Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Үмүдүнја Мүсәлманларынын Али Рәһбәри Ајәтуллаһ Сејид Әли Хаменеи Һүсејни Һөҹҹәтүл Ислам Шејх Әли Әкбәр Һашими Рәфсәнҹанинин вафаты мүнасибәти илә башсағлығы вериб.
Имам Хаменеи ҹәнабларынын башсағлығы месажы беләдир:
“Аллаһын ады илә! Иннә лилләһ вә иннә иләјһи раҹиун (Биз Аллаһа мәхсусуг вә Она тәрәф дә гајыдаҹағыг). Тәссүф һисси илә Ислами һәрәкат вә мүбаризә илләринин һәмсәнҝәри, көһнә достум, Ислами Республика дөврүндә узун илләрин јахын һәмкары олан ҹәнаб һөҹҹәтүл-ислам Һаҹы Шејх Әкбәр Һашими Рәфсәнҹанинин гәфләтән өлүмү илә бағлы хәбәри алдым. 59 ил һәмкар вә силаһдашымы итирмәк чәтин вә ағрылыдыр. Биз бу онилликләр әрзиндә неҹә чәтинликләр вә манеәләрдән кечдик. Чох заманлар бир-биримизлә мүшавирәләр апардыг, мүштәрәк јолумуз уғрунда чалышдыг, чәтинликләр вә тәһлүкәләрә синә ҝәрдик. О илләр әрзиндә онун ити зәкасы вә надир сәмимијјәти онунла һәмкар олан бүтүн шәхсләр, хүсусилә, мәним үчүн етибарлы тәкјәҝаһ иди. Бу узун мүддәт әрзиндә мүхтәлиф заманларда фәргли мөвгеләр вә фикирајрылыгларынын олмасы белә Кәрбәлада, “бејнәл-һәрәмејн”дә бизим арамызда башланан достлуг мүнасибәтләри вә бағларыны һеч бир заман ајыра билмәди. Сон илләр бизим арамызда јаранан фикирајрылығындан ҹидди шәкилдә истифадә етмәк истәјән шејтанларын вәсвәсәси дә онун мәнә олан севҝисини азалтмады.
О, шаһ зүлмүнә гаршы мүбаризә апаран илк нәслин мисилсиз нүмунәси, еләҹә дә тәһлүкәли вә ифтихар едиләҹәк бу јолун аҹысыны ҝөрәнләрдән иди. Узун илләр һәбсдә олду, “Савак”ын ишҝәнҹәләринә дөздү, сонра “Мүгәддәс Мүдафиә” дөврүндә гәбул етдији ҹидди мәсулијјәтләр, “Ислами Шура Мәҹлиси”нин сәдри, “Хобреган Експертләр Мәҹлиси”нин сәдри вә диҝәр чалышдығы вәзифәләр, бу кечмиш мүбаризин енишли-јохушлу һәјатынын парлаг сәһифәләридир.
Һашимини итирмәклә мән тарихин бу енишли-јохушлу дөнәминдә онун кими узунмүддәтли вә мүштәрәк тәҹрүбәјә саһиб олан диҝәр бир шәхси танымырам.
Инди бу көһнә мүбариз мүхтәлиф фәалијјәт вә чалышмаларла долу бир “әмәл дәфтәри” илә Аллаһын һесаб мәһзәриндәдир. Бу исә биз Ислам Республикасы мәсул шәхсләринин һамсынын талејидир.
Аллаһдан онун руһу үчүн сәмими гәлбдән рәһмәт вә мәғфирәт диләјирәм. Онун һәјат јолдашы, өвладлары, гардашлары вә диҝәр гоһумларына башсағлығы верирәм."
Диггәт: Хәбәрдән истифадә етдикдә мәнбәјә истинад лазымдыр
