Бакы Ағыр Ҹинајәтләр Мәһкәмәсиндә Мүсәлман Бирлији Һәрәкаты сәдринин мүавини Елчин Гасымов вә даһа 10 нәфәрлә бирликдә мүһакимә олунур. Февралын 3-дә кечирилән мәһкәмәдә автомобилин гајтарылмасына даир вәсатәт мүзакирә олунуб. О, автомобилинин ҹинајәт предмети олмадығыны вурғулајыб.
Мајыл Бајрамовун сәдрлик етдији һакимләр коллеҝијасы вәсатәти тәмин етмәјиб.
“Бизә мүраҹиәт един, биз дә Сәһијјә назирлијинә мүраҹиәт едәк, ушағы әмәлијјат еләсинләр”, – һаким белә дејиб.
Аға-Әли Јәһјајев ҹавабында билдириб ки, бүтүн мүвафиг гурумлара, о ҹүмләдән Һејдәр Әлијев Фондуна да мүраҹиәт олунуб, амма һамысы јардым ҝөстәрмәкдән имтина едиб: “Бизим ана-баҹымызла, аиләмизлә мүбаризә апарырлар”.
Ардындан Аға-Әли Јәһјајев өз вәкилинин вә прокурорун суалларыны ҹаваблајараг, һәбсиндән данышыб. О, Елчин Гасымовла мүнасибәтләри олдуғуну, онун һәбс хәбәрини ешидинҹә, Сабунчу Рајон Полис Идарәсинә ҝетдијини, елә һәмин идарәнин өнүндәҹә тутулуб ишҝәнҹәјә мәруз галдығыны сөјләјиб: “Ҝөзүмә о гәдәр вурмушдулар ки, һеч нәји ҝөрмүрдүм. Инди дә һәмин зәдәләр галыр. Идарәнин гаршысында полисләрә гаршы һеч бир мүгавимәт, зоракылыг олмајыб”.
“АНС “Хоҹа”ны мәнә 200 маната сатмышды
” Тәгсирләндириләнләрдән Наһид Гәһрәманов ифадәсиндә онлара верилән иттиһамларын сахта вә әсассыз олдуғуну билдириб. Даһа өнҹә дә “Һиҹаба азадлыг” аксијасында тутулдуғуну, 2014-ҹү ил декабрын 30-да әфв сәрәнҹамы илә азадлыға чыхдығыны дејән Наһид Гәһрәманов Аға-Әли Јәһјајевлә һәбсханада таныш олдуғуну дејиб: “Азадлыға чыхандан сонра онунла ҝөрүшәндә деди ки, “Мүсәлман Бирлији” адлы тәшкилат јарадылыр. Мән дә гошулдум. Тәшкилатын сәнәдләшмә ишләрини өзүм һазырламышам. Сәнәдләри дә гејдијјат үчүн Әдлијјә Назирлијинә мән тәгдим еләмишәм. Инди дејирләр ки, ганунсуз фәалијјәт ҝөстәрмисиниз.
Тәһсил Назирлијинин гаршысында һиҹаба гадаға илә әлагәдар илк дәфә динҹ аксија кечирәндә, полисләр бизим ханымлары сүрүдүләр. Президентин анд ичдији Гураны тапдаладылар. Азәрбајҹанда фикрә ҝөрә ҹәза верирләр. Бизим чыхышларымыз нә һагда олуб? Интиһарлары писләмишик, наркоманијаја гаршы чыхышлар етмишик. АНС “Хоҹа” филмини мәнә 200 маната сатмышды, ону апарыб мәктәбләрдә ҝөстәрирдик ки, ушагларда вәтәнпәрвәрлик руһу јүксәк олсун”.
Наһид Гәһрәманов дејир ки, Нардаран әмәлијјатында һәлак олан полисләр дә инанҹлы олдугларындан, диндарлара гаршы ганлы әмәлијјатда иштирак етмәк истәмәјибләр: “Буна ҝөрә дә онлары өлдүрдүләр. Һадисәдән сонра Сәрдар Бүнјадовҝилә ҝетдим. Евә елә һүҹум еләдиләр ки, санки ермәни евинә ҝирирләр. Гадын, ушаг – һамысы горхмушду. Јазыблар ки, ҝуја мән һәмин евдә тәзә ҝәлинин јатаг отағында силаһ ҝизләтмишәм. Бир өзүнүз фикирләшин, Нардаранда буну неҹә етмәк олар? Мән һәмин отаға неҹә ҝирә биләрәм?”.
Сабунчу Рајон Полис Идарәсинә, орадан да Баш Мүтәшәккил Ҹинајәткарлыгла Мүбаризә Идарәсинә апарылдығыны, орада ишҝәнҹәләрә мәруз галдығыны, електрикә верилдијини дејән Наһид Гәһрәмановун сөзләринә ҝөрә, дәјәнәклә арамсыз башына вурублар: “Мән “бандотдел”дә дедим ки, сиз мәни тикә-тикә еләсәниз дә Талеһин әлејһинә ифадә вермәјәҹәм. Мәним ајағымын алтына о гәдәр вурмушдулар ки, ајағымы јерә гоја билмирдим. Ики ај орада мәнә ишҝәнҹә вердиләр. Башыма торба кечириб дөјүрдүләр. Ҝаһ дејирдиләр Иранын адамысыныз, ҝаһ да Американын. Сонра башладылар ки, Ҹәмил Һәсәнли дебатда Талеһин адыны чәкиб”.
Наһид Гәһрәманов дејир ки, ики ајдан сонра “бандотдел”дә өзүнү лифтин ҝүзҝүсүндә ҝөрәндә горхуб: “Бунларын һамысы чарын ишидир. О, дүјмәни басмаса, бунлар олмазды. Мүбариз ҝедиб ермәниләри өлдүрдү, онлар онун мејитинә һөрмәтсизлик етмәдиләр. Бизимкиләрсә Нардаранда өлдүрүлән Әкбәрин мејитинин намәһрәм јерләринә насист ишарәләри чәкиб бүтүн каналларда ефирә вердиләр”.
“Мән террорчу дејиләм, тиҹарәтчијәм”
Даһа бир тәгсирләндирилән Әмирли Әлијев ифадәсиндә билдириб ки, ону ики оғлу вә гардашы оғлу илә бирликдә тутублар: “Дедим ки, ушаглары бурахын, мәни тутун, 11 маддә илә иттиһам вердиләр, һеч бир ҝүнаһым олмадан. Мән террорчу дејиләм, тиҹарәтлә мәшғул олмушам”.
Талеһ Бағырзадәни һеч танымадығыны дејән Әмирәли Әлијев өвладларыны горумаг үчүн тәләб олунан ифадәни имзаламаға мәҹбур галдығыны сөјләјиб (азадлиг).
Мәһкәмә давам едир.
