Әһлибејт(ә) Хәбәр Аҝентлијинин вердији мәлумата ҝөрә-Нојабрын 23-дә Бакы Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын һәбсдә олан сәдри Талеһ Бағырзадә, АХҸП сәдринин мүавини Фуад Гәһрәманлы вә диҝәрләринин нөвбәти мәһкәмә просеси кечирилиб.
Һаким Әлөвсәт Аббасовун сәдрлик етдији иҹласда өтән мәһкәмә просесиндә тәгсирләндирилән Аббас Һүсејнов тәрәфиндән сәдрлик едән һакимә верилән етираз мүзакирә едилиб. Вәкилләр етиразын тәмин олунмасыны истәјибләр. Прокурор Нәсиб Бајрамов исә етиразын әсассыз олдуғуну дејиб. Бундан сонра гәрар гәбул етмәк үчүн һакимләр Маһмуд Ағаларов вә Елдар Микајылов мүшавирәјә ҝедибләр. Бу заман Ф. Гәһрәманлы сәдрлик едән һаким Әлөвсәт Аббасова мүраҹиәт едәрәк дејиб: "Ҹәнаб һаким, мәнҹә, етиразын тәмин олунмасы сизин дә үрәјинизҹә олар. Сиз дә ҹанынызы гуртарарсыныз".
Мүшавирәдән сонра һакимләр гәрары ачыглајыб. Етиразын бахылмамыш сахланылдығы билдирилиб. Һакимләр дејибләр ки, етираз әсасландырылмајыб.
Даһа сонра иҹласда шаһидләрин ҝәлмәдији мәлум олуб. Буна ҝөрә иҹлас нојабрын 28-нә тәхирә салыныб.
Ф. Гәһрәманлы исә дејиб ки, мәһкәмә гәрәзли олараг јубадылыр :"Мән кечән дәфә дә дедим ки, мәнимлә бағлы шаһидләри ҝәтириб диндирсинләр. Лакин мәгсәдли шәкилдә просес јубадылыр".
Диггәт! Хәбәрдән истифадә етдикдә мәнбәјә истинад лазымдыр!
