Әһли Бејт (әлејһимус сәлам) -АБНА- Хәбәр Аҝентлији- Рөјалә Фәтәлијева паратаеквондо үзрә дүнја чемпионудур. О, Раманада јерләшән Сағламлыг Имканлары Мәһдуд Ҝәнҹләрин Пешә Реабилитасија Мәркәзиндә курсда оларкән директору Раһилә ханымын сајәсиндә идмана јөнләндирилиб. Әввәлләр идмана марағы олмајан ханым таеквондочу ҝетдикҹә бу саһәнин, демәк олар ки, ашиги олуб.
Рөјаләни бу идмана, бәлкә дә, бир инад бағлајыб. Чүнки она әввәлҹә баҹармаз дејәнләр олуб. О да һәр кәсә өзүнү сүбут етмәјә чалышыб ки, бир әлинин гүсурлу олмасы һеч дә проблем дејил.
Рөјалә Фәтәлијева Публика.аз-а мүсаһибәсиндә идмана ҝәләркән она мане олмаға чалышанлары неҹә пешман етмәсиндән вә ән бөјүк мәгсәдиндән данышды:
- Өнҹә сәни јахындан таныјаг.
- Фәтәлијева Рөјалә Витали гызы, 1991-ҹи ил ијун ајынын 6-да Фүзули рајонунун Гаҹар кәндиндә анадан олмушам. Аиләмиз 6 нәфәрдән ибарәтдир: атам, анам, 2 баҹым, 1 гардашым вә мән.
Ону гејд едим ки, мәним әкизим вар. Һазырда Лөкбатан гәсәбәсиндә јашајырам. Нефтчи Гурбан адына 288 сајлы орта мәктәбдә охумушам, орта тәһсиллијәм.
- Идмана неҹә башладын?
- 2011-ҹи илдән таеквондо илә мәшғул олмаға башламышам.
- Бу саһәдә сәни дәстәкләјән олуб?
- Дүзүнү десәм, идмана һеч һәвәсим олмајыб. Мән Раманада јерләшән Сағламлыг Имканлары Мәһдуд Ҝәнҹләрин Пешә Реабилитасија Мәркәзиндә олмушам. Орада компүтер курсунда охујурдум. Оранын директору Раһилә ханымын сајәсиндә бу идман нөвү илә мәшғул олмаға башладым.
Али тәһсилим јохду. Ән бөјүк арзум да али тәһсилимин олмасы иди. Буну да Раһилә ханым билирди. Илк олараг мәнә буну тәклиф едәндә имтина етдим. Чүнки истәмирдим. Сонра мәнә дејәндә ки, бу идманла мәшғул олсан, үрәјиндә нә арзун варса, јеринә јетәҹәк вә мән дә разылашдым.
- Бәс аилә үзвләрин бу гәрарыны неҹә гаршылады?
- Өнҹә аиләм разы дејилди. Сағ олсун Раһилә ханым, онлары разы салды.
- Әнҝәл олмаға чалышдылармы? Јәни баҹармазсан, сәнин үчүн чәтин олаҹаг дејәнләр олдуму?
- Билирсиз, мәндә анаданҝәлмә сол голум дирсәкдән ашағы јохдур. Гүсурлу дүнјаја ҝәлмишәм, аиләм дә ән чох буна ҝөрә истәмирди ки, Рөјалә баҹара билмәз. Амма сонра бу идмана даһа чох бағландым. Аиләмә вә гоһумларыма сүбут етмәк истәдим ки, инсан дүнјаја әлил олараг ҝәлсә дә, һәр шеји баҹара биләр. Бир чох гоһумларым, аиләм, һамысы әнҝәл олмаға чалышдылар. Дүшүнүрдүләр ки, әлиләм.
Јенә дејирәм, мән өзүмү сүбут етмәк истәдим. Истәдим ки, һеч вахт демәсинләр “бу әлилдир, һеч нәји баҹара билмәз”. Илк нөвбәдә инсан өзүнә инанмалыды. Бу заман диҝәрләри дә сәнә инанаҹаг. Ону да билдирим ки, мәнә ән бөјүк дәстәк достум Рамин вә әкиз баҹым Хәјаләдән ҝәлиб.
Рамин мәним мәктәб јолдашым олуб. О замандан достлуғумуз һәлә дә давам едир.
- Дедин ки, әлиләм дејә әнҝәл олмаға чалышдылар, баҹармаз дејәнләр олду. Бәс бу фикирләр сәни руһдан салмырды?
- Тәбии ки, бәдбинлијә гапылырдым. Һеч ҝөзләмәздим ки, белә фикирләшәрләр. Билирсиз нијә? Чүнки аиләм мәни әркөјүн бөјүдүб. Бәлкә дә буна ҝөрә дүшүнүбләр ки, баҹара билмәрәм. Амма мән һамыны өзүмә инандырмаға чалышдым вә буна наил олдум. Сүбут етдим ки, әлил олсам да, бу ишин өһдәсиндән ҝәлдим.
