Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, сон ҝүнләр һәбсханаларда сијаси мәһбуслара, о ҹүмләдән, Азәрбајҹан Ислам Партијасынын сәдри Мөвсүм Сәмәдова гаршы тәзјигләрлә бағлы һәјәҹанлы хәбәрләр јајылмагдадыр. Өлкә диндарларыны наразы салан вә етиразлара сәбәб олан бу һал иҹтимаијјәт тәрәфиндән кәскин писләнилир, тәзјигләрә сон гојулмасы тәләб олунур.
Виҹдан мәһбусларынын, о ҹүмләдән, Мөвсүм Сәмәдовун һүгугларынын кобуд шәкилдә позулмасы илә бағлы Азәрбајҹан Ислам Партијасынын Газах рајон комитәсинин үзвләри етираз бәјанаты илә чыхыш едибләр.
Бәјанатда дејилир:
"Мөвсүм Сәмәдов вә онларла инанҹлы инсан Азәрбајҹанда сон илләр Ислама јөнәлик башланан тотал һүҹумлара гаршы, һиҹаб вә азан гадағаларынын арадан галдырылмасы тәләбилә кәскин чыхышлар етдикләри үчүн сахта иттиһамларла һәбс едилибләр.
Бу ҝүлүнҹ һөкм гәрарында о, дөвләт чеврилиши етмәк ҹәһдиндә ҝүнаһландырылыб. Һалбуки јеҝанә силаһы сөз олан Мөвсүм Сәмәдов иҹтимаијјәтә өлкәдә инсанларын дејил, ганунун һаким олмасы үчүн рүшвәт вә коррупсија бәласына гаршы бирҝә мүбаризә апармаг чағырышлары едирди. Ҝөрүнүр, бир чохлары үчүн бу “силаһ” даһа тәһлүкәли олду дејә, ону сусдурмаг истәдиләр. Бу ҝүнкү тәзјигләр ҝөстәрир ки, Мөвсүм Сәмәдовун һагг чағырышларыны батырмаг үчүн, ҝөздән-көнүлдән узаға ҝөндәрмәк вә онун физики мәһвинә наил олмаг истәјирләр.
“Мөвсүм Сәмәдов һәбсдән азад едилсин!”
Һаҹы Мөвсүм Сәмәдова гаршы јол верилән һагсызлыглара, онун 11 сајлы ҹәзачәкмә мүәссисәсиндән узаглашдырылараг мәркәздән кәнарда јерләшән 12 сајлы һәбсханаја ҝөндәрилмәсинә вә бурада илк ҝүндән “карсда” сахланылмасына, һәмчинин, гапалы Гобустан һәбсханасына көчүрүлмәси илә бағлы чыхарылан гәрара биз дә кәскин етиразымызы билдиририк. Комитә үзвләри вә рајон диндарлары адындан Мөвсүм Сәмәдовун јенидән әдаләт вә виҹданла мүһакимә едиләрәк һаггында бәраәт һөкмү чыхарылмасыны тәләб едирик".
Диггәт: Хәбәрдән истифадә етдикдә мәнбәјә истинад лазымдыр
