Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Азәрбаjҹан вә Русиjа мүдафиә назирләри 2015-ҹи ил үчүн Әмәкдашлыг Планыны имзалаjыблар
Азәрбаjҹанын мүдафиә назири ҝенерал-полковник Закир Һәсәнов русиjалы һәмкары, орду ҝенералы Серҝеj Шоjгуну гәбул едиб.
Русиjа Мүдафиә Назирлиjинин нүмаjәндә һеjәти әввәлҹә Фәхри хиjабанда үмуммилли лидер Һеjдәр Әлиjевин вә Зәрифә Әлиjеванын мәзарларыны зиjарәт едибләр.
Гонаглар һәмчинин Шәһидләр хиjабанында өлкәмизин мүстәгиллиjи, әрази бүтөвлүjү уғрунда шәһид олмуш вәтәндашларымызын мәзарларыны зиjарәт едибләр.
Сонра Мүдафиә Назирлиjиндә рәсми гаршыланма мәрасими кечирилиб. Һәр ики өлкәнин дөвләт баjраглары галдырылыб, гонағын шәрәфинә фәхри гаровул дәстәси дүзүлүб. Фәхри гаровулун рәиси рапорт вердикдән сонра дөвләт һимнләри сәсләндирилиб. Рәсми протокола уjғун олараг орду ҝенералы С. Шоjгу Шәрәф Китабыны имзалаjыб
Ҝениш тәркибдә кечирилән ҝөрүшдә З. Һәсәнов ики өлкә арасында әмәкдашлығын достлуг мүнасибәтләри вә гаршылыглы инам үзәриндә гурулдуғуну, бу әлагәләрин даим инкишаф етдиjини геjд едиб. Азәрбаjҹанын мүдафиә назири Ермәнистанын һәрби тәҹавүзү нәтиҹәсиндә әразиләримизин ишғал олунмасы фактыны, бунун нәтиҹәсиндә доғма оҹагларындан дидәрҝин салынмыш бир милjонадәк гачгын вә мәҹбури көчкүн соjдашларымызын мөвҹудлуғу проблемини гонагларын диггәтинә чатдырыб.
Өз нөвбәсиндә С. Шоjгу дөвләтләримиз арасындакы әлагәләрин мөһкәм достлуг мүнасибәтләринә әсасландығыны, Русиjанын Азәрбаjҹанын ваҹиб тәрәфдашы олдуғуну геjд едиб.
Сонра ики өлкә арасында беjнәлхалг вә реҝионал тәһлүкәсизлик, Хәзәрдә һәрби әмәкдашлыг барәдә фикир мүбадиләси апарылыб, икитәрәфли һәрби техники вә һәрби тәһсил саһәләриндә әмәкдашлығын әсас инкишаф истигамәтләри, еләҹә дә гаршылыглы мараг доғуран диҝәр мәсәләләр мүзакирә едилиб. Ҝөрүшүн сонунда мүдафиә назирләри ики өлкә арасында 2015-ҹи ил үчүн Әмәкдашлыг Планыны имзалаjыблар.
Данышыглардан сонра күтләви информасиjа васитәләринин нүмаjәндәләри үчүн брифинг кечирилиб
Диггәт: Хәбәрдән истифадә етдикдә мәнбәjә истинад лазымдыр