- Бу идманда јени олсан да, титулларын вар. Һансы јарышларда иштирак едиб медал газанмысан?
- 2011-ҹи ил сентјабрын 26-да гатылдығым илк јарышымда Москвада кечирилән Авропа чемпионатында 3-ҹү јерә лајиг ҝөрүлмүшәм. Даһа сонра 2012-ҹи илдә Арубада кечирилән дүнја чемпионатында 2-ҹи јер, нәһајәт, 2013-ҹү илдә Исвечрәдә баш тутан дүнја чемпионатында 1-ҹи јери тутдум.
- Неҹә фикирләширсән, сәнә баҹармаз дејәнләри пешман етмисәнми?
- Тәбии ки, буна ҝөрә чох хошбәхтәм. Бир чох аиләнин өвладлары дүнјаја әлил ҝәлир. Дүшүнүрәм ки, илк нөвбәдә, аилә өз өвладына дәстәк олмалыдыр. Мәсәлән, мән таеквондо илә мәшғул олмаға башлајанда аиләм мәнә дәстәк олмалы иди, демәмәли иди ки, “баҹармаз”. Аиләм бу сөзү дејәндән сонра кәнардакылар да дејәҹәк. Јенә дејирәм, ҝәрәк ән башда аилән дәстәк олсун.
- Онлар өзләри дә етираф едибми ки, Рөјалә доғрудан да бизи дедикләримизә ҝөрә пешман етди?
- Тәбии ки… Мән гаршыма мәгсәд гојдум ки, чемпион олаҹам. Шүкүр, олдум вә һәр кәсә сүбут етдим ки, бу иши баҹардым. Һәрдән зарафатјана евдә дејирәм ки, “бахын мән тәк әлимлә башга өлкәдә бајрағымызы јүксәкләрә галдырдым. Амма сиз ики әли оланлар нә етдиниз?” (ҝүлүр). Амма һәгигәтән һәр зарафатда да бир доғрулуг вар.
- Пешәкар идманла мәшғул олдуғунузу билирик. Бәс һарадаса ишләјирсиниз?
- Хејр, садәҹә таеквондо илә мәшғул олурам.
- Пахыллығынызы чәкәнләр олубму?
- Валлаһ, билмирәм, бәлкә дә, олуб. Амма ону чох ҝөзәл билирәм ки, мән һеч кәсин пахыллығыны чәкмирәм. Шүкүрләр олсун Аллаһыма, истәдијими етмишәм вә едәҹәјәм дә…
- Анладым ки, аиләниздә башга идманчы јохдур?!
- Хејр, тәк мәнәм, бунунла да фәхр һисси дујурам.
- Әкиз баҹым вар дедин. Онда да физики гүсур вармы?
- Јох, әкизимин һеч бир гүсуру јохдур, сағламдыр.
– Мараглыдыр, охшар јөнләриниз вармы?
- Әввәл вар иди. Мән идманла мәшғул олмаға башлајандан һәр шеј әксинәдир.
– Неҹә ки?
- Әввәлләр мән чох сакит, утанҹаг идим. Ејни илә әкиз баҹым кими. Инди исә там фәрглијик. Мән одам, о исә су… (ҝүлүр)
Үз ҹизҝиләримиздә исә, мән дејирәм ки, һеч охшамырыг, амма чохларынын фикринә ҝөрә чох охшајырыг.
– Аиләлисиз?
- Хејр.
– Ҝәләҹәкдә јолдашын олаҹаг бәј идманы ат десә, ону разы салмаға чалышарсан?
- Чәтин ки, һансыса киши өз һәјат јолдашына идманла мәшғул олмаға иҹазә версин. Она ҝөрә дә, мәним аилә гурмаг фикрим јохдур. Амма гисмәтдир. Аилә һәјаты гурсам, елә бир шәхслә өмрүмү пајлашарам ки, ән азындан мәнә идманла мәшғул олмаға имкан версин.
- Мәгсәдин нәдир?
- Дүнја чемпиону олмушам. Истәјирәм ки, Авропа чемпиону да олум. Ән әсасы исә паралимпија ојунларында иштирак етмәк, нәтиҹә вермәк истәјирәм.
- Сон олараг бир суал верим. Сән һиҹаблы бир ханымсан. Буна ҝөрә јарышлара гатыларкән һансыса проблемлә үзләшмәмисән ки?
- Хејр, һеч бир проблемим олмајыб, манеә дә јаратмајыблар. Һәм дә әксинә, мәнә белә чох хошдур.
ајыблар. Һәм дә әксинә, мәнә белә чох хошдур.
Диггәт: Хәбәрдән истифадә етдикдә мәнбәјә истинад лазымдыр
