Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, ШӘРЛӘНӘРӘК һәбс едилмиш Руфулла Ахундзадә ГМИ-нин сәдри Аллаһшүкүр Пашазадәјә мәктуб үнванлајыб.
Мәһбусун һәбсханадан јаздығы бәјәнат формасында олан мәктубу тәгдим едирик:
Мәктубун мәтниндә гејд едилир:
"Шејх Һәзрәтләри!
Мәһәррәм ајынын башланмасы илә әлагәли бәјанатынызын (фитванызын) мүәјјән һиссәси телевизија васитәсилә бизләрә дә бәјан олду. Бу бәјанатын мүсбәт вә ја мәнфи тәрәфләри илә ишим јох. Мән вә мәним кими дин тәәссүбкешләри ҝөзләјирдик ки, Сиз дүнјада вә еләҹә дә јахын Шәргдә, мүсәлман өлкәләриндә сон илләр баш вермиш ганлы олајлары нәзәрә алыб, Азәрбајҹанымызда мәнфи, мәнәвијјатымыза, милли адәт-әнәнәләримизә јад олан, позғун Гәрб мәдәнијјәтини ашылајан, тәблиғ едән һаллара тохунаҹаг, телевизија вә радио васитәсилә ҹәмијјәти позғунлуға сүрүкләјән, милли муғамымыз вә ја ашыг дејишмәләри дејил, позуг, мүтрүф тамашалары, шоу верилишләри, Лут гөвмүнүн дашгалаг олунмасына сәбәб олан үздәнирагларын, телевизија, шоу апарыҹыларынын позғун һәрәкәт вә рәфтарларынын һеч олмаса Мәһәррәм вә Сәфәр ајлары әрәфәсиндә гаршысынын алынмасы һаггында фитва верәҹәксиниз. Лакин, тәәссүф вә јенә дә тәәссүф ки, бу гәдәр гырғын, ушаг, гадын, гоҹа гатилләринә дәстәк вермәкдәсиниз. Суал олуна биләр, нијә дәстәк вермәкдәсиниз?
Республикада бошанма, гәтл, ушаг өлүмү, интиһар, автомобил гәзалары, ҹаван өлүмү, “ағ өлүм”, үздәнирагларын ҝет-ҝедә артымы вә ачыг-ашкар һимајә олунмалары вә вәһһабилијә гаршы апарылан ишләрин ҝөрүнтү јаратмасы мәни мәҹбур етди ки, сизи вә сизинлә бир дүшүнүб һәрәкәт едәнләри “нәһј әз мүнкәри” (пис ишләрдән чәкиндирмә) тәрк едәнләр сырасында ҝөрүм.
Һөрмәтли Шејх! Һиҹаба гадағаја Сизин разылығыныз олмадан Тәһсил назирлији (ҝөрүнәни) бу аддымы ата билмәзди. Вә еләҹә дә, Сизин разылығыныз олмадан бизләр: Һаҹы Мөвсүм, Һаҹы Абҝүл, Һаҹы Фәрамиз вә јүзләрлә руһани вә диндар һал-һазырда һәбс едилә билмәздиләр.
Горхун Аллаһдан, онун гәзәбиндән! Төвбә един! Гуранда бујурулдуғу кими, мәним мөмин бәндәләримә зүлм едәнләр Ҹәһәннәмин ән пис гатына атылаҹаглар...
Одур ки, ҝүнаһ мәнбәји олан Бакыда јашајан сизләр инди төвбә един. Сабаһ ҝеҹ олаҹаг. Вәссәлам."
Диггәт: Хәбәрдән истифадә етдикдә мәнбәјә истинад лазымдыр
